አይሁደታ ፆኑዋ
1 አዳረ ጌተትያ ታማነ ናምአን አጌናን ታማነ ሄን ጋላሳይ ጋክስ። ሄ ጋላስ፥ ካዎይ ኮይሮ ከስዳ አዋጁዋ ማራን ሞርከት አይሁደታ ፆናና ግዳ ቆፕዳ ጋላሳ። ሽን ኦዳይ ሽረት ዎን፥ አይሁደት ባንታ ሞርከታ ፆንዶሶና። 2 ካዋ አርፀክስሳ ካዎተን ደእያ አይሁደት ኡባይ ባንታና ቆሀናዉ ኮይያ ኡባ ይሳናዉ ባንታ ካታማን ካታማን እስፈ ሺቅዶሶና። ሀራ ዛረ ግድዳ አሳይ ኤንታዉ ያይዳ ግሾ፥ ኤንታራ አይ አስካ ኤቀታናዉ ዳንዳእቤና። 3 ኤንቲ ማርድክዮሳስ ያይዳ ግሾ፥ ካዎፐ ጋርሳራ ቢታ ሃረይሳት፥ አዉራጃ አይሰይሳትነ ቢታ ሀላቃት ኡባይ አይሁደታ ማድዶሶና። 4 ማርድክዮስ ካዎ ጋን ግታ ማት እመትዳነ ዎልቃን ጉጅ ጉጅ ብያ አስ ግደይስ ሄ ካዎተን ደእያ ቢታ ኡባን ኤረትስ።
5 ሄ ጋላስ አይሁደት ባንታ ሞርከታ ኡባ ማሻን ጎይርድ ዉርስዶሶና፤ ባንታና እፅያ ኡባ ቦላ ኮይዳባ ኦዶሶና። 6 ዋና ካታማ ግድዳ ሱሳ ፃላላን እቻሹ ፄቱ አሳ ዎዶሶና። 7 ኤንቲ ፓርሻንዳታ፥ ዳልፎና፥ አስፓታ፥ 8 ፖራታ፥ አዳላ፥ አርዳታ፥ 9 ፓርማሽታ፥ አርሳያ፥ አርዳያነ ዋይዛታ ዎዶሶና። 10 ኤንቲ አይሁደታ ሞርከ ግድዳ ሃማ ናይታ። ሽን ኤንቲ ኤንታ ሻሉዋ ቦንቅቦኮና።
11 አይሁደት ሱሳ ካታማን ዎዳ አሳ ታይቦይ አፑነኮ ሄ ጋላስ ካዋስ ኦደትስ። 12 ያትን፥ ካዎይ ካውዉ አስትሮ፥ "አይሁደት ዋና ካታማ ግድዳ ሱሳ ፃላላን እቻሹ ፄቱ አሳነ ታሙ ሃማ ናይታ ዎዶሶና። ሄስ ሄሳ ግድኮ፥ ካዋ ቢታታን ኤንቲ ዎዳይ አፑና ግዳንደሻ! ቃስ ሀእ ኔኒ ዎስያባይ አይቤ? ታኒ ነዉ እማና። ኔኒ ታና ኦይችያባይ ሀራባይ አይቤ? ታኒ ነዉ ፖላና" ያግስ።
13 አስትራ ዛራዳ፥ "ካዋ ሀ ቆፋይ ኡፋይስኮ፥ ሱሳ ካታማን ደእያ አይሁደት ሀች ኦዳይሳዳ ዎንቶካ ኦ። ቃስ ታሙ ሃማ ናይታ አሃ ም ቦላ ካቃናዳ ኪታ" ያጋሱ።
14 ካዎይ ሄሳ ኦና መላ ኪትስ። አዋጆይ ሱሳ ካታማን ናምአን አዋጀትን፥ ታሙ ሃማ ናይታ አሀይ ኮጫ ቦላ ካቀትስ። 15 አዳረ ጌተትያ አጌናን ታማነ ኦይዳን ጋላሳን፥ ሱሳ ካታማን ደእያ አይሁደት እስፈ ሺቅድ፥ ሀራ ሄ ፄቱ አሳ ዎዶሶና፤ ሽን ሀእካ ኤንታ ሻሉዋ ቦንቅቦኮና።
16 ሄ ዎደ ሱሳ ካታማፐ ጋፃራ ደእያ ካዋ ቢታታን ደእያ አይሁደት እስፈ ሺቅድ፥ ባንታ ሞርከታ ኡባ ኦልዶሶና። ኤንቲ ላፑን ታማነ እቻሹ ሙኩሉ አሳ ዎዳፐ ጉየ ባንታ ሞርከታፐ ሸምፕዶሶና። ሽን ኤንታ ሻሉዋ ቦንቅቦኮና። 17 ሀይስ ኡባይ ሀንዳይ አዳረ ጌተትያ አጌናን ታማነ ሄን ጋላሳና። ታማነ ኦይዳን ጋላሳን ኤንቲ ሸምፕዶሶና፤ ግብራ ምሸ፥ ኡይሸነ ኡፋይትሸ ፔእያ ጋላስ ኦዶሶና።
ፑርማ ባኣለ
18 ሽን ሱሳ ካታማን ደእያ አይሁደት ታማነ ሄንነ ታማነ ኦይዳን ጋላሳን ዎሸ ፔእድ፥ ታማነ እቻሻን ጋላሳን ሸምፕዶሶና። ኤንቲ ሄ ጋላሳ ምሸ፥ ኡይሸነ ኡፋይትሸ ፔእያ ጋላስ ኦዶሶና።
