1 ሄ ዎደ ሳኦል ጎዳ ካለይሳታ ዎናዉ ማንድድ ካህነ ሀላቃኮ ብስ። 2 ጎዳ ኦግያ ካልያ አደነ ማጫ ደምኮ፥ ቃችሸ የሩሳላመ ኤሀናዉ፥ ዳማስቆን ደእያ አይሁደ ዎሳ ኬታስ ዳብዳበ ባዉ ፃፋና መላ ዎስስ።

3 እ ብድ፥ ዳማስቆ ካታማ ጋካናዉ ማትሽን፥ ቆፖና ሳሎፐ ዎልቃማ ፖኦይ እያ ዩሾን ፖእስ። 4 እ ሳአን ኩንድዳሽን፥ "ሳኦላ፥ ሳኦላ፥ አይስ ታና ጎዳይ?" ግያ ቃላ ስእስ።

5 ሳኦል፥ "ጎዳዉ፥ ኔኒ ኦኔ?" ያግድ ኦይችስ።

"ታኒ፥ ኔኒ ጎድያ የሱሳ" ያግስ።

6 ሽን ሳኦል ኮኮርሸነ ማላለትሸ፥ "ጎዳዉ፥ ታኒ አይ ኦና መላ ኮያይ?" ያግስ።

ጎዳይ እያኮ፥ "ደንዳዳ ካታማ ገላ፤ ኔኒ ኦናዉ በሲያባይ ያን ነዉ ኦደታና" ያግስ።

7 ሳኦላራ ኦገ ብያ አሳት አይኮካ ኦደቶና ኤቅ አትዶሶና። ቃላ ስኦሶና፥ ሽን ኦናካ በእቦኮና። 8 ሳኦል ኩንድዳ በሳፈ ደንድድ ፄልያ ዎደ እያ አይፈይ ደሞና እፅስ። ሄሳ ግሾ፥ ኤንቲ እያ ኩሽያ ኦይክድ ካለድ ዳማስቆ ገልስዶሶና። 9 ሄ ጋላስ ጋካናዉ እ ፄላናዉ ዳንዳእቤና፤ አይኮካ ምቤና፤ ኡይቤና።

10 ዳማስቆን እስ ሀናንያ ጌተትያ የሱሳ ታማረይ ደኤስ። ጎዳይ ቆንጨን፥ "ሀናንያ" ያግድ ፄግስ።

ሀናን ዛሪድ፥ "ታ ጎዳዉ፥ ሀይሳን ደአይስ" ያግስ።

11 ጎዳይ እያኮ፥ "ደንዳዳ ሱረ ጌተትያ ኦግያ ባዳ፥ ይሁዳ ሶን ሳኦላ ጌተትያ ታርሰሳፐ ይዳ ኡራ ኮያ፤ ሳኦል ዎሴስ። 12 ቃስ ሀናንያ ጌተትያ አደይ ገልድ፥ ሳኦል ናምአን ፄላና መላ ባ ኩሽያ እያ ቦላ ዎሽን ቆንጨን በእስ" ያግስ።

13 ሀናን ዛሪድ፥ "ጎዳዉ፥ የሩሳላመን ነ ጌሻ አሳ ቦላ ሄ ኡራይ አይ መላ ኢታባ ኦዳኮ ታኒ ዳሮ አሳፐ ስአስ። 14 ቃስ ዳማስቆን ነ ሱን ፄገይሳታ ኡባ ቃቻናዉ፥ ካህነ ሀላቃት እያዉ ማታ እምዶሶና" ያግስ።

15 ሽን ጎዳይ እያኮ፥ "ሳኦል አይሁደ ግዶና አሳ ስንን፥ ካዎታ ስንንነ እስራኤለ አሳ ስንን፥ ታ ሱን ኤርሳናዉነ ታዉ ኦናዉ ዶረትዳ ሚሸ ግድያ ግሾ ኔኒ እያኮ ባ። 16 አይስ ጊኮ፥ ታ ሱን ግሾ፥ እ አይ መላ ዋየ ኤካናዉ በሲያኮ ታኒ እያ በሳና" ያግስ።

17 ሀናን ብድ፥ ሶ ገልድ፥ ባ ኩሽያ ሳኦላ ቦላ ዎድ፥ "ታ እሻ ሳኦላ፥ ኔኒ ያ ኦግያን ነዉ በንትዳ የሱሲ፥ ኔኒ ፄላና መላነ ጌሻ አያናን ኩማና መላ ጎዳይ ታና ኪትስ" ያግስ። 18 ኤለስድ፥ ሳኦላ አይፈፐ እስ ፖቆ መላባይ ዎን፥ ሳኦል ናምአን ፄልስ። ቃስ ደንድድ ፃማቀትስ። 19 ካ ምድ ፃልድ፥ ዳማስቆን ደእያ አማነይሳታራ ጉ ጋላስ ጋምእስ።

20 ኤለስድ ሳኦል፥ "የሱሲ ፆሳ ናአ" ያግድ ዳማስቆን ደእያ አይሁደ ዎሳ ኬታን ቃላ ታማርስስ።

21 ሄሳ ስእዳ ኡባይ ማላለትድ፥ "ሀይስ የሩሳላመን የሱሳ ሱን ፄገይሳታ ቃቸይሳ ግደነዬ? ቃስ ሃ ይዳይ ኤንታ ቃችድ፥ ካህነ ሀላቃታ ስን ኤፋናሳ ግደኔ?" ያግዶሶና።

