ማርካተስ ጊገተ
1,2 ተዎፍሎሳ፥ የሱሲ ባ ኦሱዋ ኦይክዳ ዎደፐ ሳሎ ብዳ ጋላሳ ጋካናዉ፥ ኦዳባነ ታማርስዳባ ኡባ ታኒ ታ ኮይሮ ማፃፋን ፃፋስ። ሳሎ ባናፐ ስን እ ባ ዶርዳ ሀዋረታ፥ ጌሻ አያናን ኪትስ።1:1-2 ሉቃ 1:1-4. 3 እ ባ ዋያፐ ጉየ፥ ሀይቆፐ ደንድዳይሳ ስይ ባይና ቆንጭስድ ኤንታዉ ባና በስስ። ኦይታሙ ጋላስ ኤንታዉ ቆንጭድ ፆሳ ካዎተባ ኤንታ ታማርስስ። 4 እስ ዎደ ኤንታራ እስፈ ደእሸ ኤንታ ሀይሳዳ ያግድ ኪትስ፦ "ታ ህንተዉ ኦድዳ፥ ታ አዋይ እማና ግዳ ኡፋይሳ ቃላ ናግተፐ አትሽን፥ የሩሳላመፐ ከዮፕተ።1:4 ሉቃ 24:49. 5 ዮሃንስ ሃን ፃማቅስ፥ ሽን ጉ ዎደፐ ጉየ፥ ጌሻ አያናን ህንተ ፃማቀታና" ያግስ።1:5 ማቶ 3:11፤ ማር 1:8፤ ሉቃ 3:16፤ ዮሀ 1:33.
6 ሀዋረት እስፈ የሱሳራ ሺቅዳ በሳን፥ "ጎዳዉ፥ እስራኤለታስ ነ ካዎተ ዛራና ዎደይ ሀይሴ?" ያግድ ኦይችዶሶና።
7 የሱሲ ኤንታኮ፥ "ታ አዋይ ባ ማታን ኦያ ዎደነ ላይ ህንተ ኤራናዉ ዳንዳኤከታ። 8 ሽን ጌሻ አያናይ ህንተ ቦላ ዎያ ዎደ፥ ህንተ ዎልቃን ኩማና። ያን ስሚድ፥ የሩሳላመን፥ ይሁዳ ቢታ ኡባን፥ ሳማረንነ ሳአ ጋፃ ጋካናዉ ታዉ ማርካታ ግዳና" ያግስ።1:8 ማቶ 28:19፤ ማር 16:15፤ ሉቃ 24:47-48.
9 ሄሳ ግዳፐ ጉየ ኤንቲ ፄልሽን፥ ቁ ቁ ግድ፥ ሳሎ ብን፥ እያ ኤንታ አይፈፐ ሻር ገንስ።1:9 ማር 16:19፤ ሉቃ 24:50-51.
