1 ሄሳፈ ጉየ፥ የሱሲ ፅብራዶሳ አባ ማታን ባ ታማረታስ ዛር ቆንጭስ። እ ኤንታዉ ሀይሳፈ ካልድ ደእያ ሀኖታን ቆንጭስ። 2 ስሞን ጰፅሮስ፥ መንተ ጌተትያ ቶማስ፥ ቃና ጋልላፐ ይዳ ናትናኤል፥ ዛብድዮሳ ናይትነ የሱሳ ታማረታፐ ሀራ ናምአት እስፈ ደኦሶና።

3 ስሞን ጰፅሮስ ኤንታኮ፥ "ታኒ ሞሎ ኦይካናዉ ባይስ" ያግስ።✝

ኤንቲ፥ "ኑካ ኔራ ባና" ያግድ፥ ዎጎሉዋ ግዶ ገልዶሶና። ሽን ኤንቲ ሄ ቃማን አይብ ሞሎካ ኦይክቦኮና።

4 ዎንታ ጉራ ፃልቀይ ዶላናፐ ስን፥ የሱሲ አባ ጋፃን ኤቅስ፥ ሽን እያ ታማረት የሱሳ ግድዳይሳ ኤርቦኮና። 5 የሱሲ ኤንታኮ፥ "ታ ላገቶ፥ ሞሎ ኦይክቤከቲ?" ያግስ።

ኤንቲ ዛሪድ፥ "አይኮካ ኦይክቦኮ" ያግዶሶና።

6 እ ዛሪድ፥ "ህንተ ግትያ ዎጎሉዋፐ ኡሻቻ ባጋራ የግተ፤ ጉ ሞሎ ህንተ ኦይካና" ያግስ። ሄሳ ግሾ፥ ግትያ ኡሻቻ ባጋራ የግዶሶና። ሞሎይ ዳርዳ ግሾ ጎች ከሳናዉ ፆነትዶሶና።✝

7 የሱሲ ዶስያ ታማረይ ጰፅሮሳኮ፥ "ሀይስ ጎዳ!" ያግስ። ስሞን ጰፅሮስ እ ጎዳ ግዳይሳ ስእዳ ዎደ፥ ካሎ ደእያ ግሾ፥ ባ ማኡዋ ማእድ አባ ግዶ ጉፕ ገልስ። 8 ሽን ዎጎሉዋን አትዳ ሀንኮ ታማረት ሞሎይ ኩምዳ ግትያ ጎችድ፥ አባፈ ጋፃ ከይዶሶና። ኤንቲ አባፈ ናምኡ ፄቱ ዋ መላ ሃኮሶና። 9 ኤንቲ አባፈ ጋፃ ከይዳ ዎደ፥ ፂፋ ቦንቆን ሞሎይ ደኤይሳነ ኡይ በእዶሶና።

10 የሱሲ ኤንታኮ፥ "ሀእ ህንተ ኦይክዳ ሞሉዋፐ ጉራ ሀምተ" ያግስ።

11 ስሞን ጰፅሮስ ዎጎሉዋን ገልድ፥ ፄታነ እሻታማነ ሄ ዎጋ ሞሎት ኩምዳ ግትያ ጎችድ አባፈ ጋፃ ከስስ። ሞሎይ ሄሳ መላ ዳሮ ግድን ግተይ ዳከትቤና።

12 የሱሲ ኤንታኮ፥ "ሃ ይድ ሚተ" ያግስ። እ ጎዳ ግደይሳ ኤንቲ ኤርዳ ግሾ፥ እያ ታማረታፐ እሶይካ፥ "ኔኒ ኦኔ?" ግድ እያ ኦይቻናዉ ምንዳይ ባዋ። 13 የሱሲ ይድ፥ ኡይ ኤክድ ኤንታዉ እሚስ፤ ሞሉዋካ ሄሳዳ እሚስ።

