1 Galagi Ɓɛle loa bu, galagi Neɓo zuɓiliga.

Ma kɔɔɠɔ ganigiti ti vea suaiti zea,

ta toganiiti ti ɗa ɠasɔ ti wu.

Kɔɔɠɔ ganigi tɛiti wo ɠɛni ti zeɠezu,

tiya ɠa na ti ɠɛa ga kasɔi suaiti bɛ, ti ɓɔlɔai.

2 Galagi naati ti ɓiliga,

ti loa bu ʋɔɔma,

ti la zooni ti ʋa ti ma niinigiti kizo,

tiya ɓɔɠɔi ta ga li duɔlai zu.

3 «À woilo gòoi ma, Izilayɛle nuiti,

Zakɔɓe ná-nuɓusɛi mɔtaiti,

wɔi wo yɛgai wo-lee ɠoozu, gè ɗa wo maavaiti kɛ,

aisa wo ʋa zɔlɔɔ, gè wo zeɠe ga ɠasɔ.

4 Nà yɛ ɠɛʋele ma wo ʋɛ,

eyɛsu wo wɔlɔzaɠa siɛgi zu,

nà wo-maavai ɠɛ eyɛsu wɔundeɠai ɠole.

Nà ɠa gè wo-maavaiti kɛɛni, nà ziɛ wo wu,

ungo, nà wo-maavaiti kɛ, gè wo unmɔɔ.

5 «Gá ɓɛ ɠa wa gi la ɓɔɠɔ ma, gi ʋa ɠɛ tie?

Ɓɛ ɠa wo ɠɛɛzu ga ɠɛɠalai ga tɔun?

Ɓɛ ɠa wa pokɔɠɔ mà, gi ʋa ɠɛ tie?

6 Nui tanigaa ta ta-ɓɔlɔi zuwosu,

ti walii ta zanugi ɠɔɠɔ kiloi ɠa,

ti kpɛtɛ nui zala,

ga é kɛ ti ʋɛ ga galagi,

ti ɗa fali, ti ɗa nɔkɔ bu.

7 Ta ta-ɠalagi zeɠezu, ti da ɠɔma.

Ʋɛ ta da ná, miná é yɛsu ná.

É la ɲiikpiga daazuʋɛ.

Ni nu a wooɠulana ma,

é la gooɠaaʋote fea,

é la nu ɠizoga faaɓaagi ma.»

8 «À ɠitoo naa zu, wo zɛbɛzeɠe ʋolu,

wɔi wo kololalai ɠɛɛni,

à nimiza wo-yiimaʋɛ,

wo zeɠe niima faiti polu!

9 À ɠitoo faa wɔlɔma mɔungiti su,

mazɔlɔɔ nà ga GALA,

taɠili ge la ná nɔ̀un polu.

Nà ga GALA, taɠili nɔpɛ ge la ɠulani ga ze.

10 Nà ɗa bo tɔɔzeizuʋɛ nɔ,

nii é ʋaazu ɠɛɛzu ma luɠɔi zu,

naa yɛ poun, é la dɛ ɠɛɛni.

Nà ɠa gè bosu, nà-faazeikpasui laa ɠa zeeli,

ungo, nà zìima vai pɛ kɛ.

11 Wɔnii é zɔiti miizu, nà tolisu,

é zeɠe folo ɠulazu ʋelei,

toɠa ga zunui é zìima vaiti daazeelizu,

gè toli zooi zu, ʋɛ ná maaɠoozaai.

Nii gè boni, nà naa ɠɛ,

nii gè deveni, nà naa ɠɛ.

12 À woilo gòoi ma,

nuiti ti la faa ɠaaɠaa fala,

wɔi wo maaɠoozaai telebodai ʋa.

13 Su la mɔ ɠoozazu, gè ʋa gè tukpɔi ɠaaleʋe,

nágo ʋe na, gè la mɔ lɛbisu,

nà ɓɔɠɔi ɠa gè ʋaazu ga unmɔɔ fai Siyɔn ʋɔ,

gè nà-lɛbiyai ve Izilayɛle ya.»