አስትር ማፃፋ 3

ሃም አይሁደታ ይሳናዉ ማቅስ

1 ሄሳፈ ጉየ፥ ካዎይ አርፀክስስ ሃማ ጌተትያ ባራ ኦይሳ ሹማተ ቅስድ፥ ባ ሀላቃታ ሀላቃ ኦድ ሹምስ። ሃማ አዋይ ሀማዳት አጋጋ ኮቸ። 2 ካዎይ ኪትድ ዎዳ ግሾ፥ ካዎ ጋ ፐንገን ኦያ ሀላቃት ኡባይ ሃም አያ ዎደ ጉልባትድ እያ ቦንቾሶና። ግዶሽን፥ ማርድክዮስ ሃማስ ጉልባቶናነ እያ ቦንቾና እፅስ። 3 ሄ ዎደ ካዎ ጋ ፐንገን ኦያ ሀላቃት ማርድክዮሳ፥ "አይስ ካዋ ኪታ ፖሎና እፃይ?" ያግድ፥ 4 ጋላስ ጋላስ እያዉ ኦዶሶና። ሽን እ ኤንቲ ኦደይሳ ስአናዉ ኮይቤና። ኡባ ቃስ፥ "ታኒ አይሁደ አስ ግድያ ግሾ፥ ሃማስ ጉልባታናዉነ እያ ቦንቻናዉ ዳንዳእከ" ያግስ።

ሄሳፈ ጉየ፥ "ማርድክዮስ ኦድያ ጋሱዋ ስእድ፥ ሃም ዋናንዴሻ!" ያግድ እያዉ ኦድዶሶና። 5 ማርድክዮስ ባዉ ጉልባቶናይሳነ ባና ቦንቾናይሳ ሃም ኤርዳ ዎደ ሀንቆ ኤፅስ። 6 ሄሳ ቦላ ቃስ፥ ማርድክዮስ አይሁደ አስ ግደይሳ ኤርድ፥ እያ ፃላላ ዎይ ላፋባ ግድ ቆፕዳ ግሾ፥ አርፀክስሳ ካዎተን ደእያ አይሁደ ኮቻ ኡባ ይሳናዉ ቆፕስ።

7 አርፀክስስ ካዎትዳ ታማነ ናምአን ላይን፥ ንሳነ ጌተትያ ኮይሮ አጌናን፥ አይሁደታ ዎያ አጌናነ ጋላሳ ኤራናዉ፥ ፑርማ ጌተትያ ሳማ እያ ስንን የጋና መላ ሃም ኪትስ። ሄ ሳማይ ዎዳ ማራን፥ አዳረ ጌተትያ ታማነ ናምአን አጌናን፥ ታማነ ሄን ጋላስ አይሁደት ዉርያ ጋላስ ግደይስ ቃሸትስ።

8 ሄሳፈ ጉየ፥ ሃም ካዋ አርፀክስሳኮ ሀይሳዳ ያግስ፤ "ነ ካዎተ ግዶን ኡባ በሳን ላለትድ ደእያ እስ ኮቻይ ደኤስ። ኤንታ ደኦ ማራይ ሀራ አሳይሳፈ ዱማ፤ ሄሳ ፃላላ ግዶናሽን፥ ኤንቲ ካዎ ህግያስ ሃረቶኮና። ሄሳ ግሾ፥ ኔኒ ኤንታ ደኦ ጋዳ ስእ ጊኮ፥ ሄስ ሎኦ ግደና። 9 ሄሳ ግሾ ካዋዉ፥ ሀ ቆፋይ ነና ኡፋይስኮ፥ ሀ አሳታ ዎድ ይሳና መላ አዋጆ ከሳ። ሄሳ ነ ኦኮ፥ ታኒ ሄ ፄታነ ኦይታሙ ሙኩሉ ክሎ ግራመ ብራ ካዎ ቡቁራ ምንጅያ ኬ ገልሳናዳ፥ ነ ካዎተ አይሰይሳታስ እማና" ያግስ።

10 ካዎይ ባ ማታ ኤርሳናዉ አዋጁዋ ቦላ ዎያ ምግዶ ማታመ ባ ብራያፈ ከስድ፥ አይሁደታ ሞርከ ግድዳ፥ አጋጋ ኮቻስ፥ ሀማዳታ ናኣ ሃማስ እሚስ። 11 ካዎይ ሃማ፥ "ኔኒ እማና ግዳ ብራይ ነ ማታን ደኦ፤ ሽን ሀ አሳታ ቦላ ነ ዶስዳባ ኦ" ያግስ።

12 ሄሳ ግሾ፥ ኮይሮ አጌናን፥ ታማነ ሄን ጋላሳን፥ ሃም ካዋ ፃፈታ ኡባ ፄግድ፥ ሄ አዋጆይ ቢታ ኡባን ደእያ አሳስ ዱማ ዱማ ዶናንነ ዱማ ዱማ ፕዳለን ፃፈትድ፥ ካዎፐ ጋርሳራ ቢታ ሃረይሳታስ፥ አዉራጃ ሃረይሳታስነ ደረ ሀላቃታ ኡባስ ኪተታናዳ ኪትስ። አዋጆይ ካዋ አርፀክስሳ ሱንን ፃፈትድ፥ ምግዶ ማታመይ እያ ቦላ ዎሰትን፥ 13 ኪተትዳይሳት እያ ካዎተ ኡባ ጋናዳ ኪተትዶሶና። ሄ አዋጆይ፥ "አዳረ ጌተትያ ታማነ ናምአን አጌናን ታማነ ሄን ጋላሳን፥ አይሁደ ኡባ፥ ያላጋ፥ ጭማ፥ ማጫ፥ አድያነ፥ ናይታ አሾና እስ ጋላስ ዉርስድ ዎድ፤ ኤንታ ሻሉዋካ ቦንቅተ" ያጌስ። 14 ሄሳ ግሾ፥ ሄ ቃሸትዳ ጋላሳይ ጋክያ ዎደ አስ ኡባይ ጊገታናዳ፥ ሄ አዋጆይ ቢታ ኡባ ኪተትስነ አሳ ኡባስ አዋጀትስ።

15 ካዎይ ኪትዳይሳት ቢታ ኡባ ኪታ ጋዶሶና። ቃስ ሱሳ ካታማንካ ኦደትስ። ያትን፥ ሱሳ ካታማ አሳ ኡባይ ዳጋምስ። ሽን ካዉዋራነ ሃማራ እስፈ ኡትድ፥ ዎይነ ኡሻ ኡዮሶና።