ማርድክዮስ ቦንቸትስ
1 ሄ ዎደ ቃማ ካዋ ስኮይ ኤኮና እፅስ። ሄሳ ግሾ፥ ካዎይ ካዎ ታርከ ፃፍያ ማፃፋ ኤህድ፥ ካሰ ሀንዳ ታርከታ እያዉ ናባባና መላ ኪትስ። 2 ናባበትዳ ታርከታፐ እሶይ ማርድክዮስ ኦዳባ። ሄስካ፥ ካዎይ ደእያ ክፍልያ ናግያ፥ ጋባታነ ታራ ጌተትያ ናምኡ ሹፋት ካዋ ዎናዉ ማቅዳ ማቁዋ ማርድክዮስ ቆንጭስስ። 3 ካዎይ፥ "ያትን፥ እ ሄሳ ኦዳ ግሾ እያዉ እመትዳ ሹማተይ ዎይኮ ዎይቶይ አይቤ?" ያግስ።
ካዋ አይለት ዛሪድ፥ "እያዉ አይኮይ ኦሰትቤና" ያግዶሶና።
4 ካዎይ ዛሪድ፥ "ካረ ዳባባን ደኤይ ኦኔ?" ያግስ። ሄ ዎደ ባ ጊግስዳ ምን ማርድክዮሳ ካቃናዉ፥ ካዋ ኦይቻናዉ፥ ሃም ካረ ዳባባ ገልሸ ደኤስ።
5 ካዋ አይለት፥ "ሃም ካረ ዳባባን ኤቅስ" ያግዶሶና።
ካዎይ ዛሪድ፥ "ሃ ገላ ጊተ" ያግስ።
6 ሃም ገልዳፐ ጉየ ካዎይ፥ "ካዎይ ቦንቻናዉ ዶስያ አሳስ አይ ኦናዉ ኮሺ?" ያግድ ኦይችስ።
ሃም፥ "ካዎይ ታፐ ሀራ ኦና ቦንቻናዉ ዶሲ?" ያግድ ባ ዎዛናን ቆፕስ። 7 ሄሳ ግሾ፥ ሃም ካዋስ ያግድ ዛርስ፤ "ካዎይ ቦንቻናዉ ዶስያ አሳስ፥ 8 ካዎይ ባ ካዎተ ማኡዋ ኤህሶ፤ ባ ቶግያ ፓራ ሁጰን ጉቸ ዎ። 9 ሄሳፈ ጉየ፥ ካዎይ ባ ሞርናታፐ እስ ዳሮ ቦንቸትዳይሳ ፄግስድ፥ ካዎተ ማኦ እያ ማይዛናዳነ ካዋ ፓራ ቦላ እያ ኡትስድ፥ ካታማ ዳባባ ከሳናዳ ኪቶ። ያትኮ ሄ ዳሮ ቦንቸትዳ ሞርናይ እያ ስንን ሄመትሸ፥ ‘ካዎይ ቦንቻናዉ ዶስያ ኡራስ ሀይሳዳ ኦስ’ ያግድ አዋጆ" ያግስ።
10 ካዎይ ዛሪድ፥ ሃማ ሀይሳዳ ያግድ ኪትስ፤ "ህዛ ኤለሳ ደንዳዳ ካዎተ ማኡዋነ ታ ፓራ ኤካዳ፥ ነ ግዳይሳዳ አይሁደ ግድዳ ማርድክዮሳስ ኦ። እ ካዎ ኬ ገልያ ፐንገን ደኤስ። ነ ግዳይሳፈ እስባካ አሾፋ" ያግስ።
11 ሄሳ ግሾ፥ ሃም ማርድክዮሳ ካዎተ ማኦ ማይዝድ፥ ካዋ ፓራ ቦላ ኡትስስ። ቃስ ካታማ ዳባባን እያፐ ስንራ ሄመትሸ፥ "ካዎይ ቦንቻናዉ ዶስያ ኡራስ ሀይሳዳ ኦስ" ያግድ አዋጅስ።
12 ሄሳፈ ጉየ፥ ማርድክዮስ ካዎ ኬ ፐንገ ጉየ ስሚድ ብስ። ሽን ሃም ዳሮ አዛንዳ ግሾ፥ ጉሉንትድ፥ ኤለስሸ ባ ሶ ብስ። 13 ባና ጋክዳባ ኡባ ባ ማቸ ዞሳርስነ ባ ላገታስ ኦድስ። ኤንቲ እያኮ፥ "እያ ስንን ኔኒ ካዉያናዉ ዶምዳ ሀ አደይ፥ ማርድክዮስ፥ አይሁደ አስ ግድኮ፥ ነ እያራ ኤቀታዳ፥ እያ ፆናናዉ ዳንዳአካ፤ ቱማ እ ነና ይሳና" ያግዶሶና።
14 ኤንቲ ቡሮ ሄሳ ኦደትሽን፥ ካዋ ሹፋት ጋክድ፥ ሃማ አስትራ ጊግስዳ ግብራስ ኤለስድ ኤፍዶሶና።