1 ካዎይ ናቡካዳናፆር፥

አሳስ፥ ካዎተታስ፥ ዱማ ዱማ ዶናን ኦደትያ ኮቻታስ ሀይሳዳ ያግድ ዳብዳበ ፃፍስ፦

ሳሮይ ህንተዉ ግዶ፥

2 ኡባፈ ቃ ፆሳይ ታዉ ኦዳ፥ ማላልስባነ ኦራባ ታ ህንተዉ ኦዳናዉ ኮያይስ።

3 እያ ማላታይ አይባ ግተ!

እ ኦያ ኦራባይ አይባ ምኖ!

እያ ካዎተይ መርና ካዎተ፤

እ የለታፐ የለታ ጋካናዉ ሃሬስ።

4 ታኒ፥ ናቡካዳናፆር ታ ኬን እንጀትን፥ ታ ካዎ ጋን ሚኮትን ደአይስ። 5 እስ ጋላስ ታኒ ያሽያ አሙሆ በአስ። ታኒ ታ አርሳን ዝንአዳ፥ በእዳ አሙሆይነ ቆንጨይ ታና ዳጋንስ። 6 ሄሳ ግሾ፥ አሙሁዋ ብርሸ ታና ኤርሳና መላ ባብሎነን ደእያ ጭንጫታ ኡባ ታኮ ኤሀና መላ ኪታስ። 7 ሄ ዎደ ማሮት፥ ሙራንቾት፥ ፆልንቶ ታይበይሳትነ ብታንቾት ታኮ ይን፥ ታ አሙሁዋ ኤንታዉ ኦዳስ፤ ሽን ኤንቲ ብርሸ ታና ኤርሳናዉ ዳንዳእቦኮና። 8 ዉርሰን ታ ፆሳ ሱንን ብልፃሶራ ጌተትድ ፄገትያ፥ ጌሻ ፆሳታ አያን እያን ደእያ፥ ዳነል ታኮ ገልን፥ እያዉ ታ አሙሁዋ ኦዳስ።

9 ጭንጫታ ሀላቃ ግድዳ ብልፃሶራ፥ ጌሻ ፆሳታ አያን ነናን ደኤይሳነ አይባ ፁርካ ኔፐ ጌሞናይሳ ታኒ ኤራይስ። ታኒ በእዳ አሙሆይ ሀይሳ፤ አነ ታዉ እያ ብርሸ ኦዳ። 10 ታኒ ታ አርሳን ዝንአዳ፥ ቢታስ ግድ ዛዋን እስ ግታ ም ኤቅዳይሳ ቆንጨን በአስ። 11 ሄ ምይ ድጭድ ግታትስነ ምንስ። እያ ፄራይ ሳሎ ጋኬስ፤ ሳኣ ጋፃፐ ጋፃ ጋካናዉ በንቴስ። 12 ሄ ም ሀይይ ፄላናዉ ሎኤስ፤ እያ አይፈይካ ዳሮ፤ እያ ቦላ ኡባስ ሜተትያባይ ደኤስ። ሳአ ዶአት እያ ኩያን ሸምፖሶና፤ ሳሎ ካፎት እያ ታሽያ ቦላ ኬፅድ ደኦሶና። ደኦራ ደእያ ኡባይ እያፐ ሜስ።

13 "ታኒ ታ አርሳን ዝንአዳ፥ ጌሻ ኪታንቾይ ሳሎፐ ዎሽን ቆንጨን በአስ። 14 እካ ባ ቃላ ቁ ኦድ፥ ሀይሳዳ ያግስ፦ ‘ሀ ም ቃንፅተ፤ እያ ታሽያ ካርተ፤ እያ ሀይ ዱተ፤ እያ አይፍያ ላልተ። እያ ጋርሳን ደእያ ዶአትነ እያ ታሽያን ኡትያ ካፎት ኡባይ ባቃቶ። 15 ሽን ዱሩማነ እያ ፃጱዋ ብራታንነ ናሰ ብራታ ሳንላታን ቃችድ፥ ቢታን፥ ማታ ግዶን አጋግተ። ሳሎ አካን ላኮ፤ ባዞን ማታ ግዶን ዶአራ ደኦ። 16 እያ ካሀይ አሳፐ ዶአይሳን ላመቶ፤ ሄሳዳ ሀንድ ላፑን ላይ ደኦ። 17 ኡባፈ ቃ ፆሳይ አሳ ናይታ ካዎተ ኡባ ሃረይሳ፥ ካዎተ ኮይያ አሳስ እመይሳነ ሀር አቶሽን ቦረትዳይሳ ሹመይሳ ደኦን ደእያ አስ ኡባይ ኤራና መላ፥ ሄሳ ኪታንቾት አዋጅዶሶና፤ ጌሻት ፕርዳ ኤህዶሶና’ " ያግስ።

