1 ሀእ ኑ ደእያ ዱንካነ ዳንያ ሀ ሳአ አሳተይ ላለትኮካ፥ አስ ኬፅቦና፥ ፆሳይ ኬፅዳ መርና ኬይ ኑስ ሳሎን ደኤይሳ ኤሮስ። 2 ሳሎ አሳተ ማአናዉ አሞትሸ ሀእ ሀ ሳአን ደእሸ ኦሎስ። 3 ኑኒ ሄሳ ማእያ ዎደ ካሎቶኮ። 4 ዱንካነ ዳንያ ሀ ሳአ አሳተን ኑ ደእሸ ዴፀትድ ኦሎስ። ሀይቅያ ኑ አሳተይ ደኦን ላመታና መላ ሳሎ አሳተ ማአናዉ ኮዮስፐ አትሽን፥ አሹዋፐ ሻከታናዉ ኮይድ ግደና። 5 ኑና ሀይሳስ ጊግስዳይ ፆሳ። ቃስ ስንፈ ያናባስ ኦይ ኦድ ባ አያና ኑስ እሚስ።

6 ሄሳ ግሾ፥ ኑኒ ሀ ሳአ አሳተን ደእያ ዎደ ኡባን ጎዳፐ ሃክድ ደኤይሳ ኤርኮካ ኡባ ዎደ አማነትድ ደኦስ። 7 ኑኒ ደኤይ አማኖናፐ አትሽን፥ በእያባን ግደና። 8 ኑ ሀ ሳአ አሳተፈ ሻከትድ፥ ኑ ሶ ብድ ጎዳራ እስፈ ዳናዉ አሞትያ ግሾ፥ አማነትድ ደኦስ። 9 ሄሳ ግሾ፥ ኑ ሀ አሳተን ደእን ዎይኮ ሀ አሳተፈ ሻከትን፥ ኑ አሞይ እያ ኡፋይሳናይሳ። 10 ኑኒ እሶይ እሶይ ሀ ሳአን ደእሸ ሎኦ ግድን ዎይኮ ኢታ ግድን፥ ኦዳ ኦሱዋስ በሲያ ፕርዳ ኤካናዉ ክርስቶሳ ፕርዳ አራታ ስንን ሺቃና።✝

11 ህዛ፥ ጎዳስ ያሺ አይ ጉሰኮ ኑኒ ኤርያ ግሾ፥ አሳይ ኑ ኦደይሳ ኤካና መላ ዞሮስ። ፆሳይ፥ ኑኒ ኦነኮ ኑና ኤሬስ፤ ቃስ ህንተካ ህንተ ካሀን ኑ ኦነኮ ኤሬታ ያጋዳ ቆፓይስ። 12 ዎዛናን ግዶናሽን፥ ማላን ጬቀትያ አሳ ዶና ኦይናዉ ህንተ ኑናን ጬቀታና መላ ህንተዉ ጋሶ ግዳናዉ ኮዮስፐ አትሽን፥ ኑ ኑና ዛሪድ ናሻናዉ ኮዮኮ። 13 ኑ ጎሽ ግድኮ ፆሳ ቦንቾሳ፤ ዎዛናማ ግድኮ ህንተሳ። 14 እሶይ ኡባስ ሀይቅዳይሳነ ኡባይ ቃስ እያራ ሀይቅዳይሳ ኑ ኤርያ ግሾ፥ ክርስቶሳ ሲቆይ ኑና ሃሬስ። 15 ደኦን ደኤይሳት ህዛፐ ጉየ ባንታዉ ግዶናሽን፥ ኤንታዉ ሀይቅዳይሳስነ ሀይቆፐ ደንድዳይሳስ ዳና መላ ክርስቶስ አሳ ኡባ ግሾ ሀይቅስ።

16 ህዛፐ ጉየ፥ ኑኒ ኦናካ አሳ ቆፋን ፕርዶኮ። ሀይሳፈ ካሰ ኑኒ ክርስቶሳካ አሳ ቆፋን በእዳባ ግድኮካ፥ ህዛፐ ሄሳዳ ቤኦኮ። 17 ሄሳ ግሾ፥ ኦንካ ክርስቶሳን ደእኮ ኦራ መተ፤ ጋልአ መተይ አስ፤ ኡባይካ ኦራ ግድስ። 18 ሄሳ ኡባ ፆሳይ ኦስ። እ ክርስቶሳ ባጋራ ኑና ባራ ስገስ። ቃስ ሀራታ ባራ ስገና መላ ኑስ ስገ ኦሶ እሚስ። 19 ፆሳይ ክርስቶሳ ባጋራ አሳ ኡባ ባራ ስገስ። ኤንታ ናጋራ ታይብቤና፤ ቃስ አሳ ባራ ስገያ ቃላ ኑስ እሚስ።

20 ፆሳይ አሳ ኑ ባጋራ ፄግያ ግሾ፥ ኑ ክርስቶሳን ኪተትድ አሳ ፆሳራ ስገትተ ግድ ክርስቶሳ ግሾ፥ ዎሶስ። 21 ኑኒ ፆሳ ፅሎተ ክርስቶሳ ባጋራ ኤካና መላ፥ ናጋራ ኤሮና ክርስቶሳ ኑ ግሾ፥ ናጋራንቾ አሳዳ ኦስ።*