ኑኒ ክርስቶሳን እስኖ
1 ህዛ፥ ጎዳ ግሾ ቃሸትዳ ታኒ፥ ህንተ ፄገትዳ ፄሳስ በሲያ ደኦ ዳና መላ ህንተና ዎሳይስ። 2 ህንተ ኡባ ዎደ አዳታነ ሀዮ ግድተ፤ እሶይ እሱዋ ዳንዳእተነ ሲቆን ደእተ።4:2 ቆላ 3:12-13. 3 ሳሮተን ቃሸትድ አያናይ እምያ እስፈተ ናጋናዉ ምንተ። 4 ፆሳይ ህንተና ፄግዳ ዎደ እስ ኡፋይሳስ ፄግዳይሳዳ እስ አሳተነ እስ አያን ደኤስ። 5 እስ ጎዳይ፥ እስ አማኖይነ እስ ፅንቃተይ ደኤስ። 6 ኡባፈ ቦላ ግድዳ፥ ኡባ ባጋራ ኦያነ ኡባ ግዶን ደእያ እስ ፆሳይ፥ ኡባ አዋይ ደኤስ።
7 ሽን ክርስቶስ እማናዉ ኮይዳይሳዳ ኑ እሶይ እሶይ ዱማ ዱማ እሞታ ኤክዳ። 8 ሄሳ ግሾ፥ ፆሳ ቃላይ፥
"እ ፑደ ከይዳ ዎደ
ድኤትዳ ዳሮታ ባራ ኤክድ ብስ፤
አሳስካ እሞታ እሚስ"
ያጌስ።4:8 ማዝ 68:18. 9 ያትን፥ "ፑደ ከይስ" ጉሳይ ዎይ ጉሴ? እ ኮይሮ ዱገ፥ ሳኣ ዝቃ በሳ ዎስ ጉሱ ግዶና እፅኮ አይ ጉሴ? 10 ሀ ዱገ ዎዳይስ፥ ኡባ በሳን በንታናዉ ኡባፈ ቃ ሳሉዋ ከይዳይስ እያ።
11 እ እሶታ እሶታ ሀዋረታ፥ እሶታ እሶታ ናበታ፥ እሶታ እሶታ ዎንገላ ሳባከታ፥ እሶታ እሶታ ዎሳ ኬ ሄመይሳታ፥ እሶታ እሶታ አስታማረታ ኦድ እሚስ። 12 እ ሄሳ ኦዳይ ክርስቶሳ አሳተ ግድዳ ዎሳ ኬ ድቻናዉነ አማንያ አሳ ፆሳ ኦሶስ ጊግሳናሳ።