10 የሱሲ ብያ ዎደ ኤንቲ ሳሎ ትሽ ኦድ ፄልሽን፥ ቦ ማኦ ማእዳ ናምኡ አሳት አኬኮና ኤንታ ማታን ኤቅድ፥ 11 "ጋልላ አሳቶ፥ ሳሎ ፄልሸ፥ ህንተ አይስ ኤቅደቲ? ሀ ህንተ በእሽን ሳሎ ብዳ የሱሲ ሄሳዳካ ስሚድ ያና" ያግዶሶና።
ይሁዳ በሳን ማትያሳ ዶረተ
(ማቶ 27:3-10)
12 ሄሳፈ ጉየ፥ ሀዋረት ሻማሆ ዙማፐ የሩሳላመ ስምዶሶና። ሻማሆ ዙማይ የሩሳላመስ ማታን ደኤስ። 13 ኤንቲ የሩሳላመ ገልድ፥ ባንታ ደእያ በሳ፥ ፖቅያ ቦላ ከይዶሶና። ኤንትካ፦ ጰፅሮሳ፥ ዮሃንሳ፥ ያይቆባ፥ እንድርያሳ፥ ፍልጶሳ፥ ቶማሳ፥ ባርተለሞሳ፥ ማቶሳ፥ እልፍዮሳ ናአ ያይቆባ፥ ባ ቢታስ ምሸትያ ስሞናነ ያይቆባ ናአ ይሁዳ።1:13 ማቶ 10:2-4፤ ማር 3:16-19፤ ሉቃ 6:14-16. 14 ሀይሳቲ ኡባይ ማጫሳታራ፥ የሱሳ አየ ማይራምራነ የሱሳ እሻታራ ኡባይ እስ ዎዛናን ግድድ ምንድ ዎሶሶና።
15 ሄ ዎደ፥ ጰፅሮስ ፄታነ ላታማ ግድያ አማንያ አሳይ ሺቅዳ በሳን ደንድ ኤቅድ፥ ሀይሳዳ ያግስ፦ 16 "አሳዉ፥ የሱሳ ኦይክዳይሳታ ካለዳ ይሁዳባ፥ ጌሻ አያናይ ካሰ ዳዊታ ዶናን ኦድዳ ፆሳ ቃላይ ፖለታናዉ በሴስ። 17 ይሁድ ኑራ እስፈ ሀ ኦሱዋ ኦናዉ ዶረትዳ አስ።"
18 ሽን ይሁድ ባ ኢታ ኦሱዋን ደምዳ ሚሸን ጋደ ሻምስ። እ ስን ጉ ኩንድን፥ እያ ኡሎይ ዳከትስ፤ እያ ማራጨ ኡባይ ካረ ከይስ።1:18 ማቶ 10:2-4፤ ማር 3:16-19፤ ሉቃ 6:14-16. 19 ይሁዳ ቦላ ሀንዳባ የሩሳላመን ደእያ አሳ ኡባይ ስእስ። ሄሳ ግሾ፥ ሄ ጋድያ ባንታ ቃላን አከልዳማ (ሱ ጋደ) ግድ ፄግዶሶና።
20 "ሄስካ ማዝሙረ ማፃፋን፥
" ‘እያ ኬይ ካሎ አቶ፤
ኦንካ እያን ደኦፖ።
ቃስ እያ ሹማተ ሀር ኤኮ’ ጌተትድ ፃፈትስ።1:20 ማዝ 69:25፤ 109:8.
21 "ሄሳ ግሾ፥ ጎዳ የሱሲ ኑ ግዶን ስመረትዳ ዎደ ኡባን ኑራ ደኤይሳታፐ፥ 22 ቃስ ፃማቅያ ዮሃንሳ ዎደፐ ዶምድ ጎዳ የሱሲ ሳሎ ብዳ ጋላስ ጋካናዉ ኑራ ደኤይሳታፐ እስ አስ እያ ደንዱዋስ ኑራ ማርካ ግዳናዉ በሴስ" ያግስ።1:22 ማቶ 3:16፤ ማር 1:9፤ ሉቃ 3:21.
23 ሄሳ ግሾ፥ አሳይ ዶሩዋስ ዮስፆሳ ዎይኮ ባርሳባሳ ጌተትያ ዮሰፋነ ማትያሳ ናምአ ሺሽዶሶና። 24 ሄሳፈ ጉየ፥ ፆሳ ዎስሸ፥ "አሳ ኡባ ዎዛና ኤርያ ጎዳዉ፥ ሀ ናምአታፐ ነ ኦና ዶርዳኮ ኑና በሳ። 25 ይሁድ ባ በሳ ብድ፥ አግዳ ኦሱዋነ ሀዋረተ ኦሱዋ ኤካና መላ ሀይሳታፐ ኑስ ቆንጭሳ" ያግዶሶና። 26 ኤንታ ቦላ ሳማ የግዶሶና። ሳማይ ማትያሳ ቦላ ዎን፥ ማትያስ ታማነ እስ ሀዋረታ ቦላ ጉዠትስ።