ዮናሳ ማፃፋ 4

ዮናሳ ይሎነ ጎዳ ማሮታ

1 ሽን ሄስ ዮናሳ ዳሮ ኡፋይስቤና። ሄሳ ግሾ፥ እ ይሎትስ። 2 ጎዳኮ፥ "አቤት ጎዳዉ ታኒ ኮይሮ ታ ቢታን ደአሸ ግዳይስ ሀይሳ ግደኔ? ታኒ ነ ስንፈ በታዳ ታርሰሳ ባናዉ ኤለስዳይ ሀይሳሳ። ኔኒ ቃይነ ማሮት ኩምዳ ፆሲ ግደይሳ፥ ሀንቆስ ኤለሶናይሳነ ዉሮና ሲቆን ኩምዳይሳ፥ ቃስ ኤሀና ግዳ ኢታባካ ቃታዳ አግያ ፆሲ ግደይሳ ታኒ ካሰካ ኤራይስ። 3 ሀእ አቤት ጎዳዉ፥ ሀያና ታና ዎ፤ ደኦፐ ታዉ ሀይቆይ ሎኦ" ያግድ ዎስስ።

4 ጎዳይ እያኮ፥ "ኔኒ ሀይሳ ሸነታናዉ በሲ?" ያግስ።

5 ሄሳፈ ጉየ፥ ዮናስ ካታማፐ ጋፃ ከይድ ዶሎሀ ባጋን ኡትስ። ሄሳን ባዉ ሻቃራ ሻቃርድ እ ኩያን ኡትድ ካታማ ቦላ ጋካናዉ ደእያባ ባአናዉ ናጌስ። 6 አዋ ሱላፐ ዮናሳ አሻና መላ ጎዳይ እስ ጎሰ ዶልስስ። ሄ ጎሰ ሀይይ ዮናሳ ሁጰ ቦላ ባጋራ ኩያ ግዳና መላ ኦስ። ዮናስ ሄ ጎሰ ጋሶን ዳሮ ኡፋይትስ። 7 ሽን ዎንተ ጋላስ ዎንታ ጉራ ፆሳይ ጉፁነ ጊግስስ። ሄ ጉፁንያ ጎሰይ መላና ጋካናዉ ማሱ። 8 አዋይ ከይያ ዎደ ፆሳይ ዶሎሀ ባጋፈ ምሻ ጫርኮ የድስ። ዮናስ ላባናና ጋካናዉ አዋይ ዮናሳ ሁጵያ ፁግስ። ያትን እ፥ "ደኦፐ ታዉ ሀይቆይ ሎኦ" ያግድ ሀይቆስ ዎስስ።

9 ፆሳይ ዮናሳኮ፥ "ኔኒ ሀ ጎሰ ግሾ ይሎታናዉ በሲ?" ያግስ።

ዮናስ፥ "ኤ በሴስ፤ ኡባራካ ሀይቃና ጋካናዉ ይሎታናዉ ታዉ በሴስ" ያግስ።

10 ያትን ፆሳይ ዮናሳኮ፥ "ዝነ ዶላዳ ሀች መልዳ ጎሴስ፥ ነ ዳቡሮናርስ፥ ነ ድቾናርስ ሀይሳ መላ ቃታዳሳ። 11 ሽን ኡሻችነ ሀድርስ ሻክድ ኤሮና ፄታነ ላታሙ ሙኩሉ አስነ ዳሮ መሄይ ደእያ ሀ ግታ ካታማ ናናወስ ታኒ ቃታናዉ በሰኔ?" ያግስ።