1 «Dayyuwwa ha'nooka Isira'eelito ‹Amii*› dayyuwwa ha'nooxxanna ‹Ruhama*› hitine ye'we.

2 «Ha'nooxxa ama xixe, isee xixe;

ise anxe are kada gophpheemmaxxee,

aninna iseke aro'obaan;

Alba ifikenaa'n yabaabulatixxa uushsho

qoma ifixxenaa'n yaababulle fugussitowwaal.

3 Iitta kada gophphoole kiphennexxi duwwi gatisannon;

ilendema barishsha mulqe saalibelo isee gatisannon;

Qiilla gammoojjeshsha,

bago boga ise assannon,

wode'iinxe dheebonni isee shiyannon.

4 Yabaabulto manjoxxe oose kaddemmaxxee

oose isexxee mararabe'no.

5 Ama insa'nexxi yabaabultoten; salphinnikinna insa'nee siila'witeen;

Isenna hitee qici, ‹Itannochchonna ha'wannochcho ani'a uunaan;

fuutiinxanna layinotixxa seemma,

zayitenna ha'wannochcho ani'a uunaan;

Tennexxee welt hosenneke labbalixxa duuka me'annon› hite.

6 Tennexxee ora iseka uteti duuchchannon;

fuldaaka ora gophphaashsha kinjiinka dalla'a ise'n ijaarannon.

7 Ise welti hosammake labballo hordoffe me'itaan;

yaane kinn insa'nee dhaqqabbabaa;

hassaani kaddomalee insa'ne affabaa.

Okkoneechchi uduma isenna hitaa qici,

‹Ani anke edike aro'ibaa higannon;

ta'i manni'n ani'a edo woyya› hitaan.

8 Midha, zayitenna woyinetika bulubulo ise'a uwweennak,

Ba'aalixxe mageneefachcho'n hosisseexxa

Worqenna birreti sibiljo ise'a birasa'isse uwweennak

ante kadeennexxa egendemmaba'a.

9 «Tennexxee midha anxa midha aaggammaxxe yanna'n,

anka woyinetika bulbulonna bulbuli fulammaxxa yanna'n adhdhannon.

Saala ifika buqexxabaashsha;

fuutiinxanna layionotixxa seemma isenaa'n wirrasse adhdhannon.

10 Ta'anna welti hossammake labballi edo

saali belo isee gatisannon;

anga anxenaa'n isee gatisaak mittikinna hedhebaa.

11 Gammaddammaka iseka ayyaanuwwa duuchcha:

woggatika iseka ayyaanuwanna haarooxxi baate fulatika iseka ayyaanuwwa,

iseka edika sanbatuwwanna iseka muremeeka ayyaanuwwa duuchcha gatisannon.

12 Welti hosannake labbalinaa'n adhdhenneke hita'neeka

woyinetika iseka hiddichuwwanna iseka balasetika haqichchuwwa

Urmake assannonni;

biniinchuwwikinna itaan.

13 Ba'aali hiyyendaxxe fakke'a hixaana gunbemmaxxe barruwaxxe;

mura isee woxisannon;

isenna seesuwwikinna qubuwwati ifi sefateen;

Isenna welti hosammake labbalixxa duuka me'itee»

hiyya'neen Duuchchi Woddik Gootti.

14 «Tennexxee ani isee maxxirsannon;

qiilla gammoojjeba'anna isee idaganon;

Jaalalatinna ise'n haaso'anno.

15 Okkoonna iseka woyinetika hiddichcho ise'a hiissannon;

Akoorixxaa dhooqanna* ise'a adddachchiisatixxe hula kaddaashsha assannon;

Okkoonna Gibtsee'n fuldemmaxxe barrashsha,

oosummati woddishshanni faarsitaan.

16 «Eettene barra, ‹Anke aro'oo› hitee hexxatto» malee'e,

Ta'anni edi'a, Ba'aali «Anke gootta» hite anee yexxabexxon. Hiyya'neen Duuchchi Woddik Gootti.

17 Aninna Ba'aalixxe fakkeka summa afoo isekenaa'n balleessannon;

ta'in edi'a summi insa'nek ganemaba'a.

18 Ettene barra ha'nooke bogi duuchchike biniinchuwi'a ci'uwwatee,

bogake'n lubbo affeexxe daduwwa'a

Kako insa'nea aagannon;

Kunniichchiwwi duuchchi nage'ik hedhaashsha

gabe, wolaantichchakanna bagedo

bogakenaa'n fuggussannon.

19 Ati anxe kaddattoshsha duuchchi woddi'a anxe are assedheenneni;

qullummatinna dhugaati,

jaalalatinna mararteti are anxe assedhannoni.

20 Aninna addatenshati are anxe assedhanoni;

atinna Duuchchi Woddika Gootta egendatton.

21 «Ettene barra ani hiissichcho uwwannon»

hiyya'neen Duuchchi Woddik Gootti.

«Iimuwwatenna hiissichcho uwwanon;

iimuwwatinna buttatee hiissichcho uutaan,

22 Bogikinna midhatee,

reefike woyinetike bulbuli'ana zayyitete hiissiicho uuwaan;

bogikinna Iyyizira'eeli'a hiissiicho uwwani.

23 Ani ifi'anni hiyye bogake'n isee kaasannon;

‹Eeyyemeebaake› hiyyee ye'ennakaara;

eeyyemeeke hiyye ye'annon;

‹Ha'noo anke ardabaan› hiyyeme ye'ememmakaara,

‹anke arda› hiyyannon;

Insa'nenna, ‹Ati Mageno anken› hinaan.»✝