ሀዋረታ ኦሶ 27

ጳዉሎስ ሮመ ብስ

1 ኑኒ ማርካበን ፃለ ባናዉ ቆፋ ቃችዳ ዎደ አዉግስፆሳ ዎታዳረታ ጌተተይሳታፐ እስ ዩልዮሳ ጌተትያ ማቶ ሀላቃስ ጳዉሎሳነ ሀራ ጉ ቃሾ አሳታ አድ እያዉ እምዶሶና። 2 ኢሰ ጋፃን ደእያ ቢታታ ብያ አድራምፅዮነ ማርካበን ገልድ ደንድዳ። ማቀዶነ አስ ግድዳ ተሰሎንቀ አርስፅሮኮስ ኑራ ደኤስ።

3 ዎንተ ጋላስ ኑኒ ስዶና ጋክሽን፥ ዩልዮስ ጳዉሎሳስ ኬህድ ባ ላገታኮ ብድ ኮሽያባን ማዳና መላ ኤንታኮ እያ የድስ። 4 ያፐ ደንድድ ስንራ ኑ ቦላ ጫርክያ ግሾ ሃን ተቀትዳ ቢታ፥ ቆጵሮሳን ዘምፕድ አዳ። 5 ክልቅያነ ጵንፍለ ማታን ደእያ አባ ፕንድ ሊቀን ደእያ ሙራ ጋክዳ። 6 ያን ማቶ ሀላቃይ ፃለ ብያ እስክንድረ ማርካበ ደምድ፥ እያን ኑና ገልስስ።

7 ኑኒ ዳሮ ጋላስ ሎዳራ ብድ፥ ዳሮ መቶን ቃንዶሳ ካታማ ማት ጋክዳ። ያራ ባናዉ ኑና ጫርኮይ ድግን ሳልሞናራ አድ ሃን ተቀትዳ ቢታ፥ ቃርፄሳን ዘምፕድ አዳ። 8 ዳሮ መቶን ጋፃ ጋፃ ኦይክድ ላሳ ካታማ ማታን ደእያ አባ ዶናን "ማርካበይ ዎፑ ግድ ሸምፕያ በሲ" ጌተትያ በሳ ጋክዳ።

9 ኑኒ ያን ዳሮ ዎደ ጋምእዳፐ ጉየ ፆም ብለትዳ ግሾ ህዛፐ ማርካበን ቡስ መትያ ግሾ ጳዉሎስ ኤንታ ዞርስ። 10 "አሳዉ፥ ኑ ቡሳን ግታ ቦሽነ ዳሮ ቆሆይ ደኤይስ ታዉ በንቴስ፤ ቆሆይ ጫና ቦላነ ማርካብያ ቦላ ፃላላ ግዶናሽን ኑ ደኡዋ ቦላካ ጋካና" ያግስ። 11 ሽን ማቶ ሀላቃይ ጳዉሎስ ግዳይሳፈ አድ ማርካብያ ላገይስነ ማርካብያ ጎዳይ ገይሳን አማንስ። 12 ሄ አባ ዶናን ደእያ ካታማይ ባልጎ አጌና አናዉ ኤንታዉ እንጀቶና ግሾ፥ ዳርያ አሳት ባንታዉ ዳንዳኤትኮ ፍንቀ ካታማ ጋክድ ባልጎ አጌና ያን አናዉ ዞረትዶሶና። ፍንቀይ ፑደሀ-ዉሎሀፐነ ዱገሀ-ዉሎሀፐ ግዶን አባ ዶናን ደእያ ካታማ።

አባ ቦላ ጎተይ ደንድስ

13 ካዉሻ ዱገሀ ጫርኮይ ሎዳራ ጫርክዳ ዎደ ባንታ ቆፕዳይሳዳ ሀንዳባ ኤንታዉ ዳንን ደንድድ፥ ማርካበይ ቃፆና መላ ኦይክያ ብራታ ፑደ ኤክድ ቃርፄሳ ማታራ አዶሶና። 14 ሽን ዳሮ ጋምኦና "አዉራቅስ" ጌተትያ ዎልቃማ ጎተይ ሃን ተቀትዳ ቢታፈ ዱገ ኤንታ ቦላ ደንድስ። 15 ሄ ጎተይ ማርካብያ ሱግድ ኤፎና ድግዳ ግሾ ጫርኮይ ማርካብያ ባ ዶስዳ ሶ ኤፍስ።

