1 ጎዳይ እዮባኮ ዛሪድ ያግስ፤
2 "እዮባ፥ አስ ኡባ ዳንዳእያ ጎዳራ ሞተትድ፥ ላናዉ ዳንዳኢ?
አነ ፆሳራ ሞተትያ ኡራይ እያዉ ዛሮ" ያግስ።
3 ሄሳፈ ጉየ፥ እዮብ ዛሪድ፥ ሀይሳዳ ያግስ፤
4 "ጎዳዉ፥ ታኒ ፓና ላፋ አስ፤
ታ ዶና ቦላ ኩሸ ዎዳ ስእ ጋናፐ አትሽን፥
ነዉ አይ ዛሮ እማናዉ ዳንዳእያና?
5 ታኒ እስ ቶሆ ኦዳስ፤ ሽን ታዉ ዛርያባይ ባዋ፤
ናምአን ኦዳስ ሀራ ጉጅከ" ያግስ።
6 ሄሳፈ ጉየ፥ ጎዳይ ጎተ ግዶን ግድድ እዮባኮ ሀይሳዳ ያግስ።
7 አደዳ ነ ፄሳ ዳንጫዳ ደንዳዳ፥
ታ ኦይሻስ ዛሮ እማ።
8 ነ ታና ባላ አስ ከሳና ሀናዬ?
ነዉ ፅሎ ግዳናዉ ታና ዎርዳንቾ ከሳዬ?
9 ፆሳ ዎልቃ መላ ዎልቅ ነዉ ደኢ?
ፆሳይ ጉመይሳዳ ነ ጉማናዉ ዳንዳአይ?
10 ሄሳ ግድኮ፥ ነ ቦንቹዋነ ግታተ ማአ፤
ነ ዎልቃነ ቴሙዋ ግፃ።
11 ነ ሀንቁዋ ጉሳ፤
አነ ኦቶራንቾታ ፄላዳ ካዉሻ።
12 አነ ሎይ ፄላዳ ኦቶርትያ ኡባ ዬላያ፤
ኢታታ ኡባ ኤንቲ ደእያ በሳፈ ይሳ።
13 ኤንታ ኡባ ቢታን ሞጋ፤
ዱፎን የጋዳ ኤንታ ቦላ ጎርዳ።
14 ሄ ዎደ ነ ዎልቃይ ነና አሻናዉ ዳንዳኤይሳ
ታ ማርካታና።
15 ታኒ ነና መዳዳ መዳ ብሄሞታ ጌተትያ ዶአ በአ፤
እ ቦራዳ ማታ ሜስ።
16 እያ ፄሳን ደእያ ዎልቃይነ
እያ ኡሉዋ ካምዳ ሻያ ምኖተይ ዳሮ።
17 እያ ጎይናይ ዝጋዳ ቦላን ቃፄስ፤
እያ ገዳ ፃጶት ምኖን ዶቀትዶሶና።
18 እያ መቀይ ናሰ ብራታ መላ፤
እያ ገዳይ ብራታ ኩረ መላ።
19 ፆሳይ መዳ መታ ኡባ ጋርሳን እ አስ፤
ታፐ አትሽን፥ ሀር እያ ፆናናዉ ዳንዳኤይ ባዋ።
20 ዶእ ጉፕያ ደረይ፥
እያዉ ምያባ ዶልሴስ።
21 ም ኩያ ጋርሳን ዝንኤስ፤
ጫረን ማቃ ግዶን ቆሰቴስ።
22 ምት ባንታ ኩያን እያ ገንሶና፤
ሻፋ ጋፃን ድጭያ ምት እያ ካሞሶና።
23 ሻፋይ ክፅድ ጎገይ ዎደ ዳጋመና፤
ዮርዳኖሰ ሻፋይ ቆ ጋካናዉ ኩምኮካ እ ህርገና።
24 እያ አይፍያ ቶይስድ፥ እያ ኦይካናዉ ዳንዳእያ አስ ደኢ?
እያ ሲያ ሉክድ ኦይካናዉ ዳንዳኤይ ኦኔ?