14 የሱሲ ሀይቆፐ ደንድድ ባ ታማረታስ ቆንጭሽን ሀይስ ሄን።

15 ኤንቲ ምዳፐ ጉየ፥ የሱሲ ስሞን ጰፅሮሳኮ፥ "ዮና* ናአዉ ስሞና፥ ታና ሀይሳታፐ አዳ ዶሳይ?" ያግስ።

ስሞን ጰፅሮስ፥ "ኤ ጎዳዉ፥ ታኒ ነና ዶሰይሳ ነ ኤራሳ" ያግስ።

የሱሲ እያኮ፥ "ታ ዶርሳ ማራታ ሄማ" ያግስ።

16 የሱሲ ቃስካ፥ "ዮና ናአዉ ስሞና፥ ታና ዶሳይ?" ያግስ።

ስሞን ጰፅሮስ፥ "ኤ ጎዳዉ፥ ታኒ ነና ዶሰይሳ ነ ኤራሳ" ያግስ።

የሱሲ፥ "ታ ዶርሳታ ሄማ" ያግስ።

17 የሱሲ ሄን፥ "ዮና ናአዉ ስሞና፥ ታና ዶሳይ?" ያግስ።

የሱሲ ሄን ስሞን ጰፅሮሳኮ፥ "ታና ዶሳይ?" ያግድ ኦይችዳ ግሾ፥ ጰፅሮስ አዛንድ፥ "ጎዳዉ፥ ኔኒ ኡባባ ኤራሳ፤ ታኒ ነና ዶሰይሳ ነ ኤራሳ" ያግስ።

የሱሲ፥ "ታ ዶርሳታ ሄማ። 18 ታኒ ነዉ ቱማ ኦዳይስ፤ ኔኒ ናአተን ደእያ ዎደ፥ ነርካ ዳንጨታዳ፥ ነ ኮይዳ ሶ ባሳ። ሽን ነ ጭምዳ ዎደ ነ ኩሽያ ምጫ በሳና። ሀር ዳንጭሳና፤ ነ ዶሶና ሶ ኤፋና" ያግስ። 19 የሱሲ ሄሳ ጰፅሮስ አይ መላ ሀይቆ ሀይቅድ፥ ፆሳ ቦንችሳኔኮ ኤርሳናዉ ግስ። ሄሳ ግዳፐ ጉየ፥ የሱሲ ጰፅሮሳኮ፥ "ታና ካላ" ያግስ።

20 ጰፅሮስ ጉየ ስሚድ፥ የሱሲ ዶስያ ታማረይ ባፐ ጉየራ የይሳ በእስ። ሄ ታማረይ፥ ካሆ ምያ በሳን የሱሳኮ ሺቅድ፥ "ጎዳዉ፥ ነና አድ እማናይ ኦኔ?" ግዳይሳ።✝ 21 ጰፅሮስ ሄ ታማርያ በእድ፥ "ጎዳዉ፥ ሀ አደይ ቃስ ዋናኔ?" ያግድ የሱሳ ኦይችስ።

22 የሱሲ እያኮ፥ "ታኒ ያና ጋካናዉ እ ዳና መላ ታኒ ኮይኮ፥ ሄስ ነና አይ መትዴ? ኔኒ ታና ካላ" ያግስ።

23 ሄሳ ግሾ፥ ሄ ታማረይ ሀይቀና ግያ ኦዳይ እሻታ ኡባ ጋክስ። ሽን የሱሲ፥ "ታኒ ያና ጋካናዉ፥ እ ዳና መላ ታኒ ኮይኮ ነና አይ መትዴ?" ያግስፐ አትሽን፥ "ሀይቀና" ግቤና።

24 ሀ ኦዳባ ማርካትዳይነ ሀይሳ ፃፍዳይ ሄ ታማርያ። እያ ማርካተይ ቱማ ግደይሳ ኑኒ ኤሮስ።

25 የሱሲ ኦዳ ሀራ ዳሮባይ ደኤስ። ታ ቆፕን፥ ኡባባይ ሁጰን ሁጰን ፃፈትዳኮ፥ ፃፈትያ ማፃፋታስ ኩመ አላመይ ዎናዉ ግዳናባ ዳነና።