1 አንፆከን ደእያ ዎሳ ኬን ናበትነ አስታማረት ደኦሶና። ኤንቲ ባርናባሳ፥ ካሬ ጌተትያ ስሞና፥ ቀሬናፐ ይዳ ሉክዮሳ፥ ካዋ ሄሮዲሳራ ድጭዳ ምናሄነ ሳኦላ። 2 ኤንቲ ጎዳ ጎይንሽንነ ፆምሽን ጌሻ አያናይ፥ "ታኒ ፄግዳ ኦሱዋስ ባርናባሳነ ሳኦላ ታዉ ዱማይተ" ያግስ።

3 ሄሳ ግሾ፥ ኤንቲ ፆምዳፐነ ዎስዳፐ ጉየ ባንታ ኩሽያ ኤንታ ቦላ ዎድ የድዶሶና።

4 ሄሳ ግሾ፥ ጌሻ አያናይ ኤንታ ኪትስ። ሰለዉቀ ብዶሶና፤ ያፐ ማርካበን ገልድ ቆጵሮሳ ሃን ተቀትዳ ቢታ ብዶሶና። 5 ኤንቲ ስልማና ጋክድ አይሁደ ዎሳ ኬታን ፆሳ ቃላ ኦድዶሶና። ዮሃንስ* ማድሸ ኤንታራ ደኤስ።

6 ኤንቲ ዩሾይ አባን ተቀትዳ ቢታ፥ ቆጵሮሳ ካንድ ጳፉ ጋክያ ዎደ፥ እስ ዎርዳንቾ ናብያ፥ ባር-የሱሳ ጌተትያ አይሁደ ማሩዋ ደምዶሶና። 7 ሄ ማሮይ ደርያ አይስያ ሳርግዮስ ጳዉሎሳ ጌተትያ አኬካንቾ አድያራ ደኤስ። ሳርግዮስ ጳዉሎስ ባርናባሳነ ሳኦላ ባኮ ፄግድ ፆሳ ቃላ ስአናዉ ኮይስ። 8 ሽን ግርከ ዶናን ማሩዋ ሱንይ "ኤልማሳ" ጌተቴስ። እ ደርያ ሃረይስ አማኖና መላ ድጋናዉ ኮይድ ባርናባሳራነ ጳዉሎሳራ ኤቀትስ።

9 ሽን ጳዉሎሳ ጌተትያ ሳኦል ጌሻ አያናን ኩምድ ማሩዋ ጫድ ፄልድ፥ 10 "ላ፥ ፃላሄ ናአዉ፥ ኢታተ ኡባይ ኩምዳይሶ፥ ፅሎተ ኡባስ ሞርክያዉ፥ ሱረ ጎዳ ኦግያ ምርቀይሳ አግኪ? 11 ሄኮ፥ ሀእ ጎዳ ኩሸይ ነ ቦላ ደኤስ። ኔኒ ቆቀ ግዳና፤ ጉ ዎደስ አዋ ፖኦ በአካ" ያግስ።

ኢራ ጫጋንነ ሚ እያ አይፍያ ጎዝን፥ ባ ኩሽያ ኦይክድ ካለያ አስ ኮይሸ ዩይስ። 12 ደርያ አይሰይስ ሄሳ በእዳ ዎደ ጎዳባ ታማርስያ ትምርትያን ማላለትድ አማንስ።

13 ጳዉሎስነ እያራ ደኤይሳት ጳፉፐ ደንድድ፥ ጵንፍለን ደእያ ጳርገ ማርካበራ ብዶሶና። ዮሃንስ ኤንታፈ ሻከትድ የሩሳላመ ስምስ። 14 ሽን ኤንቲ ጳርገፈ አድ ጵስደን ደእያ አንፆከ ጋክዶሶና። ሳምባታ ጋላስ አይሁደ ዎሳ ኬ ገልድ ኡትዶሶና። 15 ሙሰ ህገይነ ናበታ ማፃፋይ ናባበትዳፐ ጉየ አይሁደ ዎሳ ኬ ሀላቃት፥ "ኑ እሻቶ፥ አሳ ምንያ ቃል ህንተዉ ደእያኮ አሳስ ኦደርከት" ያግድ ኤንታኮ ኪትዶሶና።

