ዮናሳ ዎሳ
1 ዮናስ ሞሉዋ ኡሎን ደእሸ፥ ባ ጎዳ ፆሳ ሀይሳዳ ያግድ ዎስስ።
2 "ታኒ ታ ዋያን ደአሸ ነና ፄጋስ፤
ነካ ታዉ ስአዳሳ።
ታኒ ስኦለ ጪሙዋ ግዶን ደአሸ፥
ማዶ ኮያዳ ኔኮ ዋሳስ
ነካ ታ ዋሱዋ ስአዳሳ።
3 ኔኒ ታና አባ ጪሙዋን ዱገ የጋዳሳ።
ሃ ታ ዩሹዋ ተቅስ፤
ዎልቃማ ዙለይ ታ ቦላራ አስ።
4 ‘ታኒ ነ ስንፈ ዎራ ሆለታስ፥
ሽን ነ ጌሻ ኬ ዛራዳ በአና’ ጋዳ ቆፓስ።
5 ሃ ታዉ ቆ ጋክስ፥
አባ ጪሞይ ታና ምትስ።
አባን ደእያ ማታይ ታ ሁጰን ፃፀትስ።
6 ታኒ ሃ ጋርሳን ደእያ ደረታ ባሱዋ ጋካዳ ምተታስ፥
ቢታ ዉላይ መርናዉ ታ ቦላ ጎርደትስ፥
ሽን ታ ጎዳዉ ፆሳዉ፥ ኔኒ ታ ሸምፕዉ ኢታ ኦላፈ ከሳዳሳ።
7 ታ ሸምፕያ ዶጭዳ ዎደ፥
ጎዳዉ ታ ነና ቆፓስ፤
ታ ዎሳይ ኔኮ ነ ጌሻ ኬ ጋክስ።
8 ሀዳ ግድዳ ኤቃ ፆሳታ ቦላ ዘምፐይሳት፥
ነዉ ደእያ ባንታ አማነተ አጎሶና።
9 ሽን ታኒ ጋላታ ማዝሙረ ነዉ ያርሻና።
ታ ቃንግዳባካ ነዉ ጋና።
አይስ ጊኮ፥ አቶተይ ፆሳፈ" ያግስ።
10 ሄሳፈ ጉየ፥ ጎዳይ ሞሉዋ ኪትስ። ሞሎይ ዮናሳ መላ ቢታ ቦላ ጮይስ።