1 ሄሳፈ ጉየ፥ ጵላፆስ የሱሳ ጋራፍስስ። 2 ዎታዳረት አጉን ካላቻ መድ እያ ሁጰን ዎዶሶና። ቃስ ዞኦ ማኦ እያ ማይዝዶሶና። 3 እያኮ ሺቅድ፥ "አይሁደ ካዋዉ፥ መርናዉ ካዎታ" ያግድ እያ ባቅዶሶና።

4 ጵላፆስ ቃስካ ካረ ከይድ፥ አይሁደታኮ፥ "ሄኮ፥ ታኒ እያፐ አይ ኢታካ ደማቦናይሳ ህንተ ኤራና መላ እያ ህንተኮ ካረ ከሳና" ያግስ። 5 ሄሳፈ ጉየ፥ የሱሲ አጉን ካላቻ ባ ሁጰን ዎድ፥ ዞኦ ማኦ ማእድ፥ ካረ ከይስ። ጵላፆስ አይሁደታኮ፥ "ኡራ ሀይሳ በእተ" ያግስ።

6 ካህነ ሀላቃትነ ፆሳ ኬ ናገይሳት እያ በእዳ ዎደ፥ ባንታ ቃላ ቁ ኦድ፥ "ማስቃልያ ቦላ ካቃ! ካቃ!" ያግዶሶና።

ጵላፆስ ኤንታኮ፥ "ህንተ እያ ኤፍድ፥ ማስቃልያ ቦላ ካቅተ። ታኒ እያፐ አይ ኢታካ ደማብከ" ያግስ።

7 አይሁደት ዛሪድ፥ "ኑስ ህገይ ደኤስ። እ ባና ፆሳ ናአ ኦዳ ግሾ ኑ ህግያ እ ሀይቃናዉ በሴስ" ያግዶሶና።

8 ጵላፆስ ሄሳ ስእዳ ዎደ ካሰይሳፈ ዳሮ ያይስ። 9 ቃስካ ጵላፆስ ባ ኦሶ ኬ ስም ገልድ የሱሳኮ፥ "ኔኒ አዉፐ ያዲ?" ያግድ ኦይችስ። ሽን የሱሲ እያዉ አይኮካ ዛርቤና። 10 ሄሳ ግሾ፥ ጵላፆስ፥ "ታዉ ኦድኪ? ነና ብላናዉ ዎይኮ ማስቃልያ ቦላ ካቃናዉ ታዉ ማት ደኤይሳ ኤርኪ?" ያግስ።

11 የሱሲ፥ "ፆሳይ ነዉ ማታ እምቦናባ ግድያኮ ታ ቦላ ማት ነዉ ዴናሽን። ሄሳ ግሾ፥ ታና ነዉ አድ እምዳይስ አያ ናጋራ ኦስ" ያግስ።

12 ጵላፆስ ሄሳ ስእዳ ዎደ የሱሳ ብላናዉ ኦገ ኮይስ። ሽን አይሁደት ባንታ ቃላ ቁ ኦድ፥ "ኔኒ እያ ብልያባ ግድኮ ካዋ ቄሳረ ባጋ ግዳካ። ባና ካዎ ግያ ኦንካ ቄሳረ ሞርከ" ያግዶሶና።

13 ጵላፆስ ሄሳ ስእድ የሱሳ ካረ ከስስ። ያትድ፥ "ሎቸ ሹች" ጌተትያ በሳን ፕርዳ ኦይድያን ኡትስ። እብራወ ዶናን ሄ በሳይ "ጋባተ" ጉሱ። 14 ሄ ጋላሳይ ፓስካ ባኣለ ቦንቻናዉ ጊገተ ጋላስ። ሳአይ ኡሱፑን ሳተ ሄራ። ጵላፆስ አይሁደታኮ፥ "ህንተ ካዋ ሀይሳ በእተ" ያግስ።

