ዞረነ ሳሮ
1 ታ ህንተኮ ብሽን ሀይስ ሄን። አይ ሞቶይካ ናምኡ ዎይኮ ሄ ማርካን ምኔስ።13:1 ዛረ 17:6፤ 19:15. 2 ታኒ ናምአን ህንተራ ጋሄትዳ ዎደ ህንተ ግዶን ካሰ ናጋራ ኦዳ ኡራነ ሀራታ ኡባ ሴሮና አግከ ጋዳ ኦዳ ዎስ። ሀእ ታ ሃካዳ ደእኮካ ስማዳ ህንተኮ ብያ ዎደ ኦደስካ ቃትከ።
3 ታናን ደእድ ኦደይ ክርስቶሳ ግደይሳ ህንተ ኤራናዉ ኮዬታ። እ ህንተራ ሃሳያ ዎደ ዎልቃማፐ አትሽን፥ ህንተ ግዶን ዳቡራንቾ ግደና። 4 ክርስቶስ ማስቃለ ቦላ ዳቡራን ካቀትስ፥ ሽን ፆሳ ዎልቃን ደኦን ደኤስ። እ ዳቡራንቾ ግድዳይሳዳ፥ ኑካ ዳቡራንቾ። ሽን ህንተና ሀጋዛናዉ ፆሳ ዎልቃን እያራ ደኦን ዳና።
5 አማኖን ምንድ ደእያኮ ህንተና ህንተዉ ፓጭድ በእተ። ፓጨን ህንተ ኩንዶና አትኮ፥ ክርስቶስ ህንተናን ደኤይሳ ህንተ ኤሬታ። ሽን ክርስቶስ ህንተናን ዶና እፅኮ ህንተ ኩንዴታ። 6 ኑኒ ፓጨን ኩንዶናይሳ ህንተ ኤሬታ ጋዳ አማናይስ።
7 ህንተ ኢታባ ኦና መላ ኑኒ ፆሳ ዎሶስ። ኑኒ ምኖ ግደይሳ አሳይ በአና መላ ግዶናሽን፥ ኑኒ ምኖ ግዶና እፅኮካ፥ ህንተ ሎኦ ኦና መላ ኑኒ ዎሶስ። 8 ኑኒ ቱማስ ኦስፐ አትሽን፥ ቱማራ ኤቀትያባ አይባካ ኦኮ። 9 ኑ ዳቡርያ ዎደ ህንተ ቃስ ምንያ ዎደ ኑና ኡፋይሴስ። ህንተ ቦረይ ባይናይሳታ ግዳና መላ ኑ ህንተዉ ፆሳ ዎሶስ።
10 ታኒ ህንተፈ ሃካዳ ደአሸ ፃፍዳይ ሄሳ ግሾሳ። ታኒ ህንተኮ ብያ ዎደ ጎዳይ ታዉ እምዳ ማታን ዘምፓዳ ህንተ ቦላ ጎዳታናዉ ኮይከ። ጎዳይ ታዉ ማታ እምዳይ፥ ህንተና ማዳናሳፈ አትሽን፥ ቆሀናሳ ግደና።
11 ዉርሰን ታ እሻቶ፥ ሳሮ ደእተ። ቦረይ ባይና ደእተ፤ ታ ዞርያ ስእተ። እስ ዎዛናን ግድድ ደእተ፤ ሳሮተን ደእተ። ሲቆነ ሳሮ እምያ ፆሳይ ህንተራ ግዶ።
12 ጌሻ ዬረተ ዬረትሸ፥ እሶይ እሱዋ ሳሮተ። 13 ፆሳ አሳ ኡባይ ህንተና ሳሮ ሳሮ ያጎሶና።
14 ጎዳ የሱስ ክርስቶሳ አ ኬሀተይ፥ ፆሳ ሲቆይ፥ ጌሻ አያና እስፈተይ ህንተ ኡባራ ግዶ።