1 አልኦ ሽቶፈ ሎኦ ሱን አስ፤

የለትያ ጋላሳፐ ሀይቆ ጋላስ ሎኦ።

2 አሳ ኡባ ዉርሰይ ሀይቆ ግድዳ ግሾ፥

ግብራ ኬ በይሳፈ ዬሆ ኬ በይስ ሎኦ፤

ደኦን ደእያ አስ ሄሳ ባ ዎዛናን ዎናዉ ኮሼስ።

3 አዛኖይ ሶምኦ ካሬኮካ፥

ዎዛና ፖእስያ ግሾ ሚቻፈ አዛኖይ ሎኦ።

4 ጭንጫ አሳ ዎዛን ዬሆ ሶን ደኤስ፤

ሽን ኤያ አሳ ዎዛን ኡፋይሳ ሶን ደኤስ።

5 ኤያታ የ ስአናፐ

ጭንጫታ ሴራ ስስ ሎኦ።

6 ኤያ አሳ ሚች አጉንን ታማ የድን

ቀይሳ መላ፤ ሄስካ ሀዳ።

7 ገነ ኦሶይ ጭንጫ አስ ኤያ ከሴስ፤

ዎፈ ኤኮይ ዎዛና ኢሴስ።

8 ዶመፈ ዉርሰ ሎኦ፤

ኦቶሮፐ ዳንዳእ ሎኦ።

9 ኤያታ ሀንቆይ ኤንታ ክኦን ደእያ ግሾ፥

ኔኒ ነ ሸምፑዋን ሀንቆስ ኤለሶፓ።

10 "ሀእ ዎድያፐ ካሰ ዎደይ አይስ ሎኦ ግድዴ?" ጋዳ ኦይቾፋ፤

ሄሳ መላ ኦይሾይ ጭንጫ አስ ኦይችያ ኦይሾ ግደና።

11 ሀ ሳአን ደእያ አስ ኡባይ ጭንጫ ግዳናዉ ኮሼስ፤

ጭንጫተ ደሞይ ላታፐ ሎኦ።

12 ሚሸይ አሰ ኢታፐ ካምድ አሸይሳዳ ጭንጫተካ አሼስ።

ሽን ጭንጫተ ሚሸፐ አይ አሳ ደኦ ናጋናዉ ዳንዳእያ ግሾሳ።

13 አነ ፆሲ ኦዳባ አኬካ!

ፆሲ ጌላይዳባ ኦን ሱርሳናዉ ዳንዳኢ? 14 ሳእ ጊግዳ ዎደ ኡፋይታ፤ መቶይ ጋክያ ዎደ አኬካ።

ኡፋይስ ግድን መቶ ግድን ፆሲ የድያ ዎደን ዬስ።

ሽን አዉስ ኮይሮትድ ያነኮ ኔኒ ኤራካ።

15 ሀ ሀዳ ግድዳ ታ ላይን ዳሮባ በአስ። ሄስካ፥ ጌላይ ባ ጌላተን አዱሳ ላይ ደእያ ዎደ ፅሎይ ቃን ላይን ሀይቄስ። 16 ሄሳ ግሾ፥ ኔኒ ኤለ ዮናዳ ዳሮ ፅሎ ዎይኮ ዳሮ ጭንጫ ግዶፓ። 17 ኔኒ ዎደይ ጋኮና ሀይቆናዳ አዳ ኢታ ግዶፓ፤ አዳ ኤያ ግዶፓ። 18 ሀ ኡባን ፆሰ ያያ፤ አስ መቶ ኡባ ፆኖን ከያናዉ ዳንዳእያ ግሾ ኔኒ ዳሮ ኢታ ዎይኮ ዳሮ ፅሎ ግዶናሽን ግዶ አስ ግዳ።

19 ጭንጫተ ጭንጫስ እምያ ዎልቃይ እስ ካታማ ሃርያ ታሙ አሳታ ዎልቃፈ አስ።

20 ፅሎባ ፃላላ ኦድ ናጋራ ኦና ደእያ አስ ሀ ሳኣ ቦላ ባዋ።

21 አስ ሃሳያ ቃላ ኡባ ስአዳ ፖላና ጎፓ፤ ኔኒ ኡባ ስአና ጊኮ ነ አይለይ ነና ባድሽን ስአና። 22 ቃስ ኔኒ ነ ሁጰን ሀራታ ባድያባ ነ ዎዛናይ ኤሬስ።

23 ሄሳ ኡባ ታኒ ጭንጫተን ፕልጋዳ በአስ። ያታዳ፥ "ታኒ ጭንጫ ግዳና" ያጋስ። ሽን ታኒ ግዳይሳዳ ሀንቤና። 24 ጭንጫተ ኡባ ዎደ ሃሆን ደእያባነ ጪሞባ፤ ያትን፥ እያ ኮይድ ደማናዉ ዳንዳኤይ ኦኔ? 25 ታኒ ፕልጋዳ ፄላናዉ ጭንጫተነ ኦዳ ኡባ ዉርሰ ኤራናዉ ቆፓስ። ናጋር ኤያተ፥ ኤያተ ጎሻተ ግደይሳ ኤራናዉ ጋካስ።

26 ታኒ ሀይቆፐ አድ ጫምያ ሀራባ ደማስ። ሄስካ፥ እ ዎዛናይ ግተ፥ እ ኩሸይ ሳንላታ ግድድ ፅሄዳ ኦይክያ እስ ማጫስ በአስ። ፆሰ ያይያ አስ ኢፐ ከስ ኤካና፤ ሽን ናጋራንቹዋ እያ ባ ፅህያን ፃፃዳ ኦይካና።

27 አስታማረይ ሀይሳዳ ያግስ፤ "ታኒ ፕልጋዳ ደምዳባይ ሀይሳ። 28 ሄስካ፥ ታኒ ሀች ጋካናዉ ኮያዳ ደማቦናባ። ሙኩሉ አደ አሳ ግዶፈ ቦንቾይ በሲያ እስ አደ ፃላላ ደማስ፤ ሽን ማጫ አሳ ግዶፈ እስኖካ ደማናዉ ዳንዳአብከ። 29 ታኒ ፕልጋዳ ደምዳ ሀራባይ፥ ፆሲ አሰ ሱረ ቆፋራ መስ፤ ሽን አስ ዳሮ ገነ ኦገ ኮይድ ብስ" ያግስ።