Isaías 29

Zeluzalɛme zei vai kɛlɛ su ta ná-kizo fai

1 Maanɔɠɔi ɠa Aliyɛle ʋɛ,

Zeluzalɛme taa wolai Davide seiɗai kɛlɛ su!

É ɠaaɓa ʋa é fɛti voloiti so, kona-o-kona,

2 nà zeizu taa wolai tɛi ma, Maliɠii ɠɛ naa.

Kpeei ta kidaaʋiligiti ka ta ɠɛ è ya,

ɗa ɠɛ bɛ̀ niina nɔ ga zalaɠa ɠula laai,

ʋɛ zalaɠaiti ti ɠalazu ná.

3 Nà nà-kɔɔlaaɠai ʋuuzu,

gè è zei la kɛlɛ su,

gè è maalati ga kɔɔɠɔ zɔɔlaiti,

gè siɠigi lo, gè tati è ma.

4 Ɗa loozu bu,

è-wooi ɗa ɠula zooi ɓoma ʋelei,

è-wooi lɔi gola fufiligi zu,

è-wooi ma ɠaayei gola, mɛni da ɓa,

é ɗa ɠula fufiligi zu eɠɛ foe wooi.

5 È zili nu ʋɛbɛiti ta ɠɛ eɠɛ fufiligi,

nu ʋaa nu ʋɛbɛiti ta ɠɛ eɠɛ moloɓoloi é ɠoʋesu.

Naa ɠa ɠɛ gaamago nɔ, naa zuvilɛ.

6 Ɠɔoɠɔ GALAGI, Fai-Pɛ-Maliɠii ɠa è maalobo,

tona kpunɛ tugi zu, ta zou ɓaliiti, ta koozuʋili faa wolaiti,

fiilɛ wolai ta tɔngɔlɔ fiilɛi,

é ɓɔ abui ʋa, é adaʋɛti galazu, naama zogi.

7 Eɠɛʋelei a ɗa ɠɛ la ga segi,

ɲiimɛnii zuɠula kɛlɛmai,

pele ɠana a ɠɛ la ga zii mɔinmɔingi naati

niiti ti ɠɛni kɔɔi ʋɛɛzu Aliyɛle ʋa,

ti ɠɛni kɔɔi ɠɔɔzu daalɔɠɔma,

tɔ ɓɔɠɔi ta ná-siɠigiti daalɔɠɔma,

ti ɗa ti maalati, ti zei ti ma.

8 Toɠa ɠɛ eɠɛ nui pului ma, é ze é ɗa laami,

kɛlɛ siɛgi zu é wuunsu da, koozu ɲakai ɠɛ de,

ɓaa eɠɛ nui kpɔɔle wɔin ma, é ze é ɗa ɓɔɔle,

kɛlɛ siɛgi zu é wuunsu da,

toɠa ɓɔɠɔ ʋɛtɛsu ga gola ɓɔlɔʋɛ, kɔdaʋɛ vɔ kpaan,

ʋele ɠana a ɠɛɛ la ga zii naati ma ʋɛbɛi,

niiti ti kɔɔi ɠɔɔzu Siyɔn ɠizei laalɔɠɔma.

Wozaɠaa nuiti ti ɠaazuɠoleai, dɔɔi ti zogai

9 À lua, wo laavɔ!

À ɠaazu ʋɛɛ ma, wo yɛ gaazuɠolei zu!

À ɠɛ ga dɔɔzo nuiti, kɛlɛ dɔɔzo taade,

wo ɗa ʋoola pelei ʋa,

kɛlɛ é la ga wo ʋa ɓɔɔle gola.

10 Mazɔlɔɔ Ɠɔoɠɔ GALAGI gaazuʋɛɛ ma yɛnvui yeiɗa wo ma,

é wo-ɠaazuʋɛti pɛa ma, wa ya GALA goo wo nuiti,

é bɔɔlɔgi lɔa wo ɠaazu, wozaɠaa nuiti.

11 Kulakɛlɛmai pɛ ge ɠɛa wo ʋɛ eɠɛ wooiti ti zɛʋɛai sɛʋɛi zu daaziɛ ga kedoi. À so nui ta ya, zɔi soogai sɛʋɛi ɠalasu, wo ɠɛ ma: «So dɛɛ ma, è nii ɠala,» toɠa wo wooɠaaʋote ga: «Gè la zooga gè ʋa sɛʋɛi nii ɠala, tɔɔzei daaziɛʋɛ.» 12 À fe nui ta ya, é la zooni sɛʋɛ ɠalasu, wo ɠɛ ma: «So dɛɛ ma, è nii ɠala,» toɠa wo wooɠaaʋote ga: «Nà ya, gè la zooni sɛʋɛ ɠalasu.»