16 ኑኒ ዩሾይ አባን ተቀትዳ ቢታ፥ ቄዳን ዘምፕድ ብሸ ዳሮ መቶተትድ ማርካብያ ዎጎሉዋ አሻናዉ ዳንዳእዳ። 17 ኤንቲ ዎጎሉዋ ፑደ ከስዳፐ ጉየ ዎዶሩዋን ማርካብያ ቦላ ፃፅድ፥ ምን ቃችዶሶና። ሱርትሳ ጌተትያ ሻፍያን ባንታና ዶምኤና ግድ ህርግድ፥ ማርካብያ ሻራ ዎስድ ማርካብያ ጮ የድ አግዶሶና።

18 ጎተይ ዎልቃምሸ ብን ዎንተ ጋላስ ጫናፐ ባጋ አባን ሆሎ ኦይክዶሶና። 19 ሄን ጋላስ ማርካብያ ሚሽያ ኤክድ ባንታ ኩሸን ሆልዶሶና። 20 ኑኒ ዳሮ ጋላስ አዋ አይፈነ ፆልንቶ በኦና ግሾነ ዎልቃማ ኡሾይ ኑ ቦላ ኡሽዳ ግሾ ስንፈ ኑኒ ሸምፖራ አታና ግድ ቆፕቦኮ።

21 ሄ ዎደ ኤንቲ ዳሮ ጋላስ ካ ሞና ጋምእዳ ግሾ ጳዉሎስ ኤንታ ግዶን ደንድ ኤቅድ፥ "አሳዉ፥ ህንተ ታ ዞርያ ኤክድ ቃርፄሳፐ ደንዶና አግዳኮ ሀ መቶይነ ቆሆይ ኑና ጋከና። 22 ሽን ታኒ ህንተና ያዮፍተ ጋዳ ዞራይስ፤ አይስ ጊኮ፥ ሀ ማርካበይ ያናፐ አትሽን፥ ህንተፈ እስ አሳ ሸምፖይካ የና። 23 ዝነ ቃማ ታ እያባ ግድዳይስነ ታ ጎይንያ ፆሳይ ኪትዳ ኪታንቾይ ታ ማታን ኤቅድ፥ 24 ‘ጳዉሎሳ፥ ያዮፋ፤ ኔኒ ሮመ ቢታ ካዋ ቄሳረ ስንን ኤቃናዉ በሴስ። ሄኮ ፆሳይ ነ ግሾ ኔራ ብያ አሳ ኡባ ሸምፑዋ አሽስ’ ያግስ። 25 ሄሳ ግሾ፥ አሳዉ፥ ያዮፍተ። ሄ ኪታንቾይ ታዉ ኦድዳይስ ሀናናይሳ ታኒ አማናይስ። 26 ሽን ጫርኮይ ኑና ኤፍድ እስ ዩሾይ አባን ተቀትዳ ቢታ ጋፃን ሆላና" ያግስ።

ማርካበይ መቅስ

27 ታማነ ኦይዳን ቃማን አድረ አባን ኑና ጫርኮይ ገደነ ሃ ሱግሽን፥ ግድ ብላሄ ግድያ ዎደ ማርካብያን ኦይሳታስ ቢታኮ ማትዳባ ዳንስ። 28 ኤንቲ ጪሞተ ኤራናዉ ኮይድ ዎዶሮ ፄራን ዴፅያባ ቃችድ አባን የግን፥ አባይ ሆስፑን ታሙ ዋ ግድስ። ጉ ጋምእድ፥ ዛር የግን ኡሱፑን ታሙ ዋ ግድስ። 29 ኤንቲ አባ ጋፃን ደእያ ሹቻን ዶምኤቶና መላ ያይድ፥ ማርካበይ ቦና መላ ኦይክያ ኦይዱ ብራታታ ማርካብያፐ ጉየራ አባን የግድ፥ ሳእ ዎንታና መላ ፆሳ ዎሶሶና። 30 ማርካብያን ኦይሳት ማርካብያፐ ባቃታናዉ ኮይድ፥ ማርካበይ ቦና መላ ኦይክያ ብራታታ ማርካብያፐ ስን ባጋራ አባን የግያ ዳንን ዎጎሉዋ አባን የግዶሶና። 31 ጳዉሎስ ማቶ ሀላቃኮነ ዎታዳረታኮ፥ "ሀይሳቲ ማርካብያን ሸምፕ ኡቶና እፅኮ ህንተ አታናዉ ዳንዳኤከታ" ያግስ። 32 ሄሳ ግሾ፥ ዎታዳረት ዎጎሎይ ቃሸትዳ ዎዶሩዋ ቃንፅድ የድ አግዶሶና።

