1 ሄሳፈ ጉየ፥ ሹሀ ቢታፈ ይዳ በልዳዶስ ዛሪድ፥

2 "እዮባ፥ ነ ኦዳስ ዉርሰ ባዌ?

አነ አኬካ፤ ኑ ኦድያባ ስአ።

3 ነ ኑና አይስ ሚዝ ኦይ?

አይስ ኑና ቱለ ከሳይ?

4 ነ ሀንቀታዳ ነና ቆሃሳ፤

ነ ሀንቁዋን ቢታይ ካሎ አታኔ?

ዎይኮ ዛላይ ባ በሳፈ ቃፀኔ?

5 ናጋራንቾታ ፆምፐይ ቶአና፤

እያ ታማ ላጮይ ያና።

6 ኤንታ ኬን ደእያ ፆምፐይ ያና፤

ኤንታ ፖኦይካ ማና።

7 እ ታንግያ ታንጎይ ቃሜስ፤

እያ ኢታ ቆፋይ እያ ዛሪድ ሜስ።

8 እያ ሄመይ እያ ፅሄን ገልሴስ፤

እያ ቶሆት ግተታና።

9 ፅሄይ እያ ግንደ ኦይካና፤

ዲዝ እያ ቃፆ ድጋና።

10 ዩርደ ዎዶሮይ ሳአን እያዉ ጌም ኡቴስ፤

እ ሄመትያ ኦግያን ግተይ ደኤስ።

11 ዳጋም እያ ተቅድ ኦይኬስ፤

እያ ጉየራ ካልድ እያ የደስ።

12 እያ ዎልቃ ኮሽ ዉርስስ፤

ዮይ እያ ምየን ናጌስ።

13 ሀርገይ እያ ላፈስ፤

ሀይቆይ እያ ሞክድ ኤኬስ።

14 ህርግ ባይና ደእያ ባ ኬፈ ጎደቴስ፤

ኤንቲ እያ ሀይቆ ጌተትያ ካዋኮ ኤፎሶና።

15 እያ ኬይ ታማን ኦይከታና፤

እ ደእያሱዋን ዲነይ ላለታና።

16 ጋርሳራ ፃጶይ መላና፤

ቦላራ ሀይ ቆቆፈታና።

17 እያ ቆፕያ አስ ቢታፈ ያና፤

እያ ሱንይ ሳአን ሀሳየቶና አታና።

18 እ ፖኦፐ ማን ጎደታና፤

አላምያፐ ያና።

19 እያዉ ናእ ዎይኮ ኮች ያና፤

እ ደእዳ በሳን እስ አስ ፓፃ አተና።

20 ዉሎሀ ባጋ አሳይ እያ ጋክዳ መቱዋን ዳጋምዶሶና፤

ዶሎሀ ባጋ አሳይ ያሻን ኮኮርዶሶና።

21 ኢታ አሳ ዉርሰይ አዉደካ ሄሳ መላ፤

ፆሳ ኤሮና አሳ ቃዳይ ሄሳ መላ" ያግስ።