1 ማርድክዮስ ሀ ሀንዳባ ኡባ ስእዳ ዎደ፥ አዛንድ ባ ማኡዋ ፔድ፥ ካዮ ማኦ ማእድ፥ ባ ሁጰን ብዶ ቆልስ። ባ ቃላ ቁ ኦድ፥ ይባታ ዬሆ ዬክሸ፥ ካታማ ግዶን ዩይስ። 2 ካዮ ማኦ ማእድ ካዎ ኬ ገላናዉ ኦንካ ዳንዳኦና ግሾ፥ እ ካዎ ኬ ገልያ ፐንግያ ጋካናዉ ብስ። 3 ካዋ አዋጆይ ስኤትዳ ቢታ ኡባን አይሁደታ ግዶን ግታ ካዮይ፥ ፆም፥ ዬሆይነ ዘለልስ ዶመትስ። ኤንታፈ ዳሮት ቃስ ካዮ ማኦ ማእድ፥ ካዮታናዉ ብዶ ቦላ ኡትዶሶና።

4 አስትር ዳንግርፀትነ እዮ ናግያ ሹፋት ይድ፥ ማርድክዮሳባ እዉ ኦድዳ ዎደ እያ ዳሮ አዛናሱ። ማርድክዮስ ካዮ ማኡዋ ቃርድ፥ ሀራ ማኦ ማአና መላ እያዉ ማኦ የዳሱ፤ ሽን እ ኤኮና እፅስ። 5 ሄሳፈ ጉየ አስትራ፥ ካዎይ እዉ ኪተታና መላ ዎዳ ሀታካ ጌተትያ ሹፋ ፄጋዳ፥ ማርድክዮሳ መቶይ አይበኮ ቃስ እ አይስ ካዮትያኮ ኤራና መላ እያኮ ኪታሱ። 6 ሀታክ ካዎ ኬ ገልያ ፐንግያ ማታን ካታማ ዳባባን ደእያ ማርድክዮሳኮ ብስ። 7 ማርድክዮስ፥ ባ ቦላ ጋክዳባ ኡባ ቆንጭስድ፥ እያዉ ኦድስ። ቃስ አይሁደታ ኩመ ዉርሳናዉ ሃም ካዎ ቡቁራ ምንጅያ ኬስ እማናዉ ቆፕዳ ሚሽያ ልክያራ ኡባ አሾና ጌሽድ ኦድስ። 8 ሄሳ ፃላላ ግዶናሽን፥ አይሁደታ ዉርሳናዉ ሱሳ ካታማን ከይዳ አዋጆይ ፃፈትዳ ዎርቃትያ አስትርስ እማና መላነ ሀንያባ ኡባ እዉ ኦዳና መላ ኦድስ። ቃስ አስትራ ካዋኮ ገላዳ፥ ባ አሳይ ዉሮናዳ ጋናታና መላ ሀታካስ ኦድስ።

9 ሀታክ ይድ፥ ማርድክዮስ ግዳባ ኡባ አስትርስ ኦድስ። 10 አስትራ፥ ሀታካ ዛራዳ፥ ማርድክዮሳኮ ሀይሳዳ ያጋዳ ኪታሱ። 11 "ማጫ ግድን፥ አደ ግድን፥ ኦንካ ፄገቶና ደእሸ፥ ካዉዋራ ጋሄታናዉ ካዎ ጋስ ግዶ ዳባባ ገልኮ፥ ሀይቆ። ሽን እ ፄገቶና ካዋኮ ገልያ ዎደ ካዎይ ባ ዎርቃ ፃምኣ ፄራ እያኮ ዛሪድ በስኮ፥ ሄ ኡራ ፃላል ፓፃ አቴስ። ሀ ህግያ ካዋ ዞረይሳታፐ ብድ፥ ጮ አሳ ጋካናዉ ደእያ አስ ኡባይ ኤሬስ። ሽን ታኒ ሀስታሙ ጋላስ ግዶሳፐ ካዋኮ ገላናዉ ፄገታ ኤርከ" ያጋሱ።

12 ማርድክዮስ አስትራ ኪትዳ ኪታ ስእዳፐ ጉየ፥ 13 ሀይሳዳ ያግድ ኢኮ ኪትስ፤ "ታኒ ካዎ ጋን ደእያ ግሾ፥ ሀራ አይሁደታፐ አትሽን፥ ታና ቦችያባይ ባዋ ጋዳ ቆፖፋ! 14 ኔኒ ሀይሳ መላ ዎደን ስእ ጊኮ፥ አይሁደታስ ማዶይ ሀራሶፐ ያና። ኤንቲ ቱማ አታና፤ ሽን ኔንነ ነ አዋ ኬ አሳይ ሀይቃና። ኔኒ ካዎ ማቾ ግዳዳ ይዳይ ሀይሳ መላ ዎደሰኮ ኦን ኤሪ?" ያግስ።

15 አስትራ ማርድክዮሳኮ ሀይሳዳ ያጋዳ ዛራዳ ኪታሱ፤ 16 "ባዳ ሱሳ ካታማን ደእያ አይሁደታ ኡባ ሺሻ፤ ፆምድ ታዉ ዎስተ። ሄ ጋላስነ ሄ ቃም ዉራና ጋካናዉ፥ ካ ሞፕተ፤ ሃ ኡዮፕተ። ታኒ ታና ሀጋዝያ ማጫታራ ሄሳዳ ፆማና። ሄሳፈ ጉየ፥ ህግያን ድገትዳባ ግድኮካ፥ ካዎይ ደእያ በሳ ታኒ ገላና። ታኒ ሀይቅኮካ ሀይቃና" ያጋሱ።

17 ማርድክዮስ ብድ፥ አስትራ እያ ኪትዳይሳዳ ኡባ ኦስ።