13 Maliɠii ɠɛni ma mɔnɔ:

«Niima nuɓusɛiti ta maaɓuɠazu bà ga ti-laawooi nɔ,

ta dɛ̀bizu ga ti-lakɔlɔgiti nɔ,

kɛlɛ ti-yiimaʋɛ wola maaɠoozaʋɛ bà.

Unfemai ti ɠɛɛzu, ta bosu ga ze,

naa ɠa nɔ ga faa tanɔ nii nuiti ti dɛɛni ga tiye.

14 Naa ɠa é ba, nà yɛsu niima nuɓusɛiti daavɔɔzu ga laavɔɔ vaiti

ɠima nuiti ta-ɠimalai ɠa ɠoloɠolo,

keleɠele nuiti ta ʋala ta-ɠeleɠelegi ma.»

Faiti seɠe ʋelei ɠɛʋele ma

15 Nimizai ɠa naati tuɠɔ,

zɔiti ti ɠoozu vai lɔɔɠuzu Ɠɔoɠɔ GALAGI ʋa,

ti ta-vaazeikpasuiti kɛɛzu dɔɔɠuzu kpidii zu,

ti ɗa ɠɛ ma: «Ɓɛ ɠa a zoo é gi ɠa?

Ɓɛ ɠa é gi ʋɛtɛsu?»

16 Wa-yaava vai nii ɠa ga ma ɓɛgele!

Pɔlɔ liɠi lo nui ta pɔlɔi ti ɠɛ ga ani ɠila,

anii é ɓɛtɛzu, naa ɠa ɓɔɛ nɛi é lo kpɛtɛ nui ʋa ga:

«Tɔ laade, é ʋa kpɛ̀tɛ»?

Pɔlɔ liɠii ɠa zoo nɛi ɓɔɛzu ɠisu é lo kpɛtɛ nui ʋa ga:

«Ɠi ge la ma»?

17 Wo la kwɛni ɓaa ga ná tago nɔ ʋɛ ná,

Liɓan lɔɓɔi ɠɛ ga gulu ɓelei,

gulu ɓelei ɠɛ ga dɔɓɔi.

18 Naama volo ná, goizuɓɔlɔ nuiti ta naa mɛni

nii bogai sɛʋɛi zu,

gaazuɠole nuiti ta ɠula kpidii zu ta gaazuɠole ɓidii,

ti-ɠaazuʋɛ wozaɠa.

19 Ɠɔoɠɔ GALAGI zaalai zu,

ɓɔɠɔmaayei nuiti ta yɛ nɔ ɠoozunɛɛzu ɠɔ.

Bala nu wolaiti ti nuɓusɛiti saama,

ta vuka ga koozunɛɛi

Izilayɛle ná-GALA Ɲadegai zaɓui zu.

20 Tooma nuiti pɛ ta-volo ɠaaɓelagi ɠana,

ɲɛɛɠulasu nua ti la mɔ ɠɛa ná.

Ta naati ta-vai ɠaaɓela,

niiti ti wɔinɗai ga ti ɗa faa ɲɔi ɠɛ,

21 ti ɗa nuiti peelala ga laawooi tukpɔɠaaleʋezuʋɛ,

ti ɗa balii la tukpɔɠaaleʋe nuiti tuɠɔ tukpɔɠaaleʋezuʋɛti,

ti ɗa telebo nuiti undaaʋili wafuun.

22 Naa ɠa é ba, Ɠɔoɠɔ GALAGI wooi ɠaa,

Zakɔɓe ta mavofodaiti ta-ƓALAGI,

Abalaame unmɔɔ nui:

«Zakɔɓe ná-nuɓusɛiti ti la mɔ unfega pɛ,

ti-ɠaazuɠɛzɛ ge la mɔ ɓɔiɗa su pɛ.

23 Siɛgi zu tiya ɓɔɠɔi ɓaa ti-lointi ti naati pɛ kaazu la,

nii nà kɛ ti zaama,

ta kwɛɛ ga nà ga GALAGI,

Zakɔɓe ná-GALA Ɲadegai,

ta unfe mà, ti lua ga ti mina ènɛkɛtala vaa ɠɛ,

nà, Izilayɛle ná-GALAGI.

24 Zɔiti ti ɠɛa na ʋalani ɠi pagɔi ma,

ta ɠimalai maaɠɔli,

zɔiti ti maaɠaalii ɠɛɛzu yeenɔpɛ,

ta va bu, nu ti ɠala.»