1 ጰፅሮስነ ዮሃንስ አሳስ ኦድሽን ካህነ ሀላቃት፥ ፆሳ ኬ ናገይሳታ ሀላቃይነ ሳዱቃወት ኤንታኮ ይዶሶና። 2 ኤንቲ የሱሲ ሀይቆፐ ደንዶይሳነ እያ ጋሶን ሀይቆፐ ደንዶይ ደኤይሳ አሳ ታማርስዳ ግሾ ይሎትዶሶና። 3 ሄሳ ግሾ፥ ኤንታ ኦይክድ ሳእ ኦማርስዳ ግሾ ዎንታና ጋካናዉ ቃሾ ኬ ገልስዶሶና። 4 ሽን ቃላ ስእዳይሳታፐ ዳሮት አማንዶሶና። አማንዳ አደ አሳ ታይቦይ እቻሹ ሙኩሉኮ ብስ።

5 ዎንተ ጋላስ ደርያ ሃረይሳት፥ ጭማትነ፥ ህገ አስታማረት የሩሳላመን ሺቅዶሶና። 6 ሄ አሳ ግዶን ካህነ ሀላቃይ ሃን፥ ቃያፍ፥ ዮሃንስ፥ እስክንድረይነ ካህነ ሀላቃ ሶ አሳት ኡባይ ደኦሶና። 7 ሀዋረታ ባንታ ስንን ኤስድ፥ "አይብ ዎልቃን ዎይኮ ኦደ ሱንን ሀይሳ ህንተ ኦደቲ?" ያግድ ኦይችዶሶና።

8 ሄ ዎደ ጰፅሮስ ጌሻ አያናን ኩምድ፥ "ደርያ ሃረይሳቶ፥ ጭማቶ፥ 9 ሀች ሀ ዎበ አድያስ ኦሰትዳ ሎኦ ኦሱዋስነ እ ዋንድ ፓፅዳኮ ህንተ ኑና ኦይችኮ፥ 10 ማስቃልያ ቦላ ህንተ ካቅን፥ ፆሳይ ሀይቆፐ ደንዳ ናዝረተ የሱስ ክርስቶሳ ሱንን ሀ አደይ ፓፅድ ህንተ ስንን ኤቅዳይስ ህንተዉነ እስራኤለ አሳ ኡባስ ኤረቶ።

11 " ‘ግምበይሳት ቦርድ እፅዳ ሹቻይ፥

ጎዳ ፃጱዋ ምንያ፥

ኡባፈ አያ ሹቹ ግድስ።

ሄ ሹቻይ የሱሳ።’✝

12 ሄሳ ግሾ፥ አቶተ እያ ባጋራፐ አትሽን፥ ሀራ ኦደ ባጋራካ ባዋ። ኑኒ እያ ሱንን አታና መላ አሳ ኡባስ ፆሳይ ሳሎፐ ጋርሳን እምዳ ሀራ ሱን ባዋ" ያግስ።

13 ሺቅዳ አሳይ ጰፅሮስነ ዮሃንስ ምንዳ ምኖተ በእዳ ዎደ ኤንቲ ታማርቦና ጮ አስ ግድዳይሳ አኬክድ፥ ማላለትዶሶና፤ ኤንቲ የሱሳራ ደኤይሳ ኤርዶሶና። 14 ቃስ ፓፅዳ አደይ ጰፅሮሳራነ ዮሃንሳራ ኤቅዳይሳ አሳይ በእድ ግያባ ይዶሶና። 15 ሽን ጰፅሮሳነ ዮሃንሳ ካረ ከያና መላ ኦድ ባንታ ግዶን፥ 16 "ሀ አሳታ ኑ አይ ኦኖ? ኤንታ ኩሸን ኦሰትዳ ግታ ማላታይ የሩሳላመን ደእያ ኡባስ በንቴስ። ኑኒ ሄሳ ኤሮኮ ጋናዉ ዳንዳኦኮ። 17 ሽን ሀ ኦዳይ አሳ ግዶን ላለቶና መላ ህዛፐ ጉየ፥ ሀ አሳት የሱሳ ሱንን ኦደስካ ኦዶና መላ ምንድ ናግሳና" ያግድ ዞረትዶሶና።

18 ኤንታ ፄግድ፥ የሱሳ ሱንን ህዛፐ ኦዶና መላ ዎይኮ ታማርሶና መላ ኪትዶሶና። 19 ሽን ጰፅሮስነ ዮሃንስ ኤንታኮ ዛሪድ፥ "ፆሳስ ኪተታናይሳፈነ ህንተዉ ኪተታናይሳፈ ፆሳ ስንን አዉስ ሎኦኮ? አነ ህንተ ፕርድተ። 20 ኑኒ በእዳባነ ስእዳባ ኦዶና አጋናዉ ዳንዳኦኮ" ያግዶሶና።