15 አይሁደት ባንታ ቃላ ቁ ኦድ፥ "ድጋ! ድጋ! ማስቃልያ ቦላ ካቃ" ያግዶሶና።

ጵላፆስ ዛሪድ፥ "ህንተ ካዋ ታኒ ማስቃልያ ቦላ ካቃናይሳ ኮዬቲ?" ያግድ ኦይችስ።

ካህነ ሀላቃት፥ "ቄሳረፐ ሀራ ካዎይ ኑስ ባዋ" ያግዶሶና።

16 ሄሳፈ ጉየ፥ ኤንቲ የሱሳ ማስቃልያ ቦላ ካቃና መላ ጵላፆስ ኤንታዉ አድ እሚስ።

ኤንቲ የሱሳ ኦይክድ ኤፍዶሶና። 17 የሱሲ ባ ማስቃልያ ቶክድ፥ "ሁጰ ጉገ" ጌተትያ በሳ ብስ። "ሁጰ ጉገ" ጉሳይ እብራወ ዶናን "ጎልጎታ" ጉሱ። 18 ኤንቲ ሄ በሳን ማስቃልያ ቦላ የሱሳ ካቅዶሶና። ቃስ እያራ ሀራ ናምኡ አሳታ፥ እሱዋ ያ ባጋራ ሀንኩዋ ሀ ባጋራ ማስቃልያ ቦላ ካቅዶሶና። 19 ጵላፆስ፥ "አይሁደታ ካዋ፥ ናዝረተ የሱሳ" ግያ ፁፈ ፃፍድ ማስቃልያ ቦላ ዎስ። 20 የሱሲ ማስቃልያ ቦላ ካቀትዳ በሳይ ካታማስ ማታን ደእያ ግሾ፥ ዳሮ አይሁደት ሄ ፁፍያ ናባብዶሶና። ፁፈይ ፃፈትዳይ እብራወ ዶናን፥ ላትነ ዶናንነ ግርከ ዶናና። 21 ሄሳ ግሾ፥ ካህነ ሀላቃት ጵላፆሳኮ፥ " ‘ሀ አደይ ባና አይሁደ ካዎ ያግስ’ ጋዳ ፃፋፐ አትሽን፥ ‘አይሁደ ካዎ’ ጋዳ ፃፎፓ" ያግዶሶና።

22 ያትን፥ ጵላፆስ፥ "ታ ፃፍዳይሳ ፃፋስ" ያግድ ዛርስ።

23 ዎታዳረት ማስቃልያ ቦላ እያ ካቅዳፐ ጉየ፥ እያ ማኡዋ ኤክድ፥ ኦይዱ በሳን ሻክድ፥ እሶ እሶ ኤክዶሶና። የዳ ማኤትያ እያ አዱሳ ማኡዋ ኤክዶሶና። 24 ዎታዳረት፥ "ኦና ጋካኔኮ፥ ሳማ የጋናፐ አትሽን፥ ማኡዋ ፔኮ" ያግዶሶና። ሄስ ሀንዳይ ጌሻ ማፃፋን፥

"ታ ማኡዋ ሻክ ኤክዶሶና፤

ታ አዱሳ ማኡዋ ቦላካ ሳማ የግዶሶና"

ጌተትዳይስ ፖለታና መላሳ።✝ ሄሳ ግሾ፥ ዎታዳረት ሄሳ ኦዶሶና።

25 ሽን የሱሳ ማስቃልያ ማታን እያ አይያ፥ እያ አየ ምችያ፥ ቀልዮጰ ማችያ ማይራማነ ማግደላ ማይራማ ኤቅዶሶና። 26 የሱሲ ባ አይዉነ እ ዶስያ ታማረይ ያን ኤቅዳይሳታ በእድ፥ ባ አየኮ፥ "ታ አየ፥ ነ ናኣ ሀይሳ በአ" ያግስ።

