1 "ሜዶና አስ ግድዳ ዳርዮስ፥ ካዎትዳ ኮይሮ ላይን፥ ታኒ እያ ማዳናዉነ ምንናዉ እያ ምየን ኤቃስ።"
ፑደሀነ ዱገሀ ካዎታ
2 "ህዛ ታ ነዉ ቱማ ኦዳይስ። ሀራ ሄ ካዎት ፋርሰ ቢታን ካዎታና፤ ኤንታፈ ጉየ ካዎትያ ኦይዳን ካዎይ፥ ሀንኮታፐ አዳ ዱረ ግዳና። እ ባ ዱረተ ጋሶን ዎልቃ ደምያ ዎደ፥ አሳ ኡባይ ግርከ ካዎተራ ኦለታና መላ ደንና።
3 "ሄሳፈ ጉየ፥ ዎልቃን ሃርያ ምኖ ካዎይ ደንድድ፥ ባ ኮይዳባ ኡባ ኦና። 4 እ ዎልቃን ምንዳ ዎደ እያ ካዎተይ ላለትድ፥ ኦይዱ በሳን ሻከታና። እያ ኮቻት እያ ካዎተ ላቶኮና፤ ካዎተይ እ ካሰ አይሰይሳዳ ዎልቃማ ግደና፤ እያ ካዎተይ እያፐ ኤከትድ፥ ሀራታስ እመታና።
5 "ዱገሀ ቢታ ካዎይ ምኖ ግዳና፤ ሽን እያ ሹማታፐ እሶይ እያፐ ዳሮ ምንድ፥ ሄ ግታ ካዎተ ሃራና። 6 ጉ ላይፈ ጉየ፥ ዱገሀ ቢታ ካዎይነ ፑደሀ ቢታ ካዎይ ባንታ ግዶን ዳቦተ ጫቆ ጫቀታና። ዱገሀ ቢታ ካዋ ናእያ ፑደሀ ቢታ ካዋ ገላና፤ ሽን እ ዎልቃይ ምነና፤ ቃስ እካ እያ ዎልቃይካ ዳሮ ዎደ ጋምኤና። ሄ ዎደ፥ ኢራ እስፈ፥ እዮ ማደይሳት፥ እ ናአይነ እ አዝናይ፥ ኡባይ አድ እመታና።
7 "ጉ ዉደፐ ጉየ፥ እ ዳቦታፐ እሶይ ዱገሀ ቢታን ካዎታና። ፑደሀ ቢታ ካዋ ቦላ ደንዳና፤ እያ ሚፃ መን ገልድ እያ ፆናና። 8 ቃስ ኤንታ ፆሳታ፥ ምስለታነ ብራፐነ ዎርቃፈ ኦሰትዳ ሚሸታ ኤክድ፥ ግብፀ ኤፋና። ጉ ዎደስ ፑደሀ ቢታ ካዋ ኦላናዉ ደንደና። 9 ፑደሀ ቢታ ካዎይ ዱገሀ ቢታ ካዋ ቦላ ደንዳና፤ ሽን ባ ይዳ ኦግያራ ጉየ ስማና።
10 "ፑደሀ ቢታ ካዋ አደ ናይት ኦላስ ጊግድ፥ ዳሮ ኦላንቾታ ሺሻና። ኤንታራ ጋሄትያባ ኡባ ሜጭድ ኤፍያ ዎልቃማ ድኦዳ ካንድ አና፤ ዛር ኦልድ ዱገሀ ካዋ ሚፃ ጋካናዉ ባና። 11 ሄ ዎደ ዱገሀ ቢታ ካዎይ ዳሮ ሀንቀትድ፥ ፑደሀ ቢታ ካዋ ኦላናዉ ደንዳና። ፑደሀ ቢታ ካዎይ ሺሽዳ ዳሮ ኦላንቾታራ ኦለትድ፥ ኤንታ ፆናና። 12 ዳሮ ኦላንቾታ ድእዳፐ ጉየ፥ ኦቶሮን ፑነታና። ዳሮ ሙኩሉ አሳ ዎና፤ ሽን እያ ፆኖይ እያራ ጋምኤና።
13 "ፑደሀ ቢታ ካዎይ ካሰይሳፈ አያ ሀራ ኦላንቾታ ጊግሳና። ጉ ላይ ጋምእዳፐ ጉየ፥ ኩመ ኦላ ሚሸ ኦይክዳ፥ ኦላንቾታ ኤክድ ኦላስ ከያና። 14 ሄ ዎደ ዳሮ አሳይ ዱገሀ ቢታ ካዋ ቦላ ደንዳና። ቆንጨይ ፖለታና መላ ነ አሳፐ እስ እስ ማካላንቾት ደንዳና፥ ሽን ኤንቲ ፆኖኮና። 15 ፑደሀ ቢታ ካዎይ ዱገሀ ቢታ ይድ፥ ዩሾይ ግምበትዳ እስ ካታማ ኦልድ ኦይካና። ዱገሀ ቢታ ካዋ ኦላንቾት ዎልቃ ያና፤ ሀር አቶሽን፥ ኤንታፈ ምኖ ኦላንቾትካ ኤንታራ ኤቀታናዉ ዳንዳኦኮና። 