19 ሄሳ ግሾ፥ ጉ ካታማታን ደእያ አይሁደት ሀች ጋካናዉ አዳረ ጌተትያ አጌናን ታማነ ኦይዳን ጋላሳ ባኣለ ጋላስ ኦድ ቦንቾሶና። ሄ ጋላሳን ሞሶናነ ኡዮሶና፤ ቃስ እሶይ እሱዋስ እሞታ እሞሶና። 20 ማርድክዮስ ሀ ሀንዳ ታርከ ኡባ ፃፍድ፥ ካዋ አርፀክስሳ ቢታ ኡባን፥ ሃሆንነ ማታን ደእያ አይሁደ ኡባስ የድስ። 21 ሄ ዳብዳብያን ማርድክዮስ አዳረ አጌናን ታማነ ኦይዳንነ ታማነ እቻሻን ጋላሳታ፥ አይሁደት ላይን ላይን ባኣለ ጋላስ ኦድ ቦንቻና መላ ኤንታዉ ኦድስ። 22 ሄ ጋላሳት አይሁደት ባንታ ሞርከታፐ ሸምፖ ደምዳ ጋላሳታ። ቃስ ሄ አጌናይ ኤንታ አዛኖይነ ዬሆይ ኡፋይሳንነ ግብራ ሙሳን ላመትዳ አጌና። ሄሳ ግሾ፥ ኤንቲ ሙሳንነ ኡሻን ኡፋይትሸ፥ እሶይ እሱዋስነ ማንቆታስ ካ እሞታ እምሸ ቦንቻና መላ ኤንታዉ ኦድስ።
23 አይሁደት ማርድክዮስ እምዳ ኪታ ኤክድ፥ ኤንቲ ቦንቻናዉ ዶምዳ ባልያ፥ ላይን ላይን አጎና ቦንቻናዉ ማእዶሶና። 24 አጋጋ ኮቻይ፥ ሀማዳታ ናአይ ሃም፥ አይሁደታ ኡባ ሞርከይ፥ ኤንታ ይሳናዉ ካሰ ማቀትድ ኤንታ ዎያ አጌናነ ጋላሳ ኤራናዉ ፑርማ ጌተትያ ሳማ የግስስ። 25 ሽን አስትራ ካዋኮ ገልዳፐ ጉየ፥ ሃም አይሁደታ ቦላ ማቅዳ ኢታ ማቆይ ኡባይ ጉየ ስሚድ፥ እያ ቦላ ፖለታናዳ ካዎይ ፁፈን ኪትስ። ያትን፥ ሃምነ እያ ታሙ ናይት አሀይ ምን ካቀትስ 26 ሄሳ ግሾ፥ ሀ ናምኡ ጋላሳት ፑርማ ባኣለ ጌተቶሶና። ሀ ዳብዳብያን ኤንታዉ ፃፈትዳባ ኡባ ጋሶን፥ ኤንቲ ባንታ አይፈን በእዳባ ጋሶንነ ኤንታ ቦላ ጋክዳባ ጋሶን 27 አይሁደት ባንታዉ፥ ባንታ ኮቻታስነ አይሁደ ግዳናዉ ኮይያ ኡባስ፥ ሀ ባልያ ዎጋ ኦድ ቦንችዶሶና። ሄስካ ላይን ላይን አጎና ሀ ናምኡ ጋላሳታ ቦንቻና መላሳ። 28 ሄ ጋላሳት የለታ ኡባን፥ ካታማታ ኡባን፥ አይሁደታ ኬ ኡባንነ ቢታ ኡባን ቦንቸታና መላ ቃሸትስ። ሄስካ፥ አይሁደት አዉደ ግድኮካ፥ ሀ ፑርማ ጋላሳታ ቦንቻናዉነ ሄ ጋላሳታን ሀንዳባይ ኤንታ ኮቻን ዶገቶና መላ ቆፓናዉ በሴስ።
29 ሄሳፈ ጉየ፥ አብካላ ናእያ፥ ካውያ አስትራነ አይሁደ አደይ ማርድክዮስ፥ ፑርማ ባልያባ ካሰ ፃፍዳ ዳብዳብያ ምንናዉ ሀይሳ ናምአን ዳብዳብያ ኩመ ማታን ፃፍዶሶና። 30 ሄ ዳብዳበት አርፀክስሳ ካዎተን፥ ፄታነ ላታማነ ላፑን ቢታን ደእያ አይሁደታ ኡባስ ሳሮይነ ዎፓተ ግዶ ግያ ሳሮታራ ፃፈትድ ኪተትዶሶና። 31 ቃስ ኤንቲ ካሰ ፆማናዉነ ካዮታናዉ ዎጋ ከስዳይሳዳ፥ ሀእ ኤንታ ግድን፥ ስንፈ ያና ኤንታ ኮቻታ ግድን፥ ሀ ፑርማ ጋላሳታ ላይን ላይን ዎጋ ኦድ ቦንቻና መላ ሄ ዳብዳበት ቆንጭሶሶና። ሄስ አይሁደ አደይ ማርድክዮስነ ካውያ አስትራ እስፈ ዞረትድ ከስዳ ኪታ። 32 ካወ አስትር ኪታይ ፑርማ ባኣለ ዎጋ ምንስ፤ እካ ማፃፋን ፃፈትስ።