1 ባብሎነ ካዎይ ብልፃሶር ካዎትዳ ኮይሮ ላይን፥ ዳነል ባ አርሳን ዝንእድ፥ አሙሆነ ቆንጨ በእስ። ባ አሙሁዋን በእዳ አይፈ ቆፋታ ፃፍስ።

2 ዳነል ሀይሳዳ ያግስ፦ "ሳሎፐ ይዳ ኦይዱ ጫርኮት ግታ አባ ቡቅሽን ታ ቃማ ቆንጨን በአስ። 3 እሶይ እሱዋፈ ዱማ ግድዳ ኦይዱ ግታ ዶአት አባፈ ከይዶሶና።✝7:3 ቆን 13:1፤ 17:8.

4 "ኮይሮ ዶአይ ጋሞ ዳኔስ፤ እያዉ አርጋን ቀፈይ ደኤስ። ታ በእሽን፥ እያ ቀፈይ ሾደትን፥ ሳአፐ ደንድድ፥ አሳዳ ናምኡ ቶሆን ኤቃናዳ ኦሰትስ፤ እያዉ አሳ ዎዛን እመትስ።

5 "ናምአን ዶአይ እስ ባጋ ቁ ግድ ኤቅዳ ባባን ጌተትያ ዶአ ዳኔስ። ሄ ዶአይ ሄ ጋይለ መቀ ባ ዶናን ባርድ፥ ባ አቻን ሳፅድ ኦይክስ። እካ፥ ‘ደንዳ፤ ካላና ጋካናዉ አሾ ማ’ ጌተትስ።

6 "ሄሳፈ ካላዳ፥ ማሄ ዳንያ ሀራ ዶአ በአስ። እያ ዞኮን ካፎ ቀፈ ዳንያ ኦይዱ ቀፈት ደኦሶና። እያዉ ኦይዱ ሁጰት ደኦሶና፤ እያዉ ሃሮ ማት እመትስ።

7 "ሄሳፈ ጉየ፥ ቃማ ቆንጨን ያሽያ፥ ዳጋንያነ ዳሮ ምኖ ግድዳ ኦይዳን ዶአ በአስ። እያዉ ግታ ብራታ አች ደኤስ። እ ባናን ጋሄትያ ኡባ ኤንታን መንረድ ሜስ፤ አትዳይሳታ ባ ቶሁዋን የረስ። ካሰ ታ በእዳ ዶአታ ኡባፈ እ ዱማቴስ፤ እያዉ ታሙ ካጨይ ደኤስ።✝7:7 ቆን 12:3፤ 13:1. 8 ታኒ ሄ ካጨታባ ቆፕሽን፥ ኤንታ ግዶፈ ሀራ እስ ጉ ካጨይ ከይሽን በአስ። ሄ ካጨይ ሀንኮ ካጨታፐ ሄታ ቆልድ ሆልስ። ሄ ቃጭያስ አሳ አይፈ ዳንያ አይፈይነ ኦቶሮን ኦደትያ እንፃርስ ደኤስ።✝7:8 ቆን 13:5-6.

9 "ታኒ ሄሳ በእሽን፥ አራታት ኡተስ ጊግዶሶና። መርናዉ ደኤይስ ባ አራታን ኡትስ፤ እያ ማኦይ ሻቻዳ፥ እያ ሁጰ ብናናይ ሙቃዳዳ ቦ። እያ አራታይነ አራታ ገርቶይ ታማዳ ሎጬስ።✝7:9 ቆን 20:4፤ 1:14. 10 እያ አራታ ግዶፈ ታማ ሻፍ ፑልትድ፥ ከዬስ። ሙኩሉ ቶሆ ሙኩላን ታይበተይሳት እያዉ ኦሶና፤ ታሙ ሙኩሉ ቶሆ ታሙ ሙኩላን ታይበተይሳት እያ ስንን ኤቆሶና። ፕርድ ዶመትስ፤ ማፃፋት ዶየትዶሶና።✝7:10 ቆን 5:11፤ 20:12.

11 "ካጨይ ኦደትያ ኦቶሮ ቃላ ታኒ ስእዳ ግሾ፥ እያ ጫዳ ፄላስ። ታኒ በእሽን ዶአይ ሀይቅድ፥ ኤፅያ ታማን የገትድ፥ ይስ። 12 ሀንኮ ሄ ዶአታ ማታይ ኤከትስ፤ ሽን ኤንቲ ጉ ዎደ ደኦን ዳና መላ ኤንታዉ እመትስ።

