1 "እዮባ፥ ነዉ ኮያና አስ ደእኮ አነ ፄጋ!
ኪታንቾታፐ ኦደኮ ነ ፄላኔ?"
2 ኤያ ኡራ ላንጨይ ዎስ፤
አኬክ ባይና ኡራ ቃናተይ ይሴስ።
3 ኤያ ኡራይ ምንድ ደእሽን በአስ፤
ሽን ቆፖና እያ ኬይ ባደትስ።
4 እያ ናይት ሳሮይ ባይና ዳና፤
ፕርዳ ዳባባን ኤንታዉ ኤቅያ አስ ባይና ግሾ ኤንቲ ቆሄታና።
5 እ ሺሽዳ ካ ኮሻትዳ አሳይ ማና፤
ሀር አቶሽን አጉን ግዶን ዶልዳይሳካ አጎኮና።
ሳሞትዳይሳት እያ ሻሉዋ ኤካናዉ አሞቶሶና።
6 መቶይ ሳአፐ ከየና፤
ዋየይ ቢታፈ ዶለና።
7 ታም ፕንፅድ ዎይሳዳ፥
አስ መቶስ የለትስ።
8 "ታ ነና ግድያኮ ታ ፆሳኮ ሺቃና፤
ታ ሞቱዋካ እያ ስንን ዎና።
9 እ ታይበቶና ማላታታ፥
ፕልገቶና ዎልቃማባታ ኦስ።
10 እራ ቢታን ቡክሴስ፤
ጎሻ ጋድያስ ሃ የዴስ።
11 ካዉሻታ ቁ ቁ ኦስ፤
ካዮተይሳታ ምንድ ኡፋይሴስ።
12 ኤንታ ቆፋይ ፖለቶና መላ፥
ገናንቾታ ሀልቹዋ ሀዳ ኦስ።
13 ጭንጫታ ኤንታ ገነ ኦሱዋን ኦይኬስ፤
ገናንቾታ ማቁዋ አድ የጌስ።
14 ጋላሳይ ኤንታዉ ማ ግዳና፤
ሴታ ጋላስ ማን ሄመትያ አሳዳ ታታፋና።
15 ማንቆታ ኤንታ ሞርከታ ማሻፈ አሼስ፤
ኤንታ ዎልቃማታ ኩሽያፐ ዎ ኤኬስ።
16 ሄሳ ግሾ፥ ማንቆታስ ኡፋይስ ደኤስ፤
ጌላተ ስእ ኦስ።"
17 "ፆሳይ ሴርያ አስ አንጀትዳይሳ፤
ሄሳ ግሾ፥ ኡባ ዳንዳእያ ፆሳ ሴራ ካፓ።
18 እ መንስ፥ ሽን ዛሪድ ኮሌስ፤
እ ማዱንፅሴስ፥ ሽን እያ ኩሸይ ሌስ።
19 ኡሱፑን ቆሞ ቆሆታፐ እ ነና አሻና፤
ላፑንይ ነና ቦቸና።
20 ኮሻ ላይ ሀይቆፐ፥
ኦላ ዎደ ማሻፈ ነና አሼስ።
21 እ ነና ኢታ እንፃርሳፈ ናጋና፤
ቦሽ ጋክያ ዎደ ያያካ።
22 ቦሻ ቦላነ ኮሻ ቦላ ነ ሚጫና፤
ባዞ ዶአታስ ያያካ።
23 ነ ጎሻ ቢታን ሹች ዴና፤
ባዞ ዶአታራ ነ ሳሮን ዳና።
24 ነ ዱንካነይ ሳሮ ግደይሳ ነ ኤራና፤
ነ ዳራ ነ ፆሞስያ ዎደ አይብካ ፓጨና።
25 ነ የለታይ ዳራናይሳነ
ነ ኮቻይ ማታ መላ ግዳናይሳ ነ ኤራና።
26 ካ ዎደ ናግድ ጫከተይሳዳ፥
ኔኒ ጭማተ ካላዳ ዱፎ ባና።
27 "እዮባ፥ ኑኒ ሄሳ ኡባ ፕልግድ ፄልዳ።
ሄስ ቱማ ግድያ ግሾ አኬካዳ ኤካ" ያግስ።