1 ፆሳ ሸነን የሱስ ክርስቶሳ ሀዋረ ግድዳ ጳዉሎስነ፥ ኑ እሻ ፅሞትዮስ፥
ቆሮንቶሳን ደእያ ፆሳ ዎሳ ኬስነ አካያ ቢታን ደእያ ፆሳ አሳ ኡባስ ፃፍዳ ኪታ።1:1 ሀዋ 18:1.
2 ፆሳ ኑ አዋፐነ ጎዳ የሱስ ክርስቶሳፐ፥ አ ኬሀተይነ ሳሮተይ ህንተዉ ግዶ።
ጳዉሎስ ፆሰ ጋላቴስ
3 ማሮተ አዋስ፥ ኡባ ዎደ ኑና ምንያ ፆሳስ፥ ኑ ጎዳ የሱስ ክርስቶሳ አዋስ ጋላት ግዶ። 4 ፆሳይ ኑስ እምዳ ምንዋን፥ መቶን ደኤይሳታ ኑ ምንና መላ ፆሳይ ኑና ኑ መቶ ኡባን ምንስ። 5 ኑኒ ክርስቶሳ ዳሮ ዋይያ ሻከትዳይሳዳ ቃስ ኑኒ እያ ዳሮ ምንዋን ምናና። 6 ኑኒ ዋየትኮ ሄስ ህንተና ምንናሳነ ህንተና አሻናሳ። ቃስ ኑኒ ምነትኮ ኑኒ ገንጭዳ ዋይያ መላ ህንተካ ገንጭድ፥ ፆሳይ ህንተዉ እምያ ምንዋን ምናና። 7 ህንተ ኑ ኤክዳ መቱዋ መላ ኤክድ፥ ኑ ምንዋን ሻከታናይሳ ኑ ኤርያ ግሾ ኑ ኡፋይሳይ ህንተናን ምኖ።
8 ኑ እሻቶ፥ ኢሰ ቢታን ኑና ጋክዳ መቱዋ ህንተ ኤራና መላ ኮዮስ። ሄ ኑና ጋክዳ መቶይ ኑ ዎልቃፈ ዳርን፥ ሀይቆና አቶኮ ግድ ኡፋይስ ቃንፅዳሽን። 9 ኑኒ ኑ ቦላ ሀይቆ ፕርድ ፕርደትዳ መላ ቆፕዳ። ሽን ኑኒ ኑ ሁጰን ግዶናሽን፥ ሀይቅዳይሳታ ደንያ ፆሳን አማነታና መላ ሄስ ሀንስ። 10 ፆሳይ ሄሳ መላ ኢታ ሀይቆፐ ኑና አሽስ፤ ሀእካ አሻና፤ ስንፈካ እ ኑና አሻና ግድ እያን ኡፋይስ ዎስ። 11 ዎሳን ኑና ማድተ። ዳሮ ዎሳ ጋሶን ፆሳ ማዱዋ ኑ ደምያ ዎደ ዳሮ አሳይ ኑ ግሾ ፆሳ ጋላቶሶና።
ጳዉሎስ ባ ሀልቹዋ ላምስ
12 ኑኒ ኑ ጌሻ ካሀን ጬቀቶስ። ኑኒ ሀ አላምያን ደእዳ ደኡዋን ኡባራካ ህንተራ ኑ ደእዳ ደኡዋን ቱማተንነ ሱረተን ህንተራ ደእዳ። ሄስካ፥ ሀ አላምያ ጭንጫተን ግዶናሽን፥ ፆሳ አ ኬሀተና። 13 ኑ ህንተዉ ፃፍዳ ዳብዳበይ ህንተ ናባባናዉነ አኬካናዉ ዳንዳእያባፐ አትሽን፥ ሀራ ግደና። ህንተ እያ አኬካናዉ ዳንዳኤይሳ ታ አማናይስ። 14 ሀእ ህንተ ኑና ሀንዳ ኬና ኤሬታ፥ ሽን ስንፈ ኩመ ኤራናይሳ ታ አማነታይስ። ኑ ጎዳ የሱሲ ስምያ ዎደ ኑኒ ህንተናን ጬቀትዳይሳዳ ህንተካ ኑናን ጬቀታና።
15 ሄሳ ታኒ ሎይ ኤርዳ ግሾ፥ ህንተ ናምአን ጎኤታና መላ ካሰታዳ ህንተኮ ባናዉ ቆፋ ቃቻስ። 16 ታኒ ማቀዶነ ባሸነ ያፐ ስማሸ ህንተና በአና። ታኒ ያፐ ይሁዳ ብያ ዎደ ህንተ ታና ታ ኦግያን ማዳና ጋዳ ቆፓስ።1:16 ሀዋ 19:21. 17 ታኒ ሄሳ ጋሸ አይ ኦናዉ በሲያኮ ኤሮና አስ ዳንያና? ዎይኮ ታኒ ታ ቆፋ ቃችያ ዎደ አሳ ቆፋዳ፥ እስ ቶሆ "ኤ" ቃስ እስ ቶሆ "አካይ" ግያ አሳ መለዬ?
18 ሽን ፆሳይ አማነተይሳ ግድያ ግሾ፥ ኑ ህንተዉ ኦድያ ቃላይ "ኤ" ዎይኮ "አካይ" ገይሳ ግደና። 19 ታኒ፥ ስላሰይነ ፅሞትዮስ ህንተዉ ማርካትዳ ፆሳ ናአይ፥ የሱስ ክርስቶሲ ኡባ ዎደ "ኤፐ" አትሽን፥ "ኤ" ነ "አካይ" ግደና።1:19 ሀዋ 18:5. 20 ፆሳይ እማና ግዳ ኡባይ ክርስቶሳ ባጋራ "ኤ" ግዴስ። ኑኒ ክርስቶሳ ባጋራ ፆሳ ቦንቾስ፥ "አምንእ" ገይ ሄሳ ግሾሳ። 21 ኑነ ህንተ ክርስቶሳን ምንድ ኤቃና መላ ኦዳይነ ባ ኦሱዋስ ዶርዳይ ፆሳ። 22 ኑኒ እያባ ግደይሳ ኤርሳናዉ ባ ማታምያ ኑ ቦላ ዎስ፤ ቃስ ባ ጌሻ አያና ኦይ ኦድ ኑ ዎዛናን ዎስ።
23 ታኒ ቆሮንቶሳ ቦና አግዳይ ህንተ አዛኖና አታና መላሳ፤ ሄስ ዎርዶ ግድኮ ፆሳይ ታ ሸምፑዋ ታፐ ኤኮ። 24 ህንተ፥ ህንተ አማኑዋን ምንድ ደእያ ግሾ፥ ኑ ህንተና ኡፋይሳናዉ ህንተራ እስፈ ኦይሳታፐ አትሽን፥ ህንተና ዎልቃን አማንይሳታ ግዶኮ።