ባልዳዶሳ ሃሳያ
1 ሹሀ ቢታፈ ይዳ በልዳዶስ ዛሪድ፥
2 "ኔኒ ሄሳ አዉደ ጋካናዉ ኦደታይ?
ነ ዶናፐ ከያ ቃላይ ዎልቃማ ጎተ መላ።
3 ኡባ ዳንዳእያ ፆሳይ ፅሎ ፕርደኔ?
4 ነ ናይት ፆሳ ቦላ ናጋራ ኦዳ ግሾ፥
እ ኤንታ ኤንታ ናጋራ ግሾ ሴርስ።
5 ሽን ኔኒ ፆሳኮ ስምኮ፥
ኡባ ዳንዳእያ ፆሳ ዎስኮ፥
6 ኔኒ ጌሽነ ሱረ ግድኮ፥
እ ነ ግሾ ደንድድ ነና ማዳና፤
እ ካሰ ነ ደኡዋ ዛሪድ ዎይታና።
7 ነ ዶመይ ጉ ዳንኮካ፥
ነ ዉርሰይ ዳሮ አድ ዳራና።
8 ካሰ የለታ አነ ኦይቻ፤
ኑ ማይዛት አይ ታማርዳኮ ፕልጋዳ ደማ።
9 ኑኒ ዝነ ናይታ አይባካ ኤሮኮ፤
ኑ ሀ ሳአን ደእያ ላይይ ኩያ መላ።
10 ኤንቲ ነና ታማርሰይነ ነዉ ኦደይ፥
ባንታ ዎዛናን ዎዳባፐ ግደነዬ?
11 ጫረይ ባይና በሳን ፓልክ ዶላናዉ ዳንዳኢ?
ሃ ባይና በሳን ማይረይ ጭልአናዉ ዳንዳኢ?
12 ቡሮ ድጭድ ቃንፀቶና ደእሸ፥
ጭልኦ ማታፐካ ኤሶን መሌስ።
13 ፆሳ ዶግያ አሳ ኡባ ዉርሰይ ሄሳ መላ፤
ፆሰ ኤሮና አሳ ኡፋይሳይ ያና።
14 እ አማነትያባይ መቅያባ፤
እ ጬቀትያባይካ ሻንጎ ሃዳ መላ።
15 እ ባ ሻንጎ ሃዳ ቦላ ዘምፓና፥ ሽን ኤቀና፤
እ እያ ኦይካና፥ ሽን ዱፅ ዎና።
16 እ አዋ ዎደ ሃ ኡይድ ጭልእያ አታክልተ መላ፤
ባ ፃጱዋ ቢታ ኡባን የድዳ ም መላ።
17 ባ ፃጱዋ ኬላን የዴስ፤
ግታ ሹቻ ቦላ ባ ፃጱዋ ፃፄስ።
18 ሽን እ ባ በሳፈ ሾደትኮ፥
ሄ በሳይ፥ ‘ታ ነና በአብከ’ ያጋና።
19 ኢታ አሳታ ኡፋይሳይ ሄሳ መላ፤
ሀራት ይድ ኤንታ በሳ ኦይካና።
20 "ፆሳይ ቦረይ ባይና አሳ የግ አገና፤
ኢታ ኦይሳታ ማደና።
21 እ ዛሪድ ነና ሚቻናነ እልልሳና።
22 ነና እፀይሳት ዬላ ማአና፤
ኢታታ ኬይ ያና" ያግስ።