ኑኒ ክርስቶሳን እስኖ
1 ህዛ፥ ጎዳ ግሾ ቃሸትዳ ታኒ፥ ህንተ ፄገትዳ ፄሳስ በሲያ ደኦ ዳና መላ ህንተና ዎሳይስ። 2 ህንተ ኡባ ዎደ አዳታነ ሀዮ ግድተ፤ እሶይ እሱዋ ዳንዳእተነ ሲቆን ደእተ።4:2 ቆላ 3:12-13. 3 ሳሮተን ቃሸትድ አያናይ እምያ እስፈተ ናጋናዉ ምንተ። 4 ፆሳይ ህንተና ፄግዳ ዎደ እስ ኡፋይሳስ ፄግዳይሳዳ እስ አሳተነ እስ አያን ደኤስ። 5 እስ ጎዳይ፥ እስ አማኖይነ እስ ፅንቃተይ ደኤስ። 6 ኡባፈ ቦላ ግድዳ፥ ኡባ ባጋራ ኦያነ ኡባ ግዶን ደእያ እስ ፆሳይ፥ ኡባ አዋይ ደኤስ።
7 ሽን ክርስቶስ እማናዉ ኮይዳይሳዳ ኑ እሶይ እሶይ ዱማ ዱማ እሞታ ኤክዳ። 8 ሄሳ ግሾ፥ ፆሳ ቃላይ፥
"እ ፑደ ከይዳ ዎደ
ድኤትዳ ዳሮታ ባራ ኤክድ ብስ፤
አሳስካ እሞታ እሚስ"
ያጌስ።4:8 ማዝ 68:18. 9 ያትን፥ "ፑደ ከይስ" ጉሳይ ዎይ ጉሴ? እ ኮይሮ ዱገ፥ ሳኣ ዝቃ በሳ ዎስ ጉሱ ግዶና እፅኮ አይ ጉሴ? 10 ሀ ዱገ ዎዳይስ፥ ኡባ በሳን በንታናዉ ኡባፈ ቃ ሳሉዋ ከይዳይስ እያ።
11 እ እሶታ እሶታ ሀዋረታ፥ እሶታ እሶታ ናበታ፥ እሶታ እሶታ ዎንገላ ሳባከታ፥ እሶታ እሶታ ዎሳ ኬ ሄመይሳታ፥ እሶታ እሶታ አስታማረታ ኦድ እሚስ። 12 እ ሄሳ ኦዳይ ክርስቶሳ አሳተ ግድዳ ዎሳ ኬ ድቻናዉነ አማንያ አሳ ፆሳ ኦሶስ ጊግሳናሳ። 13 ሄሳዳካ፥ ኑ ኡባይ ፆሳ ናኣ ኤርድ አማኖን በንትያ እስፈተኮ ጋክድ፥ ክርስቶሳ አያና ደኡዋ ኩመ ጋክድ ድጫና መላሳ።
14 ህዛፐ ጉየ፥ አሳ ገነ ጭሞን ጊግዳ ባለያ ዎርዶ ትምርተ ጫርኮንነ ሆበን ገደነ ሃ ኩሎ ካእያ ናይታ መላ ግዳናዉ በሰና። 15 ሽን ኑኒ ቱማ ሲቆን ኦድሸ፥ አሳተስ ሁጰ ግድያ ክርስቶሳራ ደእያ እስፈተ ጉጅ ጉጅ ድቾስ። 16 ኩመ አሳተይ ክርስቶሳ ቦላ ዘምፔስ ቃስ ዱማ ዱማ አሳተ ብልተት እሶይ እሱዋራ ኦይከትድ ኡትስ። እስ እስ አሳተ ክፍለይ ባ ኦሱዋ ኦያ ዎደ ኩመ አሳተይ ሲቆን ድጬስ።4:16 ቆላ 2:19.
ጋልአ ደኦነ ኦራ ደኦ
17 ሄሳ ግሾ፥ ታኒ ሀይሳ ህንተዉ ጎዳ ሱንን ኦዳይስነ ማርካታይስ። ጎእ ባይና ቆፋ ቆፕያ አይሁደ ግዶና አሳታዳ ደኦፕተ። 18 ኤንታ ቆፋይ ምስ፤ ባንታ ዎዛና ሙምስዶሶና። ኤንቲ ኤራተ ዮንነ እፃስ ግድ ፆሳይ እምያ ደኡዋፐ ሃክዶሶና። 19 ኤንቲ ዬላ ግያባ ኤሮኮና፤ ኤንቲ ላይማተስ ባንታና አድ እምዶሶና፤ ቃስ ቱናባ ኡባ ጉየ ጎና ኦሶና።
20 ሽን ህንተ ክርስቶሳ ኤርዳይ ሄሳ መላ ኦገን ግደና። 21 እያባ ቱማ ስእደታ። ቃስ የሱሳን ደእያ ቱማ መላ እያፐ ታማርደታ። 22 ህንተ ካሰ ደእዳ ደኦ ኦግያ አግተ። ቃስ ባ ጭምያ አሞን ይያ ህንተ ጬጋ አሳተ ድግተ።4:22 ቆላ 3:9. 23 ህንተ ዎዛና ቆፋን ኦራፅተ። 24 ቱማ ፅሎተንነ ጌሻተን ፆሳ ሌምሶን መትዳ ኦራ አሳተ ማእተ።4:24 መ 1:26፤ ቆላ 3:10.
25 ህዛ፥ ዎርዶ ኦደቶፍተ። ኑኒ ኡባይ ክርስቶሳ አሳተ ብልተታ ግድያ ግሾ አሳ ኡባራ ቱማ ኦደትተ።4:25 ዛካ 8:16. 26 ሀንቀትተ፥ ሽን ህንተ ሀንቁዋን ናጋራ ኦፍተ። ህንተ ሀንቀት ደእሽን አው ዉሎፎ።4:26 ማዝ 4:4. 27 ፃላሄስ በሰ እሞፍተ። 28 ካይሶትያ ኡራይ ህዛፐ ጉየ ካይሶቶፖ። ሽን ማንቆታ ማድያባይ እያዉ ዳና መላ ባ ኩሸን ሎኦባ ኦ።
29 ህንተ ዶናፐ ኢታ ቃል ከዮፖ። ሽን ስኤይሳታ ጎአና መላነ ሀራታ ምንያ ኮሽያ ሎኦ ቃል ህንተ ዶናፐ ከዮ። 30 ፆሳይ ህንተና ዎዝያ ጋላሳስ ህንተና አታምድ ዎዳ ፆሳ አያና አዛንፍተ። 31 ጫመተ፥ ይሎ፥ ሀንቆ፥ ዋሶ፥ ጫሸነ ኢታ ኡባ ህንተፈ ሃስተ። 32 አድ እሶይ እሱዋስ ኬሀነ ቃተይሳታ ግድተ። ፆሳይ ክርስቶሳ ባጋራ ህንተዉ አቶ ግዳይሳዳ ህንተካ ዎልስ አቶ ጊተ።4:32 ቆላ 3:13.