1 እዮብ ካልድ ሀይሳዳ ያግስ፤
2 ሀእ ታ ደእያ ዱሳይ፥
ፆሳይ በን ታና ናግዳ ዎድያ ግዴረነ!
3 ሄ ዎደ እያ ፆምፐይ ታ ቦላ ፖኤስ፤
እያ ፖኡዋን ማ ካንዳ ባይስ።
4 ሄ ዎደይ ፆሳይ ታ ኬ አንጅን፥
ታኒ ታ ናአተ ዎልቃራ ደእዳ ዎደ።
5 ሄ ዎደ ኡባ ዳንዳእያ ፆሳይ ታፐ ሻከትቤና፤
ታ ናይት ታ ዩሾን ደኦሶና።
6 ሄ ዎደ ታኒ ታ ኩሽያ ማን ሜጫይስ፤
ሹቻ ቢታን ቶከትዳ ሻማሆይ፥
ሻፋ ሃዳ ጎግያ ዛይተ እሜስ።
7 ታኒ ካታማ ፕርዳ ኬ ብዳ ዎደ፥
ሻንጎታራ እስፈ ኡታይስ።
8 ሄ ዎደ ናአተት ታና በእድ ኦገ የዶሶና፤
ጭማት ታና ቦንቻናዉ ደንድ ኤቅዶሶና።
9 ሀላቃት ኦዳ አጋግዶሶና፤
ባንታ ኩሽያ ባንታ ዶና ቦላ ዎዶሶና።
10 ሄ ካታማን ደእያ ግታ አሳት ስእ ግዶሶና፤
ኤንታ እንፃርሳይ ኤንታ ኮቶኑዋ ባቅድ ኦይክስ።
11 ታባ ስእዳ ኡባይ ናሼስ፤
ታና በእዳ ኡባይ ቦንቼስ።
12 ሄስ ሀንዳይ፥
ታኒ ማንቆታ ዋሱዋ ስአዳ አሽዳ ግሾነ፥
ይኦ ናይታ ማድዳ ግሾሳ።
13 ሀይቃና ሀንያ አሳት ታና አንጅዶሶና፤
አምኤት ታ ማዱዋን ኡፋይትዶሶና።
14 ፅሎተ ማኦዳ ማአስ፤
ሱረ ፕርዳ አፍላዳ ማአስ፤
ባርኔፃዳ ዎስ።
15 ታኒ ቆቀታስ አይፈ፥
ዎበታስ ቶሆ ግዳስ።
16 ማንቆታስ አዋ ግዳስ፤
ኦገ አሳስ ፃባቃ ግዳስ።
17 ታኒ ኢታታ ጋጩዋ መንስ፤
ኤንቲ ቦንቅዳይሳ ኤንታ ዶናፐ የግሳስ።
18 ታኒ ታ ዎዛናን፥ "ታ ላይይ ሻፈዳ ዳርን፥
ታ ሶን ቦንቾን ሀይቃና" ጋዳ ቆፓስ።
19 ታኒ ፃጱዋ ሃን የድዳ፥
ታሽያ ቦላ አክ ኩምዳ ም መላሽን!
20 ታ ቦንቸትዳ መላ ደአስ፤
ታ ዎልቃይ ኡባ ዎደ ኦራሽን!
21 ታ ሃሳያ ዎደ ስእ ግድ ስኤስ፤
ታ ዞርያ ኡፋይሳን ኤኮሶና።
22 ታ ኤንታና አልያ ግሾ፥
ታ ኦዳ ስምን ታፐ ጉየራ ኦድያ አስ ባዋ።
23 ጎሻንቾይ እራ ናገይሳዳ፥
ኤንቲ ታ ሃሳያ ስአናዉ ሀካንክድ ናጎሶና።
24 ኤንቲ ህርጋን ደእሽን ታ ሶምኡዋ ፓሽክሳይስ፤
ታ ሚቻይ ኤንታ ምንስ።
25 ታኒ ኤንቲ ዳና ኦግያ ዶራዳ ኤንታዉ ሀላቃ ግዳስ።
ባ ኦላንቾታ ግዶን ደእያ ካዎዳ ታ ኤንታ ግዶን ደአስ፤
ኤንቲ አዛንያ ዎደ ምንስ።