1 Maanɔɠɔ ɠa zooi naa ʋɛ, ʋɛ aniiti koʋe tugi ɠulazu ná,

Etiyopi ɗɛ wolai ʋoluʋɛ,

2 ɗɛi è keelaiti teʋesu kpoloɗɛi ɠa, ti ga è-ɠaazuʋɛ,

ti ɗa ziɛ ziɛiti ga ɓatoi zu kpɛtɛai ga tɛmui!

Keelaiti ti zuvilaai,

à li ziiti pɔ bɛ, ti ɠoozaai, ti volozu,

wo li nuɓusɛiti pɔ bɛ, niiti duai wosu ti ʋa eteai zu ná pɛ,

zii naa zobo golai bɛ, é ɠɔɠɔlo ti pɛ ma,

nii ziɛ wolaiti ti ná-zooi zaamaʋɛ.

3 Wo pɛ, etea ʋeaiti,

wɔi wo zeini eteai zu,

wa wɛlɛ poogi ʋa,

é losu gizeiti maazu,

siɛgi zu puʋugi vɛɛzu la,

wa woilo ma ga pagɔ.

4 Mazɔlɔɔ Ɠɔoɠɔ GALAGI wooi ɠaa mà:

«Nà zeizu kpɛ, gè ɗa wɛlɛ, gè yɛ sèizuʋɛ,

eɠɛ diegi é foloi ma wozakalagi zu, é nu ɠaazuɓɔizu,

eɠɛ tonaɓiingi kpɛtɛai ga nɔɗagi

molo leʋe liegi zu.»

5 Aisa teʋe foloi, siɛgi zu pua vai ɓesu la,

siɛgi zu ma ʋua ɠɛɛzu la ga ma ɠɔpɔgi, naa ɓɔi,

toɠa ma ɓekegiti teʋe ba ga kpeleɠai,

é kula ná, é ma ɓekegiti gaaleʋe.

6 Ta ɠɛlɛ ti pɛ ba ʋɔɔma,

ti ɠɛ ga gize zu wɔniiti daamianigi, ta dɔɓɔ zuaiti.

Ɗuaiti ta ti-laɠagiti to ti zu foɠoi,

dɔɓɔ zuaiti pɛ ta ʋa, ti samai ɠɛ ná.

7 Naama volo ná, vebɛaniiti ta ʋa Ɠɔoɠɔ GALAGI ʋɔ, Fai-Pɛ-Maliɠii,

naama nuɓusɛiti zea, ti ɠoozaai, ti volozu,

nuɓusɛi naati duai wosu ti ʋa eteai zu ná pɛ,

zii naa zobo golai bɛ, é ɠɔɠɔlo ti pɛ ma,

nii ziɛ wolaiti ti ná-zooi zaamaʋɛ.

Ta ʋa ga vebɛanii naati Siyɔn gizei ma,

ʋɛ Ɠɔoɠɔ GALAGI, Fai-Pɛ-Maliɠii zeini ná.