18 "ታኒ፥ ካዎይ ናቡካዳናፆር በእዳ አሙሆይ ሀይሳ፦ ሀእ፥ ብልፃሶራ፥ ታዉ እያ ብርሸ ኦዳ። ታ ካዎተን ደእያ ጭንጫታፐ እሶይካ ታና ብርሸ ኤርሳናዉ ዳንዳእቤና። ሽን ጌሻ ፆሳታ አያን ነናን ደእያ ግሾ፥ ኔኒ ዳንዳኣሳ" ያጋስ።

19 ሄ ዎደ ብልፃሶራ ጌተትያ ዳነል ዳጋምድ፥ ሀንያባ ይስ። እ ዳጋምዳ ግሾ ጉ ዎደ ስእ ግድ ጋምእስ። ያትን፥ ካዎይ፥ "ብልፃሶራ፥ ሀ አሙሆይነ እያ ብርሸይ ነና ዳጋንፎ" ያግስ።

ብልፃሶር ዛሪድ፥ "ታ ጎዳዉ፥ ሀ አሙሆይ ነና እፀይሳታስ፥ እያ ብርሸይ ነ ሞርከታስ ግዶ። 20 ነ አሙሆን በእዳ ምይ፥ ድጭድ ምንዳይ፥ ዳይድ ሳሎ ጋክዳይ፥ ሳአ ጋፃፐ ጋፃ ጋካናዉ በንትዳይ፥ 21 ሀይይ ፄላናዉ ሎኤይ፥ አይፈይ ዳርዳይ፥ እያ ቦላ ኡባስ ምያባይ ደኤይ፥ ዶአት እያ ኩያን ሸምፕዳይነ ሳሎ ካፎት እያ ታሽያን ኬፅድ ደኤይ፥ 22 ካዋዉ፥ ሄ ምይ ነና። ኔኒ ግታታዳሳ፤ ምናዳሳ፤ ነ ግታተይ ድጭድ፥ ሳሎ ጋክስ፤ ነ ማታይ ሳኣ ጋፃፐ ጋፃ ጋክስ።"

23 "ካዋዉ፥ ጌሻ ኪታንቾይ ሳሎፐ ዎድ፥ ‘ሀ ም ቃንፅድ ይስተ፤ ሽን እያ ዱሩማነ እያ ፃጱዋ ብራታንነ ናሰ ብራታ ሳንላታን ቃችድ፥ ቢታን፥ ማታ ግዶን አጋግተ። እ ሳሎ አካን ላኮ፤ ላፑን ላይ ጋካናዉ ዎራን ዶአዳ ደኦ’ " ግያ ዎደ በአዳሳ።

24 "ካዋዉ፥ ብርሸይ ሀይሳ፦ ሀይስ ኡባፈ ቃ ፆሳይ ታ ጎዳ፥ ካዋ ቦላ ፖላናዉ ኪትዳ ፕርዳ። 25 ኔኒ አሳ ግዶፈ ጎደታዳ ዶአታራ እስፈ ዳና። ኔኒ ቦራዳ ማታ ማናነ ሳሎ አካን ላካና። ቃስ ኡባፈ ቃ ፆሳይ፥ አሳ ናይታ ካዎተ ኡባ ሃረይሳነ ካዎተ ባ ኮይዳ አሳስ እመይሳ ነ ኤራና ጋካናዉ፥ ላፑን ላይ ነ ቦላራ አና። 26 ዱሩማይ ፃጶራ ቢታን አታናዳ ኪተትዳይስ፥ ሳሎ ፆሳይ ቢታ ኡባ ሃረይሳ ኔኒ ኤርያ ዎደ፥ ነ ካዎተይ ነዉ ስማናይሳ በሴስ። 27 ካዋዉ፥ ታ ዞርያ ኤካ። ናጋራ ኦሶ አጋዳ ሱረባ ኦ፤ ኡንኤትዳይሳታ ናቆ አጋዳ ኤንታዉ ቃታ። ኦን ኤር ኔኒ ሳሮ ዳና ዎደይ አዱቆና አገና" ያግስ።

