Hoose'ikaa Raaga 8

Isira’eelii Hobonbalte Haa’mitaan

1 «Malagata afooke’ni uggee

Ardi anki aagemmaxxa kako diigemmaxxee

Anke seera’inna jallemmaxxee,

naaphi sinbiriinsha Duuchchi Woddike Goottike mini hana hedheen.

2 Isira’eelina, ‹Ee Mageno no’oke no’o atee egeneennen›

hina’ni anibaa raarraan.

3 Yaane kinn Isira’eel eloxxa yaane tuffatte;

naaphikinna insa’ne’e shorraan.

4 Insa’nenna anke seeri belo moyanjuwwa moyisiinsen:

aneenna lanqebaangi akeekisano ifi’a fi’line:

Birretike sibilji insa’nekininna worqeti ifixxe ba’ne

fakkuwwa ifi’ani giise’ne.

5 Tee Semaariya, jabbetixxa fakke atixxa fugussi:

mufe anxinna insa’ne’ni ha’yiteen:

Insa’nenna haani qici’a ca’a hiyya gonpha?

6 Tinninna Isira’eeli’ni kadde!

Anga ifixxenn hujendeexxi tinni jabbe magenuwwakebaan;

Iiti Samaariyaaxxi jabbe;

enqende bullootaan.

7 «Insa’nenna diidallo ronkaan

hobonbaltetanna haa’minaani

Dinne rodde ra’isitabaa;

isenna bulle affebaa;

Gumma afoolenna

isee itaaki alagake.

8 Isira’eel liqiinsedeeni

gosa gosake ardi giddonna

la’o afebaake miyishsha kaddeen.

9 Insa’nenna qofitinn hedhammake diidike harrichchishsha

Asoori’a me’ineen;

Efireemi jaaluwwake ifi gurgudhite.

10 Yaane kinn insa’ne gosa gosatike ardi giddo ifi gurgudhinnolenna;

ani ta’a insa’nee bukki assannon;

Insa’nenna jabake moyanjixxe miiccema’ni;

heeno’mina’ni me’inaan.

11 «Efireemi cubbotixxe bidhdhatika heddo tolchimalcho giissedhoolenna;

kunninna cubbo hujatike tolchimalcho kade.

12 Anke seeri giddo hexxeexxa heddo yaanuwwa insa’ne’a borreessennen;

insa’ne kinn egennebaaxxe yaaneshsha assine.

13 Insa’ne ani’a hasisaaka tolcha shiqinsaan;

maalakanna indaan;

Duuchchi Woddiki Gootti kinn insa’ne’ni gammadebaan;

Tennexxee isi fuggo insa’nexxa huje qaabbattaan;

cubbo insa’nexxenna xixaan;

insa’nenna Gibtsee’a hingaan.

14 Isira’eeliki ardi insa’ne dademanga deene;

mootetika minuwwanna ijaarre;

Yihudaka ardinna heddo kinjiinke dalla’ika qachchuwwa ijaare

Ani kinn qachchuwwa insa’neke’n giira worannon;

giiratinna kolluwwa insa’nexxanna itta» hiyye.