1 «Ha'noo qeesole: tennee laqqe!

Ha'noo Isira'eelik arda qaabbatte!

Koo moyanjiinke mini hado laqqe!

Tinni murte ha'noo'ni murendeen:

Ha'noonna Mitsiphaa'ni fonxoro:

Taaboori'ninna farri assineexxe marabe kaddineen.

2 Fuggaleeyye lubbo balleessate'n jaba qicin kexxeen:

ani insa'nee duuchchiinga xixannon.

3 Ani Efireemixxee duuchchiinxa ege'neennen:

Isira'eelinna ani edii'n sho'ondexxebaan;

Efireem, ta'a ati yabaabuldeetten:

Isira'eelinna battootteen.

4 «Insa'ne hunjeexxi huje: Mageni insa'nekibaa hingaashsha

eetii insa'ne'a uwwabaan;

Yabaabulletik hafuuri qalbe insa'nexxe'ni hedheen:

insa'nenna Duuchchi Woddika Gootta egennebaan.

5 Isra'eelike ardixxi holla cubbo insa'nexxa leelishshe:

Isira'eelitonna Efireemi; ifixxe cubbonini guggufantaan:

Yihudanna kinn insa'nenni weltin guggufataan.

6 Duuchchi Woddika Gootta harisate:

gedhebinkanna re'etika ittani ifika lalo olfinee me'inaa wodda:

Isi insa'nenaa'n gargarti higemaaxxee:

isoo afa dandeennabaan.

7 Insa'nenna Duuchchi Woddike Gootti'a addatemmebaan:

insa'ne baanuwwa i'linemmaxxee:

Tennexxee haaroxxe baate fulatika ayyaana ulfeessa

insa'neenna fichcha insa'neka balleessaan.

8 Gibi'a giddo malagata,

Raamana xurunba ufuufee:

Beeti Awweeni xexxe'achchisatika haafuura laqisse:

‹Koo Biniyaami: ate'ni dange› hiyye.

9 Xixichchiinxe barra'ni;

Efireemiki bogi urme gataan:

Isira'eelixxe gosa gosa giddo:

dhugaandinni kaddaaxxa aninni lallabannon.

10 Yihudiinxxi akeekisanjo

kakkichiinka kinjo goshammake mannishshaten:

Lola'iinsha,

mufe anxa insa'ne'ni hana dunannon.

11 Fakkuwwa hordofa eeyyemmaxxee

Efireemi miicemeen;

dhugaatixxe murtenna miidhemeeka kada.

12 Ani Efireemi'a biletishsha;

Yihudiinke ardi'anna daamulake kadennen.

13 Efireemi elagonphe ifixxa:

Yihudanna mada ifixxa uude wodda:

Efireemi Asoori'a me'e;

garigarsa laqedhate lumoke moyanjibaa manjo ergedhe:

Isi kinn ha'noo anjiro'anna

mada ha'nooxxa fayyiso'a dande'abaani.

14 Ani Efireemi'a neenqiinshsha

Yihudaanna oosichchi neenqishsha kadanaxxee,

Insa'ne enqe butuchche me'annoni:

insa'ne bute adhdhannoni: ayyinna insa'ne anjira dande'abaan.

15 Insa'nenna balleessinenn hina qioco'n,

anke boonchibaa ille iima higaannon;

insa'nenna anee harsinaan:

Rakko insa'nexxee'ninna jabeessineexxi

ane'e harsinaan» hiyye.