16 ጳዉሎስ ደንድ ኤቅድ ባ ኩሸ ማልድ፥ "እስራኤለ አሳቶነ፥ ፆሳ ጎይንያ አይሁደ ግዶና አሳዉ፥ ስእተ። 17 ሀ እስራኤለ አሳ ፆሳይ ኑ ማይዛታ ዶርስ። ግብፀ ቢታን እማተን ኤንቲ ደእሽን፥ ኤንታ ዳርስድ ባ ግታ ዎልቃን ግብፀ ቢታፈ ኤንታ ከስስ።✝ 18 መላ ቢታን ኦይታሙ ላይ መላ ኤንታ ዳንዳእስ።✝ 19 ካናነ ቢታን አይሁደ ግዶና ላፑን ካዎተታ ድግድ ኤንታ ቢታ ባ አሳ ላትስስ።✝

20 "ሄሳፈ ጉየ፥ ናብያ ሳሜላ ዎደ ጋካናዉ ኦይዱ ፄታነ እሻታሙ ላይ መላ አይስያ ዳይናታ ኤንታዉ እሚስ።✝ 21 ሄሳፈ ጉየ፥ ኤንቲ ባንታዉ ካዎ እማና መላ ዎስን፥ ፆሳይ ብንያመ ሼሻፐ ቂሳ ናኣ፥ ሳኦላ ኦይታሙ ላይ ካዎታና መላ ኤንታዉ እሚስ።✝ 22 ፆሳይ ሳኦላ ሻርዳፐ ጉየ ኤንታ ቦላ ዳዊታ ካዎስ። ፆሳይ ዳዊታባ ማርካትሸ፥ ‘ታኒ ኮይያ ኡባ ታ ዎዛና መላ ኦያ እሰየ ናኣ ዳዊታ ደማስ’ ያግስ።✝

23 "ፆሳይ፥ ‘ታኒ ዳዊታ ሼሻፐ እስራኤለ ደርያ አሸይሳ ኤሀና’ ግዳይሳ መላ የሱሳ ኤህስ። 24 የሱሲ ያናፐ ስን እስራኤለ አሳ ኡባይ ባንታ ናጋራፐ ስሚድ ፃማቀታና መላ ዮሃንስ ቃላ ኦድስ።✝ 25 ቃስ ዮሃንስ ባ ኦሱዋ ዉርሳና ሀንሸ አሳኮ፥ ‘ታና ኦና ግድ ቆፔቲ? ታኒ ህንተ ናግያ ክርስቶሳ ግድከ፥ ሽን ታኒ እያ ጫማ ብርሻናዉ ታዉ በሶናይስ ታፐ ጉየራ ዬስ’ ያግስ።✝

26 "ታ እሻቶ፥ አብራሃመ ሼሻቶ፥ ቃስ ሀይሳን አይሁደ ግዶናሽን ፆሳስ ያየይሳቶ፥ ሀ አቶተ ቃላይ ኑስ ኪተትስ። 27 አይስ ጊኮ፥ የሩሳላመን ደእያ አሳይነ ኤንታ ሀላቃት የሱሳ ኤርቦኮና። ሳምባታ ኡባን ናባበትያ ናበታ ቃላ አኬክቦና ግሾ እያ ቦላ ፕርድድ ናበት ኦድዳ ቃላ ፖልዶሶና። 28 የሱሳ ዎሳናዉ እስ ጋሶይካ ኤንታዉ ይን ጵላፆስ እያ ዎና መላ ዎስዶሶና።✝ 29 ኤንቲ የሱሳባይ ጌሻ ማፃፋን ፃፈትዳባ ኡባ ፖልዳ ዎደ ማስቃልያፐ እያ ዎስድ ሞግዶሶና።✝ 30 ሽን ፆሳይ ሀይቆፐ የሱሳ ደንስ። 31 ሄሳፈ ጉየ፥ እ ባራ ጋልላፐ የሩሳላመ ይዳይሳታስ ዳሮ ቶሆ በንትስ። ኤንቲ ሀእ እያባ አሳስ ማርካቶሶና።✝

32 "ፆሳይ ኑ አዋታስ እማና ግዳ ዎንገላ ኑኒ ህንተዉ ኦዶስ። 33 ዳዊቲ ባ ማዝሙረ ማፃፋን ናምአን ሸምፑዋን፥

"ኔኒ፥ ታ ናአ፥

ታኒ ሀች ነና የላስ"

ጌተትድ ፃፈትዳይሳ የሱሳ፥ ፆሳይ ሀይቆፐ ደንድ ኑ ማይዛታስ እማና ግዳይሳ ኑስ ኤንታ ናይታስ ፖልስ።✝ 34 እ ዎቆና መላ ፆሳይ ሀይቆፐ እያ ደንን ኤርሳናዉ፥