28 ሀ ኡባይ ካዋ ናቡካዳናፆራ ቦላ ጋክስ። 29 ታማነ ናምኡ አጌናፐ ጉየ፥ ካዎይ ባብሎነን ደእያ ካዎ ጋ ቦላ ደእያ በሳን ስመረቴስ። 30 ካዎይ፥ "ታኒ፥ ታ ግታ ዎልቃን፥ ታ ግታ ቦንቹዋስ ካዎይ ዳና መላ ታ ኬፅዳ ዎልቃማ ባብሎነ ካታማይ ሀይሳ ግደኔ?" ያግስ።

31 እ፥ ባ ኦዳ ዉርሶና ደእሽን፥ ሳሎፐ ሀይሳዳ ግያ ቃል ይድ፥ "ካዋ ናቡካዳናፆራ፥ ነ ቦላ ፕርደትዳ ፕርዳይ ሀይሳ፦ ነ ካዎተይ ኔፐ ኤከትስ። 32 ኔኒ አሳ ግዶፈ ጎደታዳ፥ ባዞ ዶአታራ ዳና፤ ነ ቦራዳ ማታ ማና። ኡባፈ ቃ ፆሳይ አሳ ናይታ ካዎተ ኡባ ሃረይሳነ እ ባ ኮይዳ አሳስ ካዎተ እመይሳ ኔኒ ኤራና ጋካናዉ ላፑን ላይ ነ ቦላራ አና" ያግስ።

33 ናቡካዳናፆራ ቦላ ጌተትዳባይ ኤለስድ ፖለትስ። አሳ ግዶፈ ጎደትድ፥ ቦራዳ ማታ ምስ። እያ አሳተይ ሳሎ አካን ላክስ። እያ ብናናይ አንኮ ባለዳ፥ እያ ፁጉንይካ ካፎ ፁጉንዳ ድጭስ።

34 "ሄ ላፑን ላይይ ዉርዳፐ ጉየ፥ ታኒ ናቡካዳናፆር ቁ ጋዳ ሳሎ ፄላስ። ታ ካሀይ ስምን፥ ኡባፈ ቃ ፆሳ ጋላታስ፤ መርና ፆሳ ቦንቻስ፤ ሳባስ።

"እ መርናፐ መርናዉ ሃሬስ፤

እያ ካዎተይ የለተፈ የለተ ጋካናሳ።

35 ሳአን ደእያ አሳ ኡባይ

እያ ስንን ላፋባ።

ሳሎ መተታ ቦላነ

ሳአን አሳ ቦላ እ ዶስዳባ ኦስ።

እያ ኩሽያ ተቃናዉ ዳንዳኤይ ባዋ፥

እያ፥ ‘አይ ኦይ?’ ያግድ ኦይቸይ ዴና።

36 ታ ካሀይ ስምን፥ ታ ካዎተ ቦንቾይነ ታ ቴማይ ታዉ ስምስ። ካሰ ታና ዞረይሳትነ ታ ሞርናት ታና ኮይዶሶና። ታኒ ታ አራታን ምናስ፤ ታዉ ካሰይሳፈ አያ ግታተ ጉዠትስ። 37 ህዛ፥ ታኒ ናቡካዳናፆር ሳሎ ካዋ ጋላታይስ፤ እያ ቁ ቁ ኦይስ፤ እያ ቦንቻይስ። እ ኦያባ ኡባይ ልከ፤ እያ ኦገ ኡባይ ሱረ፤ እ ኦቶሮን ሄመተይሳታ ካዉሻናዉ ዳንዳኤስ" ያግስ።