Ezayi 56

Zeezeibui wo fai ga zii pɛ

1 Ɠɔoɠɔ GALAGI wooi ɠaa:

«À sɔledai makɛ, wo telebodai ɠɛ,

mazɔlɔɔ kizo fai gè ʋaazu la maaɓuɠaa, toɠa na ʋa,

nà-telebodai ɠana ɠula kɛlɛma.

2 Undaanɛ nu ɠa ga nui naa, é naa ɠɛɛzu,

zɔi a ɠaaɓa naa ma, undaa ɠa nɛ,

é dooɠo foloi maaɲɛɛ, é mina maaɲɛɛi ʋu ma,

é ɠaaɓa, é mina yeelɔ faa ɲɔu nɔpɛ su.»

3 Kɛni wɛɛin giliai Ɠɔoɠɔ GALAGI ʋa, é mina ɠɛ ma:

«Ɠɔoɠɔ GALAGI ɠa ʋaazu kpèteʋezu ná-nuɓusɛiti ba ti!»

Zunu zɛɛɠagai mina ɠɛ ma:

«Nà ga gulu yaɠai nɔ!»

4 Mazɔlɔɔ Ɠɔoɠɔ GALAGI wooi ɠaa:

«Zunu zɛɛɠagaiti ti nà-dooɠo foloiti maaɲɛɛzu,

ti yiimazeɠe ga nii nɛai bɛ̀,

ti ziɛ ga nà-minazeɠegi,

5 Nà kizɛsu anii ta daaseigi ɓɛtɛ ti ʋɛ,

sèi ʋɛlɛi wu ta nà-siɠigiti ma,

nii fizɔgai doun zunuiti ba ta doun anzanuiti,

gè daasei pɛɛ ti ʋa, a yɛ ti ʋa eyɛsu ɠɔ,

ani nɔpɛ ge la seɠea ti ʋa.

6 Niiti ti ga wɛɛinti ta ɠili Ɠɔoɠɔ GALAGI ʋa,

ga ti botii ɠɛ bɛ, ti nɛɛ ʋɛ, ti ɠɛ ga ná-botiɠɛ nuiti,

ti dooɠo foloi maaɲɛɛ, ti la maaɲɛɛi ʋua ma,

ti ɠili nà-minazeɠegi ʋa,

7 nà ʋa ga tiye nà-gize ɲadegai ma,

nà ti ɠoozunɛ GALA sei ʋɛlɛi wu, ʋɛ ti falizu ná,

nà yeezei gala zalaɠaiti ta zalaɠa ɠiligiti bu

ta ɠɛ ti ɠulazu nà-zalaɠa ɠulazuʋɛ.

Mazɔlɔɔ nà-pɛlɛi ɠa loli ga

GALA fali ʋɛlɛi ziiti pɛ bɛ.»

8 Zɔi é Izilayɛle nuiti gaalɛɛni ba, niiti ti vazani,

Maliɠii Ɠɔoɠɔ GALAGI wooi ɠaa:

«Gè ti ɠaalɛɛʋɛ na ba,

nà taɠiligaa ɠaalɛ ba mɔnɔ.»

Zelii lo fai kundiɠi ɲɔiti ma ta kɔɔɠɔ gani kɔɔ nuiti

9 Wo pɛ dɔɓɔ zuaiti,

à ʋa, wo fɛtii ɠula,

wo pɛ dɔɓɔzu zuaiti!

10 Izilayɛle makɛ nuiti ta ga gaazuɠole nuiti,

ti la ɠidaa faa wu.

Ta ga gilɛ mɔkɔyɔgiti, ti la zooga ti ʋa ɓozɔ.

Segi nɔ ɠa ti daawu, ti laani, ti zakpamaale,

ɲiimɛnii nɛɛʋɛ ti ʋɛ.

11 Ta ga gilɛiti ti ɠulukpugai,

ani la kula ɠɛa ti la pɛ.

Tiya ɠa ti ga baala makɛ nuiti,

ti la zooga ti ʋa ɠida faa wu,

ti ɠilagilagi ɠa ziɛzu ga yiima ʋelei nɔ,

ti ɠilagilagi ɠa ná-tɔnɔgi nɔ ʋolu.

12 Ti ɠɛ ma: «À ʋa na dɔɔi ɠaiziɛzu,

ada dɔɔ ɓaagiti kpɔlezu, é de zo!

Zenɔ ɠana da kɛ la lina,

bɔɔlɔa ɠa dɛ ná da kpɔle!»