ዳነላ ማፃፋ 5

ካዋ ብልፃሶራ ግብራ

1 እስ ጋላስ ካዎይ ብልፃሶር ሙኩሉ ግድያ ባ ሹማታስ ግብራ ጊግስድ፥ ኤንታራ እስፈ ዎይነ ኡሻ ኡይስ። 2 ብልፃሶር ዎይነ ኡሻ ኡይድ ማትዳ ዎደ፥ እያ አዋይ ናቡካዳናፆር የሩሳላመን ደእያ ፆሳ ኬፈ ኤህዳ ዎርቃፈነ ብራፐ ኦሰትዳ ኡሻ ሚሸታ ኤሀና መላ ኪትስ። እ ሄሳ ኦዳይ እ፥ እያ ሹማታስ፥ እያ ማቸትነ እያ ላገት ኡሻ ሄ ሚሸታን ኡያናዉ ኮይዳ ግሾሳ። 3 ኤንቲ የሩሳላመን ደእያ ፆሳ ኬፈ ኤህዳ ዎርቃፈ ኦሰትዳ ኡሻ ሚሸታ ካዋስ ኤህዶሶና። ያትን ካዎይ፥ እያ ሹማት፥ እያ ማቸትነ እያ ላገት ሄ ሚሸታን ትገትዳ ዎይነ ኡሻ ኡይዶሶና። 4 ኤንቲ ሄ ዎይነ ኡሻ ኡይሸ፥ ዎርቃፈ ብራፐ፥ ናሰ ብራታፐ፥ ብራታፐ፥ ምፈነ ሹቻፈ ኦሰትዳ ፆሳታ ጋላትዶሶና።

5 ሄ ዎደ ቆፖና ደእሽን፥ አሳ ኩሸ ብራት ከይድ፥ ፆምፐ ዎያ ኮጫ ስንን፥ ሜሸትዳ ካዎ ጋ ጎዳ ቦላ ፃፍዶሶና። ሄ ኩሸይ ፃፍያ ዎደ ካዎይ በእስ። 6 ሄ ዎደ እያ ሶምኦይ ላመትድ፥ ብዶ ግድስ፤ ያሻን እያ ጋደይ ኮኮርስ፤ እያ ጉልባታይ እፅስ።

7 ካዎይ ባ ቃላ ቁ ኦድ፥ ሙራንቾታ፥ ማሮታነ ፆልንቶ ፓይደይሳታ ኤሀና መላ ኪትስ። እ፥ ባብሎነ ጭንጫታኮ ሀይሳዳ ያግስ፦ "ሀ ፁፍያ ናባብድ፥ እያ ብርሸ ታዉ ኦድያ ኦንካ፥ ኦቻ ቴራ ዳንያ ማኡዋ ማአና፤*5:7 ኦቻ ቴራ ዳንያ ማኡዋ ማአና፦ ሀ ማኦይ ዳሮ አልኦነ በን ዎደ ካዎት ማእያ ማኦ። እያ ቆን ዎርቃ አና፤ እ፥ ታ ካዎተ ሃርያ ሄን አስ ግዳና" ያግስ።

8 ባብሎነ ጭንጫት ኡባይ እያ ስን ይዶስና፤ ሽን ኤንታፈ ኦንካ ሄ ፁፍያ ናባባናዉ ዎይኮ እያ ብርሸ ኦዳናዉ ዳንዳእቤና። 9 ካዎይ ብልፃሶር ካሰይሳፈ አድ ዳጋምን፥ እያ ሶምኦይ ካሰይሳፈ አድ ብዶ ግድስ። እያ ሹማት ሀንያባ ይዶሶና።

10 እያ አይያ፥ ካዋነ እያ ሹማታ ፓላማ ስአዳ፥ ኤንቲ ግብራ ምያ ኬ ገላዳ፥ ሀይሳዳ ያጋሱ፦ "ካዋዉ፥ መርናዉ ካዎታ! ሀ ቆፋን ዳሮ ዳጋሞፋ፤ ነ ሶምኦይ ላመቶፎ። 11 ጌሻ ፆሳታ አያን እያ ቦላ ደእያ፥ እስ አስ ነ ካዎተ ግዶን ደኤስ። እያዉ ኤራተ፥ አኬክነ ጭንጫተ ደኤስ። ካሰ ነ አዋይ፥ ካዎይ ናቡካዳናፆር እያ፥ ማሮታ፥ ሙራንቾታ፥ ብታንቾታነ ፆልንቶ ፓይደይሳታ ሀላቃ ኦድ ሹምስ። 12 እ፥ ሎኦ አያን፥ ኤርነ አኬክ ደእያ አሰ። እ አሙሆ ብርሻናዉ፥ ቃንእሸ ኦዳናዉነ ፁራ ቆንጭሳናዉ ዳንዳኤስ። ካዎይ ብልፃሶራ ግድ ሱንዳ ዳነላ ፄጋ። እ ነዉ ፁፍያ ብርሸ ኦዳና" ያጋሱ።