33 ሳአይ ዎንታና ሀንሽን ኡባይ ካ ማና መላ ጳዉሎስ አሳኮ፥ "ህንተ ካ ሞና ናግሸ ሀችራ ታማነ ኦይዱ ጋላስ ጋምእደታ። 34 ሄሳ ግሾ፥ ጉ ካ ህንተ ማና መላ ታኒ ህንተና ዎሳይስ። ህንተ ጋሽትሳና መላ ጉ ካ ማናዉ ኮሼስ፤ ሀር አቶሽን ህንተ ሁጰ ብናናፐ እሶይካ የና" ያግስ። 35 ጳዉሎስ ሄሳ ግድ ኡይ ኤክድ ኡባ ስንን ፆሳ ጋላትስ፤ ኡይ መንድ ሙሱ ዶምስ። 36 ኡባይ ምነትድ ባንታዉ ካ ኤክድ ምዶሶና። 37 ኑኒ ማርካብያን ደኤይሳት ናምኡ ፄታነ ላፑን ታማነ ኡሱፑና። 38 ኤንቲ ምድ ካልዳ ዎደ ጫና ግስትያ አባን የግድ ማርካብያ ዴፁዋ ካዉሽዶሶና። 39 ሳአይ ዎንትዳ ዎደ ማርካብያ ኦሳንቾት አዉ ቢታ ጋክዳኮ ኤሮናሽን፥ አባ ጋፃን ደእያ ሻፈነ ስልሞ በእዶሶና። ባንታዉ ዳንዳኤትኮ ማርካብያ ሄ ሻፍያኮ ሺሻናዉ ቆፕዶሶና። 40 ያትድ፥ ማርካበይ ቦና መላ ኦይክያ ብራታታ ብርሽድ አባን የግዶሶና። ሄ ዎደ ላግያ ም ቃችያ ዎዶሩዋ ብርሽዶሶና። ሄሳፈ ጉየ፥ ጫርኮይ ማርካብያ ስን ሱጋና መላ ማርካብያ ኤፍያ ሻራ ስን ባጋራ ቁ ኦድ ቡሱ ዶምዶሶና። 41 ሽን ማርካበይ ሻፈ ዶረን ዶምኤትድ ምተትስ። ማርካብያስ ስን ባጋይ ፁጉንድ ሻፍያ ጫድ ኦይክድ ቃፆና እፅን፥ ጉየ ባጋይ ዙልያ ሱገን መቀረተ ኦይክስ።

42 ዎታዳረት ቃሾ አሳፐ እሶይካ ሃ ዋድ ከስ ኤኮና መላ ኤንታ ዎናዉ ዞረትዶሶና። 43 ሽን ማቶ ሀላቃይ ጳዉሎሳ አሻናዉ ኮይድ ዎታዳረታ ዞረታ እፅስ። ሃ ዋ ኤርያ ኡባይ ማርካብያፐ ሃን ጉፕ ጉፕ ዎድ ካሰትድ ጋፃ ከያና መላ ኪትስ። 44 አትዳይሳት ሳንቃ ቦላነ፥ ማርካብያ መኡዋ ቦላ ከያና መላ ኪትስ። ሄሳዳ ሀንድ ኡባይ ጋፃ ሳሮራ ከይዶሶና።