" ‘ታኒ ዳዊታስ እማና ግዳ

አማነትዳ ጌሻ አንጁዋ ህንተዉ እማና’ ያግድ ኦድስ።✝

35 ሄሳ ግሾ፥ ማዝሙረ ማፃፋን ሀራ በሳን፥

" ‘ነ ጌሻ ናኣ አሀ ዎቅሳካ’ ያጌስ።✝

36 "ዳዊቲ ባ ዎደ ፆሳ ቆፋ ፖልዳፐ ጉየ ሀይቅድ ባ አዋታራ ሞገትድ ዎቅስ። 37 ሽን ፆሳይ ሀይቆፐ ደንዳይስ ዎቅቤና።

38 "ሄሳ ግሾ፥ ታ እሻቶ፥ ናጋራ አቶተይ የሱሳ ባጋራ ካሰትድ ህንተዉ ኦደትዳይሳ ኤርተ። ሙሰ ህገይ ናጋራፐ ፅልሳናዉ ዳንዳኤና። 39 ሽን የሱሳ አማንያ ኡባይ ናጋራፐ ፅሌስ። 40 ሄሳ ግሾ፥ ናበት ግዳይስ ህንተ ቦላ ጋኮና መላ ናገትተ።

41 " ‘ፆሳይ ግዳባ ለቅሰይሳቶ!

በእተ! ማላለትተ! ይተ!

ኦንካ ኦድን፥ ህንተ አማኖና ኦሱዋ

ታኒ ህንተ ዎድያን ኦና’ " ያግስ።✝

42 ጳዉሎስነ ባርናባስ አይሁደ ዎሳ ኬፈ ከይሽን፥ ካልያ ሳምባታን ሄሳ ጉጅድ ኦዳና መላ አሳይ ኤንታና ዎስዶሶና። 43 ሺቆይ ላለትዳፐ ጉየ፥ ዳሮ አይሁደትነ አይሁደታ አማኑዋን ገልድ ፆሳ ጎይንያ ዳሮት ጳዉሎሳነ ባርናባሳ ካልዶሶና። አማንዳይሳት ፆሳ አ ኬሀተን ምንድ ዳና መላ ኤንታ ዞርዶሶና። 44 ካልያ ሳምባታን ካታማን ደእያ አሳፐ ዳሮት ፆሳ ቃላ ስአናዉ ሺቅዶሶና። 45 ሽን አይሁደት ዳሮ አሳ በእዳ ዎደ ጳዉሎሳ ቃናትድ እያ ሃሳያ እፅድ እያ ጫይዶሶና።

46 ጳዉሎስነ ባርናባስ ያዮና፥ "ፆሳ ቃላይ ኮይሮትድ ህንተዉ ኦደታናዉ ኮሼስ። ሽን ህንተ ቃላ እፅድ መርና ደኡዋ ኤካናዉ ኑስ በሰና ግድ ህንተ፥ ህንተ ሁጰን ፕርድዳ ግሾ ህዛ ኑኒ አይሁደ ግዶናይሳታኮ ስሞስ። 47 ጋሶይካ ጎዳይ፥

" ‘አላመ ኩመይ ነ ባጋራ አታና መላ፥

ታኒ ነና አይሁደ ግዶና ደርያስ ፖኦ ኦስ’ ያግድ ኑና ኪትስ" ያግዶሶና።✝

48 አይሁደ ግዶናይሳት ሄሳ ስእዳ ዎደ ኡፋይትድ ፆሳ ቃላ ቦንችዶሶና። ቃስ መርና ደኡዋስ ዶረትዳ ኡባይ አማንዶሶና።

49 ጎዳ ቃላይ ሄ ቢታ ኡባ ጋክስ። 50 ሽን አይሁደት፥ አይሁደ ግዶና ፆሰ ጎይንያ ዱረ ማጫሳታነ ካታማን ደእያ ግታ አሳታ ጳዉሎሳ ቦላነ ባርናባሳ ቦላ ደንዶሶና። ሄ አሳት ኤንታ ጎዳ ዶምድ ባንታ ቢታፈ ከስዶሶና። 51 ሽን ጳዉሎሳራነ ባርናባሳራ እፀይሳታስ ማላ ግዳና መላ ባንታ ቶሁዋፐ ባና ፕትድ እቆንዮነ ካታማ ብዶሶና።✝ 52 ቃስ አንፆከን ደእያ አማነይሳት ጌሻ አያናንነ ኡፋይሳን ኩምዶሶና። ጳዉሎስ ዎንገላ ሳባካናዉ ብዳ ኮይሮ ኦግያ