16 እያራ ኤቀታናዉ ዳንዳኤይ ባይና ግሾ ፑደሀ ቢታ ካዎይ ባ ኮይዳባ ኡባ ኦና። እ ዶረትዳ ቢታን ምን ኤቅድ፥ እያ ይስያ ዎልቃ ደማና። 17 እ ባ ካዎተን ደእያ ዎልቃ ኡባ ኤክድ ያናዉ ሀልቻና፤ ዱገሀ ቢታ ካዉዋራ ዳቦተ ጫቆ መና። ሄ ካዎተ ይሳናዉ ሀልችድ፥ ባ ናእዉ እያዉ እማና፥ ሽን እያ ሀልቾይ ፖለተና። 18 ባ ሶምኡዋ ዩሾይ አባን ተቀትዳ ቢታታኮ ዛሪድ፥ ኤንታፈ ዳሮታ ኦልድ ባዉ ኤካና። ሽን እስ ቶራ ሞጮናይ እያ ፆንድ እያ ኦቶሩዋ ጊሻና፤ እያ ኦቶሮ ኦዳ እያ ቦላ ዛራና። 19 ፑደሀ ቢታ ካዎይ ባ ቢታ፥ ባ ሚፃኮ ስማና። ሽን እ በትድ ኩንዳና፤ እያ ናምአን ኦንካ በኤና።
20 "እያ በሳን ካዎትያ ሀራ ካዎይ ባ ካዎተ ቦንቹዋ ናጋናዉ ጊራ ጊርስያ አሰ ካዎተ ግዶ ኪታና። ግዶሽን፥ ጉ ዎደፐ ጉየ፥ ቆንጨን ዎይኮ ኦላን ግዶናሽን፥ እ ጮ ሀይቅድ ያና።
21 "እያ በሳን እስ ካትዳ አስ ደንዳና፤ ሽን ኤንቲ እያዉ ካዎተ ቦንቾ እሞኮና። አሳይ ሳእ ሳሮ ግድ ኡትዳሽን፥ ጭምድ ካዎተ ኦይካና። 22 ዳሮ ኦላንቾት እያ ስንፈ ፕተትድ ያና፤ ጫቆ ሀላቃይካ ሀይቃና። 23 እያራ ጫቁዋ ጫቅ ስሚድ፥ ባ ኦያባ ጭሞን ኦና፤ ጉ አሳታ ፃላላራ እ ምናና። 24 አሳይ ሳእ ሳሮ ግድ ኡትዳሽን፥ ሄ ቢታን እ፥ ዳሮ ዱረ ግድዳ እስ ባጋ ኦይካና። ካሰ እያ አዋይ ዎይኮ እያ ማይዛይ ኦቦናባ ኦና፤ እ ድእድ ሺሽዳ ዱረተነ አቁዋ ባና ካለይሳታስ ግሻና። እ ሚፃታ ላላናዉ ሀልቻና፤ ሽን ሄስ ሀናናይ ጉ ዎደሳ። 25 ባ ዎልቃ ምንድ፥ ዳሮ ኦላንቾታራ ዱገሀ ቢታ ካዋ ቦላ ደንዳና። ዱገሀ ቢታ ካዎይ ዳሮነ ዎልቃማ ኦላንቾታራ ኦላስ ደንድድ፥ እያራ ኦለታና። ሽን እያ ቦላ ኤንቲ ማቅዳ ማቁዋ ጋሶን፥ እ ኤንታራ ኤቀታናዉ ዳንዳኤና። 26 ካዉዋራ እስ ጋይታን መይሳት እያ ይሳና፤ እያ ኦላንቾት ፕተታና፤ ዳሮት ኦላን ሀይቃና። 27 ሀ ናምኡ ካዎት ባንታ ዎዛናን ኢታ ቆፋ ኦይክድ፥ እስፈ እስ ጋይታ ቦላ ኡታና፤ እሶይ እሱዋ ጭማናዉ ዎርዶ ኦደታና። ሽን ቃመትዳ ዎደይ ቡሮ ጋክቦና ግሾ ኤንቲ ኦና ግድ ቆፕያባይ ኤንታዉ እንጀተና። 28 ፑደሀ ቢታ ካዎይ ዳሮ ዱረተራ ባ ቢታ ስማና። ሽን እ ባ ዎዛናን ጌሻ ጫቁዋ እፃና። ጌሻ ጫቁዋ ቆሀናዉ እያ ቦላ እስባ ኦድ፥ ባ ቢታ ስማና።
29 "ቃመትዳ ዎደይ ጋክን፥ እ ዛሪድ ዱገሀ ቢታ ቦላ ደንዳና፥ ሽን እያዉ ካሰይሳዳ እንጀተና። 30 ክፅማፐ ያ ኦላ ማርካበት እያ ዳጋንና። ጉየ ስሚድ፥ ጌሻ ጫቁዋ ቦላ ሀንቀታና። ቃስ ያፐ ስሚድ፥ ጌሻ ጫቁዋ አግዳይሳታራ ዳቦታና።