21 ቢታ ጭማትነ ደርያ ሃረይሳት ካሰፐ ምን ናግስድ ኤንታ የድ አግዶሶና። አሳይ ሀንዳባስ ፆሳ ጋላትያ ግሾ ኤንታ ሴራናዉ ዳንዳእቦኮና። 22 ሄ ማላታን ሀርገፈ ፓፅዳ አድያስ ላይ ኦይታማፐ አስ።

23 ጰፅሮስነ ዮሃንስ ብርሸትድ ባንታ ዳቦታኮ ብድ፥ ካህነ ሀላቃትነ ጭማት ባንታኮ ግዳባ ኡባ ኤንታዉ ኦድዶሶና። 24 ኤንቲ ሄሳ ስእዳ ዎደ እስ ዎዛናን ግድድ ፆሳ ሀይሳዳ ያግድ ዎስዶሶና፦ "ኡባ ሃርያ ጎዳዉ፥ ሳሉዋ፥ ሳኣ፥ አባነ ኤንታ ግዶን ደእያ ኡባባ መዳይሶ፥✝ 25 ኔኒ ነ አይልያ፥ ኑ አዋ ዳዊታ ዶናን ጌሻ አያናን፥

" ‘ደረይ አይስ ይሎትዶና?

አሳይ አይስ ጮ ማቀትዶና?✝

26 ሳኣ ካዎትነ

ደርያ ሃረይሳት እስፈ ጎዳ ቦላነ

ክርስቶሳ ቦላ ደንድዶሶና’ ያጋዳሳ።

27 "ቱማካ፥ ሄሮዲስነ ጰንፀ ጵላፆስ አይሁደ ግዶና አሳራነ እስራኤለ አሳራ ነ ዶርዳ ነ ጌሻ ናኣ የሱሳ ቦላ ደንዳናዉ ሀ ካታማን ሺቅዶሶና።✝ 28 ቃስ ኔኒ ነ ዎልቃንነ ነ ሸንያን ኦና ጋዳ ቆፓ ኡትዳባ ኡባ ፖልዶሶና። 29 ሀእካ ጎዳዉ፥ ኤንታ ማንደ በአ፤ ኑኒ ነ አይለት ነ ቃላ ኩመ ዎዛናን ኦዳና መላ ኑና ዳንዳእሳ። 30 ነ ጌሻ ናኣ የሱሳ ሱንን ሀርጋንቾታ ፓናዉ፥ ኦራባይነ ማላታት ኦሰታና መላ ነ ኩሽያ ምጫ" ግድ ዎስዶሶና።

31 ኤንቲ ፆሳ ዎስዳፐ ጉየ፥ ሄ ኤንቲ ሺቅዳ በሳይ ቃፅስ። ኤንታ ኡባን ጌሻ አያን ኩምን ፆሳ ቃላ ምኖተን ኦድዶሶና።

32 አማነይሳት ኡባይ ቆፋንነ ዎዛናን እስኖ ግድዶሶና። ኤንቲ ባንታዉ ደእያባ ታባ ጎናሽን እስፈ ሻከቶሶና።✝ 33 ሀዋረት፥ ጎዳ የሱሲ ሀይቆፐ ደንድዳይሳ ግታ ዎልቃን ማርካቶሶና። ፆሳይ ኤንታ ኡባስ አ ኬሀተ ዳርስድ እሚስ። 34 ቢት ዎይኮ ኬ ደኤይሳት ኡባይ ባይዝ ኤክዳ ሚሽያ ኤህያ ግሾ፥ አማነይሳታ ግዶን መቶታንቾይ እሶይካ ባዋ። 35 ሚሸ ኤህድ ሀዋረታስ እሞሶና፤ ሄ ሚሽያ አሳስ ኮሽዳይሳዳ እሱዋስ እሱዋስ ሻክ ሻክ እሜስ።

36 ቆጵሮሳ ጌተትያ በሳን የለትዳ ዮሰፋ ጌተትያ ሌወ ሼሻፐ ግድዳ እሶይ ደኤስ። እያ ሱን ሀዋረት ባርናባሳ (ምን ናአ) ግዶሶና። 37 ባርናባስ ባዉ ደእያ ቢታ ባይዝድ ሚሽያ ኤህድ ሀዋረታስ እሚስ።