1 ህዛ፥ ህንተ ክርስቶሳራ ሀይቆፐ ደንድዳይሳዳ፥ ፆሳፈ ኡሻቻ ባጋን ኡትዳ ክርስቶስ ደእያ በሳን፥ ሳሎን ደእያባታ ኮይተ።✝ 2 ሳሎን ደኤይሳታ ቦላ ህንተ ቆፋ ዎተፐ አትሽን፥ ሳአን ደእያባታ ቦላ ዎፍተ። 3 ህንተ ሀይቆን ሻከትዳ መላ ሀ አላምያፐ ሻከትደታ። ህንተ ደኦይ ክርስቶሳራ እስፈ ፆሳን ጌምስ። 4 ህንተዉ ደኦ ግድዳ ክርስቶስ ቆንጭያ ዎደ ሄ ዎደ ህንተካ እያራ ቦንቾን ቆንጫና።

5 ሄሳ ግሾ፥ ህንተናን ደእያ አላመ አሞታ ዎተ። ሄሳትካ ላይማተ፥ ቱናተ፥ ላይማታናዉ አሞተ፥ ኤቃ ጎይኖ መላ ግድዳ ኡዘተ። 6 ሀይሳታ ጋሶን ፆሳ ሀንቆይ ኪተቶና አሳ ቦላ ያና። 7 ህንተካ ካሰ ሄ ኢታ ኦግያን ብያ አሳ ግዶን ደእሸ ሀይሳታ ኦደታ።

8 ሀእ ህንተ ሄሳታ ኦፍተ። ቃስ ሀንቆ፥ እፆ፥ ካች፥ ዝግርስነ ቦርሶ ኦዳ ህንተፈ ድግት። 9 ጬጋ አሳተ እያ ኦሱዋራ ህንተፈ ቃርዳ ግሾ፥ እሶይ እሱዋስ ዎርዶቶፕተ።✝ 10 ፆሳ መ ዳንያ፥ ኤራተን ላመትዳ ኦራ አሳተ ማእተ።✝ 11 ሀ ኦራ መተን፥ ግርከ አስ ዎይኮ አይሁደ አስ፥ ቃፃረትዳይ ዎይኮ ቃፃረቶናይ፥ ባርባረ አስ* ዎይኮ እስኩተ አስ* አይለይ ዎይኮ ዎማኖይ ባዋ። ክርስቶስ ኡባ፤ እ ኡባን ደኤስ።

12 ሄሳ ግሾ፥ ፆሳን ዶረትዳ አሳዳ ጌሻታነ ዶሰትዳይሳታ ግድድ፥ ማሮተ፥ ኬሀተ፥ አሽከተነ ዳንዳአ ማእተ።✝ 13 እሶይ እሱዋ ዳንዳእተ። ኦንካ ባ ላግያን ቆሄትዳባይ ደእኮ እያዉ አቶ ጎ። ጎዳይ ህንተዉ አቶ ግዳይሳዳ ህንተካ ዎልስ አቶ ጊተ።✝ 14 ሄ ኡባ ቦላ ኡባባ እስፈ ሺሽድ ቃችያ ሲቆ ማእተ። 15 ፆሳይ ህንተና እስ አስ ኦድ ፄግዳይ፥ ሳሮተስ ግድያ ግሾ ክርስቶሳ ሳሮተይ ህንተ ዎዛና ሃሮ።

16 ክርስቶሳ ቃላይ ህንተ ዎዛናን ኩምድ ደኦ። ጭንጫተ ኡባን እሶይ እሱዋ ታማርስተነ ዞርተ። ማዝሙረን፥ ሳባንነ አያና የን ፆሳ ዎዛናፐ ጋላትሸ የፅተ።✝ 17 ፆሳ አዋ የሱሳ ባጋራ ጋላትሸ ህንተ ኦደትያባ ዎይኮ ኦያባ ኡባ ጎዳ የሱሳ ሱንን ኦተ።

18 ማቸቶ፥ አማንያ አሳስ በሲያባ ግድያ ግሾ፥ ህንተ አዝናታስ ሃረትተ።✝

19 አዝናቶ፥ ህንተ ማቸታ ሲቅተ፤ ኤንታዉ ኢቶፕተ።✝

20 ናይቶ፥ ህንተና የልዳይሳታስ ኡባባን ኪተትተ፤ ሄስ ጎዳ ኡፋይስያባ።✝

21 አዋቶ፥ ህንተ ናይት ኡፋይስ ቃንፆና መላ ኤንታ ጫመፍተ።✝

22 አይለቶ፥ ሳአን ህንተዉ ጎዳ ግድዳይሳታስ ኡባባን ኪተትተ። ጎዳ ቦንችሸ ሱረ ዎዛናፐ ኪተትድ ኤንታ ኡፋይስተፐ አትሽን፥ አስ በኦ ግድ ኦፍተ።✝ 23 ህንተ ኦያ ኦሶ ኡባ አሳስ ግዶናሽን፥ ጎዳስ ኦያ መላ ዎዛናፐ ኦተ። 24 ጎዳፐ ላታ ዎይቶ ኦድ ህንተ ኤከይሳ ኤርተ፤ ህንተ ጎዳ ክርስቶሳ ሀጋዜታ። 25 ፆሳይ አሳ ሶምኦ በእድ ፕርዶና ግሾ፥ ኦንካ ኢታ ኦሶ ኦኮ ባ ኢታ ኦሱዋ ግሾ ዛሮ ኤካና።✝