Hoose'ikaa Raaga 13

Mageniinxi Mufe Isira’eelike Arda’ni

1 Efireem haaso’a wodda manni culphise

isi Isira’eeli’ni ulfeessemeekemman:

yaane kinn Ba’aali hinaaka mageno mageneefate cubbo hujemmaxxe reye.

2 Ta’anna cubbo huja bira sa’ne;

birreti sibiljo baqinse ifi’aanni miseechchixxa fakke huccine:

Angatixxe ogenni hujendeexxa fakkuwwa giisse’ne:

kunniichchi duuchchi manjiinxe angatixxe hujen.

Konne mannixxee hiyyendee qici:

«Insa’ne manjo tolchine;

jabbetixxa fakkuwanna sunqe’naan» hineen.

3 Tennexxee soodimariinxe hurreshsha,

ikki woddi ba’ammake gorsike fixeessishsha,

ooddetenaa’ni diidallo filtammake huurishsha:

masikootetenaa’ni fuldamaxxe wiliilleshsha kandaan.

4 «Ani kinn Gibtseeke boganaa’ni atee fulcheenneke,

Duuchchi Woddike Gootta atike Magenon:

Ane malee wele Mageno egendebexxon:

ane malee weli anjiralli hedhebaan.

5 Qiilla Gammoojje’ni,

bagoke boga’ni ani atee heqqennen.

6 Ani insa’nee itisenechchi uduma goddineen:

goddineexxi hollate’ni ke’ne:

tennexxee anee deene.✝13:6 Fula. 8:11-17.

7 Tennexxee ani neeqinsha insa’ne’ni dagannon,

qeedhanchiishsha orake’ni insa’nee gaadannon.

8 Beltanna hundii’ni a’lendemmake Dibite hiyyemammake biniinchishsha

insa’ne ganannon; ninnifannon

Neeqinsha insa’nee liqinsannon

biniinchuwwikinna insa’nee yeyyekannon.

9 «Koo Isira’eelike arda

anee gargarsanjo atike’n kexxetaxxee baxxaatton.

10 Moyanjokanna akeekisano ani’a uwwi;

hite laqqetteshshann;

Atee anjiro’a moyanji habata hedhe?

atike qachchuwwa duuchcha’ni hedheeki galchalluwwi habata hedhe?✝13:10 1 Sam. 8:5-6.

11 Ani mufatee moyanjo ati’a uwweennen:

aare anxenni isoo hoyyennen.✝13:11 1 Sam. 10:17-24; 15:26.

12 Efireemixxi balleesa tulendeen;

cubbo isixxinna maxaafake’ni borreessendeen.

13 Ciniinitote’n hexxeexxi manjichchoshsha wixxiri hiyyaaxxe yanna iso’n daggaan:

isi kinni beekuma afebaake belton:

Ilemaaxxi yanna geltaa wodda,

amatike gadaameessanaa’ni fulo’a

eeyyabaaken.

14 «Hirreessiinxe hunnanna ani ha’noo wodannon:

reyotenaa’ninna insa’nee anjirannon:

Tee reyo, bala atixxi haba hexxeta?

Koo mooggo balleessa atixxi haba hexxeta?

«Ta’inni edi’a ani isi’a mararabe’no.✝13:14 1 Qor. 15:55.

15 Dayyuwwi isikixxe oddo’ni duroomoolenna midde.

Borotixxi diidallo qiilla gammoojjenaa’ni ganda’ni,

Duuchchi Woddike Goottinaa’n daggaan:

Muumetinna xoxxaan:

wode’iinxi balenna baggaan.

Isixxi karra duuchcha

masseccatike minenaa’n booji’enda.

16 Mageno ifike’n jallineemmaxxee: Samaariyaaki ardi duuchchi balleessa ifixxa adhdhiinaan:

wolaantichchiki mundaan

Oose insa’nexxinna buttinake’ni cancaqendaan:

insa’nexxe siila’witeexxe melaalleki godobinna daremaan.»