13 "ታኒ፥ ቃማ ቆንጨን፥ አሳ ናአ ዳነይስ ሳሎፐ ሻራራ ይሽን በአስ። መርናዉ ደኤይሳኮ ሺቅን፥ እያ ስን አዶሶና።✝7:13 ማቶ 24:30፤ 26:64፤ ማር 13:26፤ 14:62፤ ሉቃ 21:27፤ ቆን 1:7፥ 13፤ 14:14. 14 እያዉ ማት፥ ቦንቾይነ ካዎተ እመትስ፤ ደረይ፥ ካዎተትነ ዱማ ዱማ ዶናን ኦደትያ ኡባይ ሃረትዶሶና። እያ ማታይ መርናዉ ሻረቶና ማታ፤ እያ ካዎተስ ዛው ባዋ።

15 "ታኒ፥ ዳነል፥ ታ በእዳባን ዳጋማስ፤ ቆንጨይ ታና ህርግስስ። 16 ታኒ ያን ኤቅዳይሳታፐ እሱዋኮ ሺቃዳ፥ ሀ ኡባስ ቱማ ብርሸይ አይበኮ ኦይቻስ። እ ታዉ እያ ብርሸ ኡባ ሀይሳዳ ያግድ ኦድስ፦ 17 ‘ሀ ኦይዱ ግታ ዶአት ሳአን ስንፈ ደንዳና ኦይዱ ካዎተታ። 18 ሽን ኡባፈ ቃ ፆሳ ጌሻት እያ ካዎተ ኤክድ፥ መርናዉ ባንታባ ኦና፤ መርናዉ ካዎተ ኤንቲ ላታና’ ያግስ።

19 "ሄሳፈ ጉየ፥ ታኒ ሀራ ዶአታ ኡባፈ ዱማ ግድዳ ያሽያ ኦይዳን ዶኣስ ደእያ ቱማ ብርሸ ኤራናዉ ኮያስ። ሄ ዶኣስ ብራታ አችነ ናሰ ብራታ ፁጉን ደኤስ፤ እ ባናን ጋሄትያ ኡባ መንረድ ሜስ፤ አትዳይሳ ባ ቶሁዋን የረስ። 20 ሄ ዶኣ ሁጰን ደእያ ታሙ ካጨታባነ ጉየፐ ከይድ፥ ኤንታፈ ሄታ ቆልድ የግዳ ጉ ካጭያባ ኤራናዉ ኮያስ። ሄ ጉ ቃጭያስ አይፈይነ ኦቶሮ ቃላ ኦደትያ እንፃርስ ደኤስ። ሄ ካጨይ ሀንኮታፐ አድ ያሼስ። 21 ታኒ በእያ ዎደ ሄ ካጨይ ጌሻታራ ኦለትድ፥ ኤንታ ፆንስ። 22 ሄስ ሀንዳይ፥ መርናዉ ደኤይስ ያና ጋካናዉነ ኡባፈ ቃ ፆሳ ጌሻታስ ፕርዳና ጋካናሳ፤ ኤንቲ ካዎተ ላትያ ዎደይ ጋክስ።✝7:22 ቆን 20:4.

23 "እ ብርሸ ታዉ ሀይሳዳ ያግድ ኦድስ፤ ‘ኦይዳን ዶአይ ሀ ሳአን ስንፈ ደንዳና ኦይዳን ካዎተ። ሄ ካዎተይ ሀራ ካዎተ ኡባፈ ዱማ፤ እ፥ ቢታ ኡባ ማና፥ የናነ መንረና። 24 ታሙ ካጨት ሀ ካዎተፈ ደንዳና ታሙ ካዎታ። ሄሳፈ ጉየ፥ ካሰ ታሙ ካዎታፐ ዱማ ግድዳ ሀራ ካዎይ ደንዳና። እ፥ ኤንታፈ ሄ ካዎታ ፆንድ ሃራና።✝7:24 ቆን 17:12. 25 እ፥ ኡባፈ ቃ ፆሳ ቦላ ኦቶሮን ኦደታና፤ ኡባፈ ቃ ፆሳ ጌሻታ ኡንኤና። ቃስ ዎደታነ ህግያ ላማናዉ አሞታና። ዎደይ፥ ዎደትነ ዎደ ባጋይ ጋካናዉ፥ ጌሻት እያ ማታፐ ጋርሳን ሃረታና። 26 ሽን ፕርድ ዶመታና፤ እያ ማታይ ኩመ ኤከታና፤ እ መርናዉ ያና። 27 ሳሎፐ ጋርሳን ደእያ ካዎተታ ማታይ፥ ዎልቃይነ ግታተይ፥ ኡባፈ ቃ ፆሳ ጌሻታስ እመታና። እያ ካዎተይ መርናዉ ዳና፤ ቢታ ሃረይሳት እያዉ ኪተታና፤ እያ ጎይናና’ " ያግስ።✝7:27 ቆን 20:4፤ 22:5.

28 ታ ቆንጨባይ ሀይሳን ዉርስ። ታኒ፥ ዳነል፥ ታ ቆፋን ዳሮ ዳጋማስ፤ ታ ሶምኦይ ብዶ ግድስ። ሽን ኡባባ ታኒ ታ ዎዛናን ዎስ።