1 ናይቶ፥ ህንተ ጎዳባ ግድያ ግሾ ህንተና የልዳይሳታስ ኪተትተ። ሄስ ህንተዉ በሲያባ።✝ 2 "ነ አይዉነ ነ አዋ ቦንቻ።" ሄስ ኡፋይሳ ቃል ደእያ ኮይሮ ኪታ።✝ 3 "ነ ሄሳ ፖልያባ ግድኮ ኡባይ ነዉ እንጀታና፤ ነ ላይይ ሳአ ቦላ አዱቃና።"

4 አዋቶ፥ ህንተ ናይታ ጎዳ ቃላ ታማርሶንነ ኤንታ ካለሶን ድችተፐ አትሽን፥ ኤንታና ጫምሶፕተ።✝

5 አይለቶ፥ ክርስቶሳስ ኪተተይሳዳ ህንተ ሳአ ጎዳታስ ያሻን፥ ቦንቾንነ ሱረ ዎዛናን ኪተትተ።✝ 6 ኤንታ ስንን ሳባ ደማናዉ ኤንቲ በእያ ዎደ ፃላላ ኦፍተ። ሽን ክርስቶሳ አይለታዳ ፆሳ ሸንያ ዎዛናፐ ፖልተ። 7 አሳስ ግዶናሽን፥ ጎዳስ ግድ ህንተ ኩመ ዎዛናፐ ኦተ። 8 አይለ ግድን ዎይኮ ጎዳ ግድን እሶይ እሶይ ባ ኦዳ ሎኦ ኦሱዋስ ጎዳፐ ዎይቶ ኤካናይሳ ኤሬታ።

9 ጎዳቶ፥ አሳ ሶምኦ በእድ ማዶና ጎዳይ፥ ሳሉዋን ደኤይሳ ኤሬታ። ሄሳ ግሾ፥ ህንተ አይለታ ማንደይሳ አግድ ኤንቲ ህንተዉ ቦንቾን ኪተተይሳ መላ ህንተ ኤንታዉ ሎኦባ ኦተ።✝

10 ዉርሰን፥ ጎዳንነ እያ ግታ ዎልቃን ምንተ። 11 ፃላሄ ጭሙዋ ኤቀታናዉ ዳንዳአና መላ ፆሳይ ህንተዉ እምዳ ኦላ ሚሽያ ኡባ ማእተ። 12 ኑ ኦላይ አሳራ ግዶናሽን፥ ሳሎን ደእያ ቱና አያና ኦላንቾታራ፥ ማታ አዋታራ፥ ሃረይሳታራነ ሀ ማ አላምያ ዎልቃታራ።

13 ሄሳ ግሾ፥ ኢታ ጋላሳ ተቃናዉነ ኡባ ፖልድ፥ ምንድ ኤቃናዉ ህንተ ዳንዳአና መላ ፆሳ ኦላ ሚሸታ ኡባ ማእተ። 14,15 ቱማ ፄሳን ዳንጮዳ ዳንጭድ፥ ፅሎተ ፁሩረዳ ትራን ዎድ፥ ሳሮተ ዎንገላ ህንተ ቶሁዋን ጫማዳ አድ ምንድ ኤቅተ።✝ 16 ሄ ኡባፈ አድ፥ ፃላሄይ የድያ ላፅያ ታማ ዶንገ ኡባ ቶይሳናዉ ዳንዳእያ አማኑዋ ኡባ ዎደ ጎንዳለዳ ኦይክተ። 17 ፆሳ አቶተ ብራታ ባርኔፃዳ ህንተ ሁጰን ዎተ፤ ቃስ ጌሻ አያና ማሻ እካ፥ ፆሳ ቃላ ኦይክተ።✝ 18 ዎሳ አጎፍተ፤ ሀራታስካ ጋናትተ፤ ኡባ ዎደ አያናን ዎስተ። ሄሳን፥ ጌሻታስ ሳለቶና ምንድ ኡባ ዎደ ዎስተ።ሮመ ዎታዳረይ ኩመ ኦላ ሚሸ ማእድ

19 ታኒ ዎንገላ ፁራ ያሽ ባይና ቆንጭሳዳ ኦዳና መላ ፆሳይ ታዉ ቃላ እማና መላ ዎስተ። 20 ታኒ ሄሳ ኦናዉ ኪተታስ ሀእካ ቃሾን ደኤይ ሄ ዎንገላ ግሾሳ። ያንያ ግሾ፥ ታኒ ያሽ ባይና በሰይሳዳ ኦዳና መላ ታዉ ዎስተ።

21 ታኒ ዋና ደእያኮነ አይ ኦያኮ ህንተ ኤራና መላ ኑ ሲቆ እሻይ፥ ጎዳ ኦሱዋን አማነትዳ ኦሳንቾይ፥ ትክቆስ፥ ታባ ኡባ ህንተዉ ኦዳና።✝ 22 ኑኒ ኡባይ ዋንድ ደእያኮ ህንተዉ ኦዳና መላነ ህንተና ምንና መላ ታኒ እያ ህንተኮ ኪታስ።✝

23 ፆሳ አዋፐ፥ ጎዳ የሱስ ክርስቶሳፐ ሳሮተይነ ሲቆይ አማኖራ እስፈ አማንያ ኡባስ ግዶ። 24 እርፆና ሲቆን ኑ ጎዳ የሱስ ክርስቶሳ ሲቅያ ኡባራ ፆሳ አ ኬሀተይ ግዶ።