1 ኑኒ ዛሪድ ኑና ሳቢኖዬ? ዎይኮ ሀራ አሳዳ፥ ሳባ ዳብዳብያ ህንተዉ የዳናዉ ዎይኮ ህንተፈ ኤካናዉ ኑና ኮሽዬ? 2 አስ ኡባይ ህንተና ኤራና መላነ ናባባና መላ ህንተ ኑ ዎዛናን ፃፈትድ ደእያ ኑ ዳብዳበ። 3 ህንተ ቃላመን ግዶናሽን፥ ደኦ ፆሳ አያናን፥ ሹቻ ቦላ ግዶናሽን፥ አሳ ዎዛናን ፃፈትዳይሳታነ ኑናን ሀጋዘትዳ ክርስቶሳ ዳብዳበ ግደይሳ በስደታ።✝3:3 ከሳ 24:12፤ ኤርም 31:33፤ ህዝ 11:19፤ 36:26.

4 ኑ ሄሳ ግዳይ፥ ክርስቶሳ ባጋራ ፆሳን አማኖይ ኑስ ደእያ ግሾሳ። 5 ኑ ሄሳ ኦናዉ ዳንዳእዳይ ፆሳ ዎልቃናፐ አትሽን፥ ኑኒ ኑ ዎልቃን አይኮካ ኦናዉ ዳንዳኦኮ። 6 ኑ ኦራ ጫቁዋ ኦሳንቾታ ግዳና መላ ፆሳይ ኑና ዳንዳእስስ። ሄ ኦራ ጫቆይ ጌሻ አያናን በንትዳይሳፈ አትሽን፥ ፃፈትዳ ህገን ግደና። ህገይ ዎስ፥ ሽን ጌሻ አያናይ ደኦ እሜስ።✝3:6 ኤርም 31:31.

7 ሹቻ ቦላ ፃፈትዳ ህገይ እመትያ ዎደ ፆሳ ቦንቾይ ቆንጭስ። ሙሰ ሶምኡዋን ደእያ ቦንቾይ ይሸ ብያባ ግድኮካ፥ እስራኤለ አሳይ እያ ሶምኡዋ ትሽ ኦድ ፄላናዉ ዳንዳእቦኮና። ህዛ፥ ሀይቆ ኤህያ ህገይ ሄሳ መላ ቦንቾን ቆንጭኮ፥✝3:7 ከሳ 34:29. 8 ያትን፥ ጌሻ አያናን ኦሰትያ ኦሱዋ ቦንቾይ ዋንድ አኔ? 9 አሳ ቦላ ፕርዳ ኤህያ ህገይ ቦንቾ ግድኮ ያትን፥ አሰ ፅልስያ ኦራ ኦገይ ዋንድ አድ ቦንቸተኔ? 10 ካሰ ቦንቾ ግድዳይሳ ሀእ አያ ቦንቾይ ደኤይሳራ ጋ በእያ ዎደ ቦንቾይ ባይናባ ግድስ። 11 ጉ ዎደስ ቆንጭድ ጉየፐ ይዳይስ ሀይሳዳ ቦንቸትኮ፥ መርናዉ ደኤይስ ዋንድ አድ ቦንቸተኔ?

12 ኑስ ሀይሳ መላ ኡፋይሳይ ደእያ ግሾ፥ ዬላቶና ኦደቶስ። 13 ኑኒ፥ እስራኤለ አሳይ ይሸ ብያ ቦንቹዋ ዉርሰ በኦና መላ ባ ሶምኡዋ ካምዳ ሙሰ መላ ግዶኮ።✝3:13 ከሳ 34:33. 14 ሽን ኤንታ ዎዛናይ ዶጭስ። ሀች ጋካናዉ ኤንቲ ጋልአ ጫቁዋ ናባብያ ዎደ ኤንታ ዎዛናይ ሄ ካማን ካመትድ ደኤስ። ሄ ካማይ ክርስቶሳ ፃላላን ቃረቴስ። 15 ሽን ሀች ጋካናዉካ ኤንቲ ሙሰ ማፃፋ ናባብያ ዎደ ኡባን ሄ ካማይ ኤንታ ዎዛና ካሜስ። 16 ሽን ኦንካ ጎዳኮ ስምያ ዎደ አዉደካ ሄ ካማይ ቃረቴስ።✝3:16 ከሳ 34:34. 17 ጎዳይ አያና፤ ጎዳ አያናይ ደእያ በሳን ላአተ ደኤስ። 18 ኑኒ ኡባይ ካመትቦና ሶምኦን ጎዳ ቦንቹዋ በአና።*3:18 በአና፦ ማስቶተዳ ዛሪድ ጶልሳና ጌተትድ ብርሸታናዉ ዳንዳኤስ። ኑኒ አያና ግድዳ ጎዳ ማላ ዳናናዉ ቦንቾፈ ቦንቾን ላመታና።