ዳነል አሙሆን በእዳ አድያ
1 ፋርሰ ካዎይ ቅሮስ ካዎትዳ ሄን ላይን፥ ብልፃሶራ ጌተትያ ዳነል ሀራ ቆንጨ በእስ። ሄ ቆንጨይ ቱማ፤ ቆንጭዳባይ ዎልቃማ ኦላባ። ሄ ቆንጨ ኤራና መላ አኬክ እያዉ እመትስ።
2 ሄ ዎደ ታኒ፥ ዳነል፥ ሄ ሳምንታ ዬካስ። 3 ሄ ሳምንታይ ዉራና ጋካናዉ ካ ማብከ፤ አሾይ ዎይኮ ዎይነ ኡሽ ታ ዶናኮ ሺቅበና፤ ታ ሁጵያ ትየታብከ 4 ኮይሮ አጌናን ላታማነ ኦይዳን ጋላሳን፥ ግታ ፀግሮሳ ሻፋ ማታን ኤቃስ። 5 ታኒ ፄልያ ዎደ ሊኖ ማኦ ማእዳ እስ አድያ በአስ። እ ባ ፄሳን አፌዛ ዎርቃፈ ኦሰትዳ ዳንጮ ዳንጭስ። 6 እያ አሳተይ ጶልያ አልኦ ሹቹ ዳኔስ፤ እያ ሶምኦይ ዎልአን መላ ዎልአሜስ፤ እያ አይፈይ ታማ ላጮ ዳኔስ፤ እያ ኩሸይነ እያ ቶሆይ ቁሸትዳ ናሰ ብራታዳ ፖኤስ፤ እያ ቃላይ ዳሮ አሳ ግርሳዳ ኮሽሜስ።
7 ሀ ቆንጨ ታኒ፥ ዳነል ታርካ በአስ። ታራ ደእያ አሳይ በእቦኮና፤ ኤንቲ ዳሮ ዳጋምዳ ግሾ ባቃትድ ቆሰትዶሶና። 8 ታኒ ሀ ግታ ቆንጨ በአሸ፥ ታርካ አታስ። ታዉ ዎልቅ እፅን ዳቡራስ፤ ታ ሶምኦይ ቡላትስ። 9 ታኒ እያ ኮሽንቻ ስእዳ ዎደ ሳአን ታ ሶምኡዋራ ጉፋናዳ፥ ታና ባላ አጋስ።
10 ሄሳፈ ጉየ፥ እስ ኩሸይ ታና ቦችስ፤ ታኒ ኮኮራሽን፥ ታ ኩሽያንነ ታ ጉልባታን ታና ደንድ ኤስስ። 11 እ ታኮ፥ "ዳሮ ዶሰትዳ ዳነላ፥ ታኒ ነዉ ኦድያ ቃላ ሎይዳ አኬካ፤ ደንዳ ኤቃ። ታኒ ኪተታዳ ኔኮ ያስ" ያግስ። እ ታኮ ሀይሳዳ ግን፥ ታኒ ኮኮራሸ ደንዳ ኤቃስ።
12 ቃስካ፥ "ዳነላ፥ ያዮፋ! ኔኒ አኬካ ደማናዉ ቆፓዳ፥ ነ ፆሳ ስንን ነናተ ካዉሽዳ ኮይሮ ጋላሳፐ ዶምድ፥ ነ ዎሳይ ስኤትስ፤ ታ ነዉ ዛሮ ኤካዳ ያስ። 13 ሽን ፋርሰ ካዎተ ሀላቃ ግድዳ አያናይ ላታማነ እስ ጋላስ ታና ተቅስ። ታኒ፥ ታርካ ፋርሰ ካዎተ ሀላቃራ ያን አትዳ ግሾ፥ ኪታንቾታ ሀላቃታፐ እሶይ፥ ምካኤል፥ ታና ማዳናዉ ይስ።10:13 ቆን 1:13-15. 14 ሀ ቆንጨይ ስንፈ ሀናናባ በሲያ ግሾ፥ ታኒ ኔኮ ይዳይ፥ ዉርሰ ጋላሳን ነ አሳ ቦላ ሀናናዉ ደእያባ ነዉ ቆንጭሳናሳ" ያግስ።
15 እ ሄሳ ታዉ ኦድያ ዎደ፥ ታኒ ሳአን ጉፋናዳ፥ ጋናባ ያስ። 16 ሄሳፈ ጉየ፥ አሰ ዳንያ እሶይ ታ መተርሻ ቦችስ፤ ታ ዶናይ ዶየትን፥ ኦደተ ዶማስ። ታ ስንን ኤቅዳይሳኮ፥ "ታ ጎዳዉ፥ ሀ ቆንጨይ ታና ዳሮ ዳጋንዳ ግሾ ዳሮ ዳቡራስ። 17 ታኒ ነ አይለይ፥ ኔራ፥ ታ ጎዳራ ዋናዳ ኦደታናዉ ዳንዳአይና? ታ ዎልቃይ ዉርስ፤ ሸምፓናዉካ ታዉ እፀትስ" ያጋስ።
18 ሄ አሰ ዳንያ እሶይ ናምአን ታና ቦችድ፥ ታዉ ዎልቃ እሚስ። 19 እ ታኮ፥ "ዳሮ ዶሰትዳ አድያዉ ያዮፋ! ሳሮይ ነዉ ግዶ። ምና፤ ፃላ" ያግስ።
እ ሄሳ ግድ ታና ምንን፥ ታኒ ምናዳ፥ "ታ ጎዳዉ፥ ኔኒ ታና ምንዳ ግሾ ታዉ ኦዳ" ያጋስ።
20 እ ዛሪድ፥ "ታኒ ኔኮ አይስ ይዳኮ ነ ኤራይ? ሀእ ታ ስማዳ ፋርሰ ሀላቃ ግድዳ አያናራ ኦለታናዉ ባና፤ ታኒ ቢኮ ግርከ ሀላቃ ግድዳ አያናይ ያና። 21 ሽን ቱማ ማፃፋን ፃፈትዳባ ታኒ ነዉ ኦዳና። ታኒ ኤንታራ ኦለትያ ዎደ፥ ህንተ ሀላቃ ምካኤላፐ አትሽን፥ ታና ማድያ ሀር ባዋ።"