1 Ani Isira'eelii fayyisanno wodda.

Efireemixxi cubbo,

Samaariyaaxxi fuggoxxi hujenna farri hite leellitaan.

Insa'ne dhara haasonaan;

moodhalshe minuwwa undee e'yitaani:

manjo mulqedhammak manni ora ora'nini saamaan.

2 Yaane kinn fuggoxxa huje insa'nexxa duuchcha:

insa'ne qalbeefantabaan;

Cubbo insa'nexxi insa'ne buqqeen:

elobaaxxi huje insa'nenna duuchchi wodda ani edo hexxeen.

3 «Moyanjo fuggoxxe huje insa'nexxinni,

akeekisanonna dhari insa'nekinn gammachinsaan.

4 Lixe fulde danfitammashsha

ra'isammak giira ha'ishammaba qico'n

Boosummate'n ha'iitammaxxe giirashsha

duuchiingi yabaabulleti bubeeken

5 Moyanji no'okixxe ayyaaniinxe barra'ni,

akeekisano woyinetixxa booka ha'wine machchoonne huffu hine;

isinna gacifataake manninni welti gudde.

6 Insa'nexxi qalbe boosixxe laangoshsha eebbiteexxen:

insa'ne xaqaroti isibaa shinqaan:

Hashsha duuchcha aare insa'nexxi gubbaan;

ha'yitammaxxe giirashsha gorsa tallissan.

7 Duuchchingi eebitexxe laangoshshaten:

insa'ne ifika galchalluwwa birre;

Moyanjuwwa insa'nekixxa duuchchanna mudde;

insa'ne giddi'n mittikinna anee ye'edheek hedhebaa.

8 «Efireemi gosa gosake ardinni welti makeme;

Efireemi wirri assinebaaxxe kebbonn.

9 Alagi hunna isixxa ite;

isi kinn qalbeefatebaan.

Umo isikinna arro'e:

isi kinn tennee qalbefatebaa.

10 Isira'eelike ardixxi holla cubbo iffeexxa leelishe;

tinn duuchcha kadde'naanni kinn:

Duuchchi Woddike Gootta Mageno insa'nekibaa hingebaani;

isoonna harsinebaan.

11 «Efireemik ardi sholla qicinni sobendammaxxee:

heduma affebaaxxe guugenjoshaten:

Insa'nenna mitte yanna Gibtsee yee'naan

wele yanna kinn Asooribaa wirr hinaan.

12 Insa'ne wodda marabe anxa insa'ne'a farri assannon

ci'uwwatishsha iimi'ni butti'a harkise

Insa'ne dirrisannon

fuggoxxe huje insa'nexxeenna insa'nee xixannon.

13 Ani edii'ni bayyante me'inemmaxxe insa'ne'a aannee!

ane'ni fuggoxxinni ke'nemmaxxee

Ba'ne insa'nen geltowwaal!

insa'ne ane'ni jallineemmaxxee

Anjironaa haseennen;

insa'ne kinn ane'ni dhara haasonna'nen.

14 Insa'ne mitte godobinni anibaa raarra'nebaan:

yaane kinn taqe ifixxe'ni he'ne oo'naan.

Midhatenna reefike woyinetike bulbuli'a bukki hinaan:

yaane kinn insa'ne anenaa'n udumi'a hingeen.

15 Ani insa'ne; jabeesseennen:

insa'ne kinn ane'ni fuggoxxinn ke'ne.

16 Darbineeba waalde weleba ibbammaxxe gabeshaten;

La'o affebaaxxe yaanebanna illee iima hinga darbineeba

Akeekisano insa'nexxi fuggoke haaso'a insa'nekixxee,

wolaantichake'n rennaan;

Tenne buutonni insa'nenna Gibtseeke boga'ni;

osso'lichchiinke kandaan.