1 «Isira'eeli oosummanni reefi oosumma,

hedhema wodda eeyyennen,

belto ankanna Gibtsee'n ye'ennen.✝

2 Anka arda Isira'eelii kinn ani hiisse ye'ennexxe qixxe'ni

irra caala anenaa'n bayyante:

Insa'nenna Ba'aali hiyyemaake mageni'a tolcha tolchine:

fakkuwwateenna hixaana gunbe.

3 Ani Efireemixxa anga abide,

daaddissenneki antemman:

Yaane kinn insa'nee fayyisennek ante kadennexxa

insa'ne qalbeefantebaan.

4 Marartetixxe wodaronn;

jaalalatike haachchabinni insa'ne akeekenne;

Qanbara gooba insa'nekenaa'ni hoyyenen:

heeshi hiyyennexxi insa'nee itisennen.

5 «Yoona insa'ne aadde aaga ginbeemmaxxee

Gibtsee'a hingabaata?

Asoorinna insa'nee galchabaata?

6 Qachcha insa'neke'n wolaantichchi ganaan;

hulatika danqarsanjuwwa insa'neka woxaan:

insa'neke fuggoke yaadixxenna insa'nee biraan.

7 Anki ardi anenaa'n ille iima higo'a eeyye;

Lumokibaa raarroolenna

hoone orininna insa'nee kubbisabaan.

8 «Koo Efireem, hitta atee waalannota?

Tee Isira'eel hitta atee sa'isse uwwannota?

Hittata Adaamashsha atee uudannota?

Hitta Tseboyisha atee assannota?

Godobi ank raafeme;

ati'a afeennexxi mararte lumoxxen.✝

9 Bubbaaxxa mufe anxa idagabe'non:

langaxxa Efireemii balleessabe'no;

Ani ha'noxxe oddo'ni hedhenneki woyyichcha Mageno malee:

manjokebaan

mufeti ha'noon dagabe'non.

10 Insa'nenna Duuchchi Woddika Gootta hordonfaan;

Isinna neeqiinsha harqaan

Isi harqa woddaa

oose isixxinna culphisa'n dhidhimakenaa'n daggaan.

11 Insa'nenna Ci'atishsha Gibtsee'n,

guugenjotishsha Asoori'ni

phirri hina'ni dangaan;

Aninna insa'nee mine insa'nenge'n hedhisannon»

hiyya'neeni Duuchchi Woddiki Gootti.

12 Efireemi dhariki,

Isira'eeliki ardinna xaqaroti anee buqe,

Yihuda Magenokee ajajemabaake;

addatemeeka woyyichchanna ke'aaken.