Ezayi 47

Ɓaɓilɔne ɠoloɠolo fai

1 «Yei, zei fufiligi zu, Ɓaɓilɔne nuɓusɛi,

zei zooi ma, mazɔlɔɔ è zeɠea masa kpɔkpɔgi ɠa,

Ɓaɓilɔne nuiti ta-nuɓusɛi,

mazɔlɔɔ è la mɔ loliga ga ‹pagai› ta ‹zaalamai›.

2 Ɓulu vukɔ ɠɔtu felegɔiti seɠe,

è ɓulu vukɔi ɓɛtɛ,

bɔɔlɔgi ɠula ɠaazu,

ɗa-lookɔbai laaʋɛ lɛ ba,

seɠei lɛ ba, é zeɠe è-ɠɔɠɔiti ma,

è ɓudɛ ziɛ wolai maazu.

3 Naazu è ɠabei ɠa ɠaazu folo wolai ɠa,

è-unfesuʋɛ ɠa ɠula kɛlɛma.

Nà nà-potokulai wosu,

nu nɔpɛ ge pele leʋega tùɠɔ.»

4 Ade Unmɔɔ Nui laasei ka ga Ɠɔoɠɔ GALAGI, Fai-Pɛ-Maliɠii,

Izilayɛle ná-GALA Ɲadegai.

5 «Zei gaalɛii zu, lɔ kpidii zu,

Ɓaɓilɔne nuiti ta-nuɓusɛi,

mazɔlɔɔ è la mɔ loliga ga anzanu masagi masadaiti unda.

6 Zìiɠaawanani nà-nuɓusɛiti ma,

gè zèaɠɔligiti kɔzɔni,

gè ti lɔɔni è yeezu,

è la ɠɛni ti maawɔinɠaani.

È ɗa-unbawului ɠizini kɛwola wɔlɔi ma.

7 È ɠɛni ɠɛɛzu ma:

‹Nà yɛsu anzanu masadai zu eyɛsu ɠɔ.›

È la ɠidaani ti pɛ bu.

È la ɠisiɛni su, ʋelei naa ɓesu da.

8 Deɠɛmu woilo nii ma, ɗa ʋe, ziimaɠɛɛ nui,

è zeini kitogi zu,

è ɗa ɠɛ ɓɔɠɔ ma è-yiimaʋɛ:

‹Nà ɠa gè ɓɔɠɔ ɠaazu!

Gè la ɠɛa ga poanza eyɛsu pɛ,

gè la ʋalaga dòinti ma pɛ!›

9 Niima nimiza vaa felegɔiti

ta zeeli è ma ʋɔɔma folo ɠila nɔ,

è ʋala è-lointi ma, è ɠɛ ga poanzai.

Naati ta vɔɔɠu è ʋa ga ɲɔuɗa,

anɛɛ ɗa-zoɠolai pɛ su ta ɗa-ʋotedai ma zobogi pɛ, è kɛɛzu.

10 È ɠigi loni ɗa-zuɲɔulai ʋa,

è ɗa ɠɛ ma: ‹Nu nɔpɛ ge la kàazu!›

Kɛlɛ ɗa-ɠimalai ta ɗa-ɠeleɠelegiti ka ɗɔungi zeɠea ma.

È ɠɛni bosu è-yiimaʋɛ ga:

‹Nà ɠa gè ɓɔɠɔ ɠaazu!›

11 Maanɔɠɔi ɠa zei è ma,

nii è la zooga è ʋa seɠe ɓɔɠɔ ʋa,

nimizai ɠa lɔ è ɠɔba,

nii è la zooga è ʋa ɠula su,

faaɓalakalagi zeeli è ma ga kulafilibai,

è-ɠi ge la ba.

12 «Ɠaaɓa deɠɛmu ɗa-zoɠo vaiti ma,

ta ɗa-ʋote faiti è ti ɠɛɛzu.

È ɓɔlɔni naati kala fai zu è-ma loungo yeei zɔli,

kitogi zu ga ɗa ʋaazu tɔnɔ sɔlɔɔsu su,

è ɠɛ ga nui gola ɠaazumaayikiai.

13 È ɓɔɠɔ ɓɔlɔni ga ungaiziɛ nuiti gaazaɠa fai,

ti ʋaana, ti è ɠizo,

tɛi ti geeɠɔlɔgi zeizeizu su,

ti wɛlɛ somideɠaiti ba ta alugi,

alu to daa ɠilagila ti ɗa faiti bo,

ti ʋaazu ɠɛɛzu ga ɗe.

14 «Wɛlɛ miná, ti pɛ ti ɠɛa

eɠɛ daazaɠagi abui galazu.

Ti la zooga pɛ ti ʋa ti-yɛnvui ɠizo abuzogi ma,

é la ga daaɠoli wo abu go nɔ,

tutu zu abui nɔ nu a zei koba!

15 Wɛlɛna ti ɠɛʋelei ʋa, niiti è ɠɛni ɓɔlɔzu ti ʋɛ,

è ʋoluzeini ti ʋa, è-ma loungo yeei zɔli.

Ti ɠɛa ga teʋeteʋe nuiti,

tanɔpɛ ge la zooga é ʋa è ɠizo!»