31 "እያ ኦላንቾት ፆሳ ኬነ እያ ዩሹዋ ቱንሳና፤ ጋላስ ጋላስ ያርሸትያ ያርሹዋ ድጋና። ያትድ፥ ዮ ቱናተ ያን ኤሳና።11:31 ዳነ 9:27፤ 12:11፤ ማቶ 24:15፤ ማር 13:14. 32 እ ጫቆ ቃላ መንይሳታ፥ ጭሞ ቃላን ባ ባጋ ዛራና፤ ሽን ባንታ ፆሳ ኤርያ አሳይ ምናናነ እያራ ኤቀታና።
33 "አሳ ግዶን ደእያ ጭንጫት ዳሮ አሳ ታማርሳና። ሽን ጉ ዎደን ሄ አሳት ማሻን ሀይቃና፥ ታማን ፁገታና፥ ድኤታና ዎይኮ ቦንቀታና። 34 ሄ መቱዋ ግዶን ደእሸ፥ ኤንቲ ጉ ማዶ ደማና፤ ዳሮ አሳይ ኤንታ ባጋ ዳንድ፥ ኤንታኮ ስማና፤ ሽን ቱማ ዎዛናፐ ግደና። 35 ጭንጫታፐ እሶት እሶት በታና። ቃመትዳ ዎደይ ቡሮ ጋክቦና ግሾ፥ ኤንቲ ሄሳዳ ሀንድ፥ ዉርሰ ዎደይ ጋካናዉ፥ ፓጨትድ ከያና፥ ጌያናነ ቦረይ ባይናይሳታ ግዳና።"
ባና ቁ ኦያ ካዋ
36 "ካዎይ ባና ሎእዳባ ኦና፤ ባና ፆሳታ ኡባፈ ቁ ኦድ ግታያና፤ ፆሳታ ፆሳ ቦላ ካሰ ስኤትድ ኤሮና ኢታ ቃላ ኦደታና። ሀናናዉ ደእያባይ ሀናናዉ በሲያ ግሾ፥ ፆሳ ሀንቆይ ፖለታና ጋካናዉ እ ኦያባ ኡባይ እያዉ እንጀታና።11:36 2 ታሰ 2:3-4፤ ቆን 13:5-6. 37 እ፥ ባ ማይዛታ ፆሳታ ዎይኮ ማጫሳይ ዶስያ ፆሳታ ካና። እ ባና ኡባፈ አድ ቁ ኦያ ግሾ፥ ሀራ ፆሳታ ኤከና። 38 እ ኤንታ ቦንቾ አግድ ሚፃታ ፆሳ ቦንቻና፤ እያ ማይዛት ኤሮና ፆሰ፥ ዎርቃ፥ ብራ፥ አልኦ ሹችነ ሎኦ እሞታ እምድ ቦንቻና። 39 እማ ፆሳን ማደትድ፥ እ ምኖ ሚፃታ ቦላ ደንዳና። ቃስ እያ ማታ ኤርያ አሳ ዳሮ ቦንቻና። እ ኤንታ፥ አሳ ቦላ ሹማና፤ ቢታ ዎይቶ ኦድ ኤንታዉ ሻክ ሻክ እማና።
40 "ዉርሰ ዎደይ ጋክን፥ ዱገሀ ቢታ ካዎይ ደንድድ፥ ፑደሀ ቢታ ካዋ ኦላና። ሽን ፑደሀ ቢታ ካዎይ ፓራ ጋረታ፥ ፓራ አሳታነ ዳሮ ማርካበታ ኤክድ፥ እያ ቦላ ጎተዳ ያና። ዳሮ ቢታ ኦይክድ፥ ድኦዳ ሜጭድ ኤፋና። 41 እ ጌሻ ቢታ ቦላ ደንዳና፤ ዳሮ ቢታት እያ ኩሸን ኩንዳና። ሽን ኤዶመይ፥ ሞአበይነ አሞነፐ ዳርያ ባጋይ እያ ኩሸፐ አታና። 42 እ ዳሮ ቢታታ ቦላ ደንድያ ዎደ፥ ግብፀይካ እያፐ ከስ ኤከና። 43 ግብፀ ዎርቃ፥ ብራነ ዱረተ ኡባ፥ ባ ኩሸን አና። ሊበነ ቶጰ አሳይ እያዉ ሃረታና። 44 ሽን ዶሎሀ ባጋፈነ ፑደሀ ባጋፈ ያ ኦዳይ፥ እያ ዳጋንና። ሀንቆ ኤፅ ከይድ፥ ዳሮታ ዎናነ ይሳና። 45 እ ባ ካዎታ ዱንካንያ አባፈነ ሎኦ ጌሻ ዙማፐ ግዶን ቶካና። ሽን እ፥ ዉርሰን ባዉ ያና፤ እያ ማድያ ኦንካ በንተና።"