1 ህዛ፥ ታ ሲቆቶ፥ ሀ ኡፋይሳይ ኑስ ደእያ ግሾ፥ ኑ አሹዋነ ኑ ሸምፑዋ ቱንስያባ ኡባፈ ኑና ጌሾስ። ፆሳስ ያይድ ኑ ጌሻተ ፖሎ ኦስ።

2 ህንተ ኡሉዋ ኑና በስተ። ኑኒ ኦናካ ናቅቦኮ፤ ኦናካ ቆህቦኮ፤ ኦናካ ጭምቦኮ። 3 ታኒ ሄሳ ህንተ ቦላ ፕርዳናዉ ጊከ። ሀይሳፈ ካሰ ታ ህንተዉ ኦድዳይሳዳ፥ ህንተ ኑ ዎዛናን ደኤታ፤ ኑ ፓፃ ደእንካ ሀይቅንካ ህንተፈ ሻከቶኮ። 4 ታ ኦድያባ ህንተፈ ቆትከ፤ ታ ህንተናን ጬቀታይስ፤ ኑ ዋየ ኡባን ምነታይስ፤ ቃስ ግታ ኡፋይስ ኡፋይታይስ።

5 ኑኒ ማቀዶነ ብዳ ዎደ፥ ኡባ ባጋራ ዋየትዳፐ አትሽን ሸምፕቦኮ። ካረራ ሞርከታን፥ ኑ ጋን ያሻን ኡንኤትዳ።✝ 6 ሽን አዛንዳይሳታ ምንያ ፆሳይ፥ ትቶ ዩሳን ኑና ምንስ። 7 ኑና ምንዳይ ትቶ ዩሳ ፃላላ ግዶናሽን፥ ህንተካ እያ ምንዳይሳ። ህንተ ታና ላሞተይሳ፥ ታዉ አዛነይሳነ ታዉ ቆፐይሳ ታ ስእዳ ዎደ ታና ዳሮ ኡፋይስስ።

8 ታ ዳብዳበይ ህንተና አዛንኮካ አይስ ፃፋድናሻ ጋዳ ቂሮትከ። ታ ቂሮትዳይ ታ ፃፍዳ ዳብዳበይ ህንተና ጉ ዎደስ አዛንዳ ግሾሳ። 9 ሀእ ታኒ ኡፋይትዳይ፥ ታ ህንተና አዛንዳ ግሾ ግዶናሽን፥ ህንተ አዛኖይ ህንተና ህንተ ናጋራፐ ዛርዳ ግሾሳ። ፆሳይ ባ ሸንያዳ ህንተና አዛንስፐ አትሽን ኑ ህንተና አይብንካ ቆህቦኮ። 10 ፆሳይ ኮያ አዛኖይ፥ አቶተኮ ጋያ ናጋራፐ ስሞ ኤሄስ፤ እያን ቂሮያባይ ባዋ። ሽን ሀ ሳአ አዛኖይ ሀይቆ ኤሄስ። 11 ህንተ አዛኖይ ህንተናን አይፍስዳ አይፍያ በእተ። ሄ አዛኖይ ህንተና አይ መላ ደንዳኮ፥ አይ መላ ዛሮ እማናዳ ጊግስዳኮ፥ ሄ ኡራ ቦላ አይ መላ ሀንቀዳኮ፥ አይ መላ ታዉ ያያና መላ ኦዳኮ፥ አይ መላ አሞይዳኮ፥ ሄ ኡራ ሴራናዉ አይ መላ ጊግዳኮ በእተ። ሀ ኡባባን ህንተ ጌሽ ግደይሳ ማርካይደታ።

12 ሄሳ ግሾ፥ ታኒ ሀ ዳብዳብያ ህንተዉ ፃፍዳይ፥ ናቅዳ ኡራ ዎይኮ ናቀትዳ ኡራ ግሾ ግደና። ሽን ህንተ ኑስ አይ መላ ቆፕያኮ ፆሳ ስንን ህንተ፥ ህንተና በአና መላ ፃፋስ። 13 ኑኒ ኡፋይትዳይ ሄሳ ግሾሳ። ኑ ኡፋይሳፈ አድ ኑና ዳሮ ኡፋይስዳይ፥ ህንተ ትቶ ኡፋይስዳይሳነ እያ ዎዛና ሸምፕስዳይሳ። 14 ታኒ ህንተና ናሻዳ እያዉ ኦድን፥ ህንተ ታና ዬላይበከታ። ሽን ኑኒ ኡባ ዎደ ህንተዉ ቱማ ኦድዳ፤ ሄሳዳካ ኑኒ ትቶ ስንን ህንተና ናሽዳይስ ቱማ ግድስ። 15 ህንተ እያዉ ያሻን ኮኮርድ፥ እያ ሞክዳይሳ ቃስ እያዉ አይ መላ ኪተትዳኮ፥ እ ቆፕያ ዎደ ህንተዉ ደእያ ሲቆይ ምንሸ ብስ። 16 ታኒ ኡባባን ህንተናን አማነትያ ግሾ ኡፋይታይስ።