27 ሄሳፈ ጉየ፥ ሄ ታማርያኮ፥ "ነ አይዉ ሀኖ በአ" ያግስ። ሄ ታማረይ እዮ ሄ ዎደፐ ዶምድ ባራ ዳና መላ ሶ ኤፍስ።

28 ሄሳፈ ጉየ፥ የሱሲ ኡባይ ሀእ ፖለትዳይሳ ኤርድ፥ ጌሻ ማፃፋን ፃፈትዳይስ ፖለታና መላ "ታና ሳሜስ" ያግስ።✝

29 ሄ በሳን እስ ፁጋ ኩመ ጫላ ዎይነይ ደኤስ። ኤንቲ እስፖንጀ ሄ ዎይንያን የግድ፥ ህሶጰ ም ፄራን ዎድ፥ የሱሳ ዶናኮ ሺሽዶሶና። 30 የሱሲ ዎይንያ ጋንፅ በእድ፥ "ፖለትስ" ያግስ።

ሄሳፈ ጉየ፥ ባ ሁጵያ ዝቅ ኦድ ባ ሸምፑዋ እሚስ።

31 ሄ ጋላሳይ ጊገተ ጋላስ ግድያ ግሾነ ዎንተ ጋላሳይ ቦንቾ ሳምባታ ግድያ ግሾ፥ አሳታ አሀይ ማስቃልያ ቦላ ሳምባታ ጋላስ ፔኦና መላ ኤንታ ቶሁዋ መንድ፥ ማስቃልያፐ ዎሳና መላ አይሁደት ጵላፆሳ ዎስዶሶና። 32 ሄሳ ግሾ፥ ዎታዳረት ብድ፥ የሱሳራ ካቀትዳ ናምኡ አሳታ ቶሁዋ መንዶሶና። 33 ሽን የሱሳኮ ይዳ ዎደ እ ሀይቅዳይሳ በእድ፥ እያ ቶሁዋ መንቦኮና። 34 ሽን ዎታዳረታፐ እሶይ እያ ምያ ቶራን ጫድን ኢራካ ሱነ ሃ ጎግስ። 35 ህንተ አማናና መላ ሄሳ በእዳይስ ማርካትስ። እያ ማርካተይካ ቱማ። ቃስ እ ኦደይስ ቱማ ግደይሳ ኤሬስ። 36 ሄስ ሀንዳይ ጌሻ ማፃፋይ፥ "እያ መቀታፐ እሶይካ መቀና" ግዳይስ ፖለታና መላሳ።✝ 37 ቃስካ ጌሻ ማፃፋይ ሀራ በሳን፥ "ኤንቲ ባንታ ጫድዳይሳ በአና" ያጌስ።✝

38 ሄሳፈ ጉየ፥ አርማተ ካታማፐ ይዳ ዮሰፍ የሱሳ አሀ ኤካናዉ ጵላፆሳ ዎስስ። ዮሰፍ አይሁደታስ ያይዳ ግሾ ቆሳን የሱሳ ካለይሳ።

ጵላፆስ፥ "ኤካ" ያግስ። ሄሳ ግሾ፥ ዮሰፍ ብድ የሱሳ አሀ ኤክስ። 39 ቃስ ንቆድሞስ ሄሳፈ ካሰ የሱሳኮ ቃማ ይዳይስ፥ ካርበነ ጎዳረ ኡራ ዋላከትዳ ሀስታማነ እስ ክሎ ግራመ ግድያ ሽቶ ኤክድ ዮሰፋራ ይስ።✝ 40 ሄ ናምኡ አሳት የሱሳ አሀ ኤክድ፥ አይሁደት አሀ ፃፅያ ማራን፥ ሽቶራ፥ ሞጎ አፍላን ፃፅዶሶና። 41 የሱሲ ማስቃልያ ቦላ ካቀትዳ በሳን ዳሮ አታክልተይ ደኤስ። ሄ አታክልትያ ግዶን ሹቻፈ ዎጨትድ ኦሰትዳ ቡሮ ኦንካ ሞገትቦና ኦራ ዱፎይ ደኤስ። 42 ሄ ጎንጎሎይ ማታን ደእያ ግሾነ አይሁደት ሳምባታስ ጊገትያ ጋላስ ግድያ ግሾ፥ የሱሳ አሀ ያን ሞግዶሶና።