Hoose'ikaa Raaga 12

1 Efireemi diidalotike allalisanjon,

barra duuchcha borotixxa diidallo hordofaan;

dharakanna xaqaro bira sa’issaan.

Asoorin weltinna weli aagaan;

ejersiinxa zayitenna Gibtsee’a ergaan.

2 Duuchchi Woddiki Gootti Yihudaa ku’la’neexxe kula hexxeen;

Ya’iqoobi me’inji isikishshann xixaan

Huje isixxishshanni hira isi’a uwwaan.

3 Gadaameesi giddo ifike dayyika tinxa abixxeen;

nophpheechchi uduma Mageniki welti wo’laancho abixxe.✝12:3 Dada. 25:26. ✝12:3 Dada. 32:24-26.

4 Iimike erganjinni welti wo’lancho abixxexxi isoo injifate:

isi edo elle alfatee oodhe isoo kadhate;

Isoonna Beeteli afe:

okkonna isinni welti haaso’e.

5 Isinna Lumoke Duuchchi Woddik Gootta Magenon; isi ege’nemmak summinna Duuchchi Woddike Gootan.

6 Tennexxee atike Mageniba’a higi:

jaalalatanna seeriinxa murte jabeessite heqedhi;

duuchchi wodda Mageno atike’n addatem.

Lebendeedexxa Murte

7 Daddalto seeribeloxxe kiilo’n gurgudhitaan;

moorakanna eetaan.

8 Efireemi, hiyya’ni ifi saadaa qici,

«Ani qabaataken;

dureessake kadeennen;

Tenne karra duuchcha afee’naa

mitte balleessanna cubbo ane’ni afenda’a» hiyye.

9 «Gibtseeke boganaa’ni ha’noo fulchenneki, Duuchchi Woddiki Gootti ha’nooki Magen anten:

Woggatike ha’nooke ayyaanixxa barra: asitinammashsha duuchcha,

Haaroba seemmati giissineeke ha’nooke fooquwwa’n ofoldinaashsha:

ha’no’o assannon.✝12:9 Lew. 23:42-43.

10 Wabeekkolete’ni haaso’eennen:

heddo waleella insa’ne’n leellisheennen;

insa’ne darree’n mammaasiki haaso’eenneni» hiyye.

11 Gele’adi fuggichchaken

ardikinna wayifulabaaken;

Jiboota Geligeelike booncho’ni tolchinata?

Insa’nek tolchimalch ko’emeeke fichcha’ni hexxeexxe

kinoxxe tuulosha kaddaan.

12 Ya’iqoobi Sooriyaa baaje;

Isira’eel are alfatee ergateme;

hira iseekeenna gedhebo alalle.✝12:12 Dada. 29:1-20.

13 Duuchchi Woddiki Gootti wabeekkichchi darree’ni

Isira’eelii Gibtsee’ni fulche;

Wabeekkichchi darree’ninna isoo abide.✝12:13 Fula. 12:50-51.

14 Efireemi kinn isoo fuggo mufachchiise:

Duuchchi Woddiki Gootti isikinna munde dunatixxa balleessa

iso’in wirri assaan: tuffateexxe tuffexxenna hasisaaka hira isi’a uwwaan.