ዳነላ ማፃፋ 12

ዎደ ዉርሰ

1 "ሄ ዎደ ነ አሳ ናግያ ግታ ሀላቃይ፥ ምካኤል ደንዳና። ካዎተ መትዳ ዎድያፐ ዶምድ፥ ሀን ኤሮና መቶ ዎደይ ያና። ግዶሽን፥ ኤንታ ሱንይ ፆሳ ማፃፋን ፃፈትዳ ነ አሳ ኡባይ ሄ ዎደ አታና።✝12:1 ማቶ 24:21፤ ማር 13:19፤ ቆን 7:14፤ 12:7. 2 ሀይቅዳ አሳፐ ዳሮት ደንዳና። ኤንታፈ ባጋት መርና ደኦስ፥ ባጋት ቃስ ዬላስነ መርና ካዉሻስ ደንዳና።✝12:2 እሳ 26:19፤ ማቶ 25:46፤ ዮሀ 5:29. 3 ጭንጫት ሳሎ ፖኦዳ ቃስ ዳሮታ ፅሎተ ኦገ ካለይሳት መርናዉ ፆልንቶዳ ፖአና። 4 ሽን ነኖ ዳነላ፥ ነ ዉርሰ ዎደይ ጋካናዉ፥ ሀ ማፃፋ ጎርዳዳ፥ ማታመ ዎ። ዳሮት ኤራተ ደማናዉ ያነ ሃነ ዎፀረታና" ያግስ።✝12:4 ቆን 22:10.

5 ታኒ፥ ዳነል፥ ናምኡ አሳታ፥ እሶይ ሻፋፐ ሀፍን፥ እሶይ ሻፋፐ ሄፍንን ኤቅዳይሳታ በአስ። 6 ኤንታፈ እሶይ ሊኖ ማእድ፥ ሻፋፐ ቦላ ባጋራ ኤቅዳ ኪታንቹዋ፥ "ሀ ማላታት ፖለታናዉ አይ መላ ዎደ ጋምአኔ?" ያግድ ኦይችስ።

7 ሊኖ ማእድ፥ ሻፋፐ ቆሞ ባጋራ ኤቅዳ ኪታንቾይ፥ ባ ኡሻቻ ኩሽያነ ባ ሀድርሳ ኩሽያ ሳሎ ደንድ፥ መርናዉ ደኤይሳ ሱንን ሀይሳዳ ያግድ ጫቅስ፦ "ሀይስ፥ ዎደይ፥ ዎደትነ ዎደ ባጋይ ጋካናዉ ጋምአና፤ ጌሻ አሳታ ዎልቃይ ዉርያ ዎደ ሀ ኡባይ ፖለታና"✝12:7 ቆን 10:5፤ 12:14. ያግስ።

8 ሀ ኡባ ታኒ ስአስ፥ ሽን ታዉ ገልቤና። ያትን፥ ታኒ፥ "ታ ጎዳዉ፥ ሀ ኡባስ ዉርሰይ አይ ግዳንዴ?" ጋዳ ኦይቻስ።

9 እ ዛሪድ፥ "ዳነላ፥ ሀ ቃላይ ዉርሰ ዎደይ ጋካናዉ ጎርደትዳነ አታመትዳ ግሾ ኔኒ ባ፤ 10 ዳሮት ፓጨትድ ከያና፥ ጌያናነ ቦረይ ባይናይሳታ ግዳና፤ ሽን ኢታት፥ ኢታባ ኦና። ኢታታፐ እስ አስካ አኬከና፤ ሽን ጭንጫት አኬካና።✝12:10 ቆን 22:11.

11 "ጋላስ ጋላስ ያርሸትያ ያርሾይ ድገትዳፐነ ዮ ቱናተይ ሄ በሳን ኤቅዳፐ ስምን፥ 1,290 ጋላስ።✝12:11 ዳነ 9:27፤ 11:31፤ ማቶ 24:15፤ ማር 13:14. 12 ገንጭድ 1,335 ጋላስ ጋካናዉ ናግያ አስ አንጀትዳይሳ።

13 "ኔኒ ዉርሰ ጋካናዉ ባ። ነ ሸምፓና፤ ዉርሰን ነና ጋክያ ላታ ኤካናዉ ደንዳና" ያግስ።