22 ሽን ሳኦል ቃላ ኦዶን ምን ምንድ ብስ። የሱሲ፥ እ ክርስቶሳ ግደይሳ ቆንጭስድ ኦድዳ ግሾ ዳማስቆን ደእያ አይሁደት እያዉ ዛርያባ ይዶሶና።

23 ዳሮ ጋላሳፐ ጉየ፥ አይሁደት ሺቅድ፥ ሳኦላ ዎናዉ ዞረትዶሶና።✝ 24 ሽን አይሁደት ባና ዎናዉ ቆፕዳይሳ ሳኦል ስእስ። ኤንቲ እያ ዎናዉ ቃማነ ጋላስ ካታማ ፐንገን ናጎሶና። 25 ሽን እያ ታማረት እያ ቃማ ኤፍድ፥ ግምበ ድርሳ ማስኮተራ ዳቾራ ዎስዶሶና።

26 ሳኦል የሩሳላመ ጋክዳ ዎደ አማነይሳታራ ጋሄታናዉ ኮይስ። ሽን እ ክርስቶሳ አማንዳይስ ኤንታዉ ቱማ ዳኖና እፅን እያዉ ያይዶሶና። 27 ሽን ባርናባስ ሳኦላ ሀዋረታኮ ኤፍስ። ኦገን ጎዳይ ዋንድ ቆንጭዳኮነ ኦድስዳኮ፥ ቃስ ሳኦል ዳማስቆን የሱሳ ሱንን ያዮና ዋትድ ቃላ ኦድዳኮ ኤንታዉ ጌሽድ ኦድስ። 28 ሳኦል የሩሳላመን ዩይድ ጎዳ ሱንን ያዮና ቃላ ኦድሸ፥ ሀዋረታራ እስፈ ደእስ። 29 ቃስ ሳኦል ግርከ ዶናን ሃሳያ አይሁደታራ ኦደትሸ ፓላሜስ። ሽን ኤንቲ እያ ዎናዉ ኮይዶሶና። 30 አማንያ አሳት ሄሳ ስእድ፥ ሳኦል ቅሳረ ኤፍድ ታርሰሳ የድዶሶና።

31 ይሁዳን፥ ጋልላንነ ሳማረ ኡባን ደእያ ዎሳ ኬት ሳሮተን ደእዶሶና። ቃስ ምንዶሶና፤ ጎዳስ ያይሸ ጌሻ አያና ምንን ዳር ዳርድ ብዶሶና።

32 ጰፅሮስ ቢታ ኡባ ዩይሸ ሊዳን ደእያ አማንያ አሳታኮ ጋክስ። 33 ያን ሆስፑን ላይ ኩመ ጉንድድ አርሳን ዝንእድ ደእያ ኤንያ ጌተትያ አድያ ደምስ። 34 ጰፅሮስ፥ "ኤንያ፥ የሱስ ክርስቶሲ ነና ፓና፤ ደንዳዳ ነ ሂፃ ደን" ያግስ። እካ ኤለስድ ደንድ ኤቅስ። 35 ሊዳንነ ሳሮናን ደእያ አሳ ኡባይ ኤንያ በእድ፥ ጎዳኮ ስምዶሶና።

36 ዮጰ ካታማን እስ ፃብቶ ጌተትያ አማንያራ ደአዉሱ። እ ሱንይ አራምከ ዶናን፥ "ፃብቶ"፤ ግርከ ዶናን፥ "ዶርቃ"፤ ሄ ናምኡ ሱን ብርሸይ "ገንኤ" ጉሱ። እያ ባ ደእዳ ዎደ ኡባን ሎኦባ ኦሸነ ማንቆታ ማዳሸ ደአሱ። 37 ሄ ዎደ እያ ሀርጋዳ ሀይቅን፥ አሳይ እ አሀ ሜጭድ፥ ፖቀ ቦላ ከስድ ዝንእስዶሶና። 38 ሊደይ ዮጰስ ማታ። አማነይሳት ጰፅሮስ ሊዳን ደኤይሳ ስእድ፥ "ሀያና ኑኮ ኤለሳዳ ያ" ያግድ ናምኡ አሳታ እያኮ ኪትዶሶና።

39 ሄሳ ግሾ፥ ጰፅሮስ ደንድድ፥ ኤንታራ ብስ። ያ ጋክን፥ ፖቀ ቦላ ደእያ ክፍለ እያ ገልስዶሶና። አምኤት ጰፅሮሳ ዩሾን ኤቅድ ዬክሸ ዶርቃ ኤንታራ ፓፃ ደአሸ ኦዳ ቃምሰታነ አፍላታ ኡባ ጰፅሮሳ በስዶሶና። 40 ጰፅሮስ ኤንታ ኡባ ካረ ከስድ፥ ጉልባትድ ዎስስ። ቃስ አሃኮ ስሚድ፥ "ፃብተ፥ ደንዳ" ያግስ። ፃብታ ባ አይፍያ ዶያዳ ጰፅሮሳ በአዳ፥ ደንዳ ኡታሱ። 41 ጰፅሮስ እዮ ባ ኩሸን ማድድ ደንድ ኤስስ። ሄሳፈ ጉየ፥ አማነይሳታነ አምኤታ ፄግድ፥ ደንድዳሮ ኤንታ ስን ሺሽስ።

42 ሀ ኦዳይ፥ ዮጰ ካታማ ኡባ ጋክስ፤ ዳሮ አሳይ ጎዳ አማንዶሶና። 43 ጰፅሮስ ዮጰን ስሞና ጌተትያ ጋልባ ሃሸይሳ ሶን ዳሮ ጋላስ ጋምእስ።