13 ሄ ዎደ ዳነላ ካዋኮ ኤህን፥ ካዎይ እያኮ ሀይሳዳ ያግስ፦ "ዳነል ነኔ? ታ አዋይ፥ ካዎይ ይሁዳፐ ድእድ ኤህዳይሳታፐ እሶይ ነኔ? 14 ፆሳታ አያን ነናን ደኤይሳ፥ ኤር፥ አኬክነ ጭንጫተ ነዉ ደኤይሳ ታ ስአስ። 15 ሀ ፁፍያ ናባባናዉነ እያ ብርሸ ታዉ ኦዳናዉ ሙራንቾትነ ጭንጫት ይዶሶና፤ ሽን ኤንቲ ታዉ ብርሸ ኦዳናዉ ዳንዳእቦኮና። 16 ኔኒ ብርሸ ኦዳናዉነ ዴፆ ኦይሻ ኡባ ዛራናዉ ዳንዳኤይሳ ታ ስአስ። ህዛ ነ ሀ ፁፍያ ናባባናዉነ እያ ብርሸ ታዉ ኦዳናዉ ዳንዳእኮ፥ ኦቻ ቴራ ዳንያ ማኡዋ ማይዛና፤ ነ ቆን ዎርቃ አና፤ ኔኒ፥ ካዎተ ሃርያ ሄን አሰ ግዳና።"

17 ዳነል ካዋስ ዛሪድ፥ "ነ እሞይ ነዉ ግዶ፤ ነ ዎይቱዋ ሀራ አሳስ እማ። ግዶሽን፥ ታኒ ፁፍያ ካዋስ ናባባና፤ ብርሸካ ኦዳና።"

18 "ካዋዉ፥ ኡባፈ ቃ ፆሳይ ነ አዋ ናቡካዳናፆራስ ካዎተ፥ ግታተ፥ ቦንቾነ ቴማ እሚስ። 19 እያ ግታተ ጋሶን ደረይ፥ ካዎተትነ ዱማ ዱማ ዶናን ኦደትያ ኮቻት እያዉ ያሻን ኮኮርዶሶና። እ ዎናዉ ኮየይሳ ዎስ፤ አሻናዉ ኮየይሳ አሼስ፤ ሹማናዉ ኮየይሳ ሹሜስ፤ ካዉሻናዉ ኮየይሳ ካዉሼስ። 20 ሽን እ ኦቶርትዳ ዎደነ እያ ዎዛናይ ሙምዳ ዎደ፥ ባ አራታፐ ዎስ፤ እያ ቦንቾይካ ቃረትስ። 21 አሳ ግዶፈ ጎደትስ፤ እያ ካሀይ ላመትን ዶአ ግድስ። ቦራዳ ማታ ምሸ ደምባ ሀረታራ እስፈ ደእስ። እያ አሳተይ ሳሎ አካን ላክስ። ሄስ ሀንዳይ፥ ኡባፈ ቃ ፆሳይ አሳ ናይታ ካዎተ ኡባ ሃረይሳነ ባ ኮይዳይሳስ እመይሳ እ ኤራና መላሳ።

22 "ሽን ብልፃሶራ፥ ኔኒ እያ ናአይ፥ ሀ ኡባ ኤራሸ ነ ነናተ ካዉሻባካ። 23 ቃስ ሳሎ ጎዳ ቦላ ኦቶርታዳ፥ ነናተ ቁ ቁ ኦዳሳ። እያ ኬፈ ቦንቀትድ ይዳ ዎርቃ ሚሸታን ኔኒ፥ ነ ሹማት፥ ነ ማቸትነ ነ ላገት፥ ዎይነ ኡሻ ኡይደታ። ቃስ ፄላናዉ፥ ስአናዉነ ኤራናዉ ዳንዳኦና ብራፐ፥ ዎርቃፈ፥ ናሰ ብራታፐ፥ ብራታፐ፥ ምፈነ ሹቻፈ ኦሰትዳ ፆሳታ ጋላትደታ። ነ ደኡዋነ ነ ኦግያ ባ ኩሸን ኦይክዳ ፆሳ ቦንቻባካ። 24 ሄሳ ግሾ፥ ኩሸ ብራት እያፐ ኪተትን፥ ሀ ፁፈይ ፃፈትስ።

25 "ፁፈይ፥

‘ማነ፥ ማነ፥ ተቀል፥ ፓረስ’ ያጌስ።

26 "አራምከ ዶናን እያ ብርሸይ ሀይሳ።

ማነ፦ (ታይበትስ) ‘ፆሳይ ነ ካዎታ ላይ ታይብድ ዉራናዳ ኦስ’ ጉሱ።

27 ተቀል፦ (ማዛነትስ) ‘ምዛነን ማዛነታዳ፥ ካዉያዳ በንታዳሳ’ ጉሱ።

28 ፓረስ፦ (ሻከትስ) ‘ነ ካዎተይ ሻከትድ ሜዶናስነ ፋርሰስ እመትስ’ " ጉሱ።

29 ሄ ዎደ፥ ብልፃሶራ ኪታን፥ ኦቻ ቴራ ዳንያ ማኡዋ ዳነላ ማይዝዶሶና፤ እያ ቆን ዎርቃ አዶሶና፤ ቃስ ካዎተ ሃርያ ሄን አስ ግዳና መላ አዋጅዶሶና።

30 ሄ ዎደ ቃማ ሞርከት ገልድ፥ ባብሎነ ካዋ ብልፃሶራ ዎዶሶና። 31 እያ ካዎተ፥ ላይ ኡሱፑን ታማነ ናምአ ግድዳ ሜዶና አደይ ዳርዮስ ኤክስ።