1 «Amme, Duuchchi Woddike Goottibaa hingo;

Isi no'o enqe butuchcheen

yaane kinni isinni no'o xaasani;

Isi no'o madeeseeni

yaane kinni isinni no'o fayyisaan.

2 Lame barra uduma no'o lubbo no'oxxa ukaan

isi edo he'nannoshsha:

sakka barro no'o ke'issaan.

3 Duuchchi Woddika Gootta egenno;

adda egennannoshsha jabaanto

Soodimarike ifishsha

dhugaandinni leelani

Boga lashshi assamake mayetike xeenishsha;

haarsike xeenishshanna no'obaa dagaani» hine.

4 «Koo Efireemi; ate maa assano?

Koo Yihuda atee maa assano?

Jaalala ha'nooxxi ba'ammaxxe gorsixxe hurreshshanna

gorsike fixeensishshaten.

5 Tennexxee anxe wabeeko ha'noo kochchiseennen,

aninge afo'ike hiyyichchinni ha'noo shiyenneni:

murte anxinna banqotishsha ha'noo'ni balaqe;

6 Ani tolchi irra mararte

ciincatike tolchi irra:

Mageno ege'nate fi'lannon.✝

7 Insa'nenna Addaamishsha kako diingeen:

okkoo ani'a addatememmabaan.

8 Gela'aadi mundeti daafendeexxe

fuggaleeyyetike mannike qachchani.

9 Moodhalshe manjo miidhatee gaaddammashsha:

qeesoletiki ya'i ittanni assaan;

Insa'nenna Sekemike ora'ni manjo anga sa'naani

shookishaxxa yaanenna assina'neen.

10 Isira'eelike arda'ni diqachchiissaaxxa yaane uudennen;

okkoo Efireemi yabaabule;

Isra'eelikinna batto'e.

11 «Koo Yihudiinke arda!

ati'aanna mayetixxi yanna murende'een.

Aninna anka arda booji'otike boganaa'ni hiissenne wodda.»