እዮባ ማፃፋ 22

ኤልፋዛ ሃሳያ

1 ሄሳፈ ጉየ፥ ተማና ቢታፈ ይዳ ኤልፋዝ ሀይሳዳ ያግድ ዛርስ፤

2 "አስ ፆሰ ጎአናዉ ዳንዳኢ?

ሀር አቶሽን ጭንጫ ግድኮካ፥

ባና ጎአናፐ አትሽን፥ ፆሰ ጎኤና።

3 ኔኒ ፅሎ ግድኮ ሄስ ኡባ ዳንዳእያ ፆሳ ኡፋይስዬ?

ነ ኦገይ ቦረይ ባይናባ ግድኮ ሄሳን እ አይ ዎ ደሚ?

4 "እ ነና ሴረይነ ፕርደይ፥

ኔኒ እያዉ ያይያ ግሾዬ?

5 ነ ኢታተይ ዳሮ ግደነዬ?

ነ ናጋራስ ዛው ባዋ ግደኔ?

6 ጋሶይ ባይና ነ እሻታ ዋሰ ፄግሳዳሳ፤

አሳ ማኡዋ ቃራ ኤካዳ ኤንታ ካሎ የዳዳሳ።

7 ሳሞትዳይሳታ ሃ ኡሻባካ፤

ኮሻትዳይሳታ ካ ሙዛባካ።

8 ኔኒ ዎልቃማ፥ ዱረነ

ቦንቸትዳ አስ ግዳዳ ደአሸ፥

9 አምኤታ መላ ኩሸ የዳዳሳ፤

ይኦታስ ዎልቃ ይሳዳሳ።

10 ነ ዩሾይ ግተትዳይ፥

አኬኮና ያሽ ነና ኮኮርሰይ ሄሳሳ።

11 ነ በኦና መላ ምዳይ፥

ቃስ ክፃ ሃን ነ ሙከትዳይ ሄሳሳ።

12 "ፆሳይ ቃ ሳሉዋን ኡትድ፥

ቃን ደእያ ፆልንቶታ ዱገ ፄሌስ።

13 ሽን ኔኒ፥ ‘ፆሲ አይ ኤሪ?

ሳካና ማ ግዶራ ካንድ፥

ፕርዳናዉ ዳንዳኢ?

14 ሳሎ ጉፋን ቦላ እ ስመረትያ ዎደ፥

እ በኦና መላ ስከትዳ ሻራይ እያ ጎዜስ’ ያጋሳ።

15 ናጋራንቾት ሄመትዳ በን ኦግያራ

ባናዉ ቆፋ ቃቻዲ?

16 ኤንታዉ ዎደይ ጋኮና ደእሽን ሀይቅዶሶና፤

ኤንታ ደኦ ባሶይ ድኦን ሜጨትድ ይስ።

17 ኤንቲ ፆሳኮ፥ ‘ኑፐ ሃካ!

ኡባ ዳንዳእያ ፆሳይ ኑስ አይ ኦናዉ ዳንዳኢ?’ ያግዶሶና።

18 ግድኮካ፥ ኤንታ ኬ ሎኦባን ኩንዳይ ፆሳ፤

ሄሳ ግሾ፥ ኢታ አሳ ቆፋ ታ ኤክከ።

19 "ኢታ አሳት ሴረትያ ዎደ፥

ፅሎት ኡፋይቶሶና፤

ሱረ አሳት ሀይሳዳ ያግድ፥ ኤንታ ቦላ ቀልቅሶሶና።

20 ‘ኑ ሞርከት ይዶሶና፤

ኤንታ ዱረተይ ታማስ አትስ’ ያጎሶና።

21 "እዮባ፥ ሀእካ ፆሳራ ጊጋ፤

እያራ ሳሮ ደአ፤

ያትኮ ኔኒ አንጀታና።

22 እያ ትምርትያ ስአ፤

እያ ቃላ ነ ዎዛናን ዎ።

23 ኔኒ ኡባ ዳንዳእያ ፆሳኮ ስምኮ፤

ነዉ ሳእ ስማና፤

ኢታ ኦሶ ኡባ ነ ሶፐ ድጋ፤

24 ነ ዎርቃ ሳአን ሆላ፤

ነ ኦፍራ ዎርቃ ሻፋን የጋ።

25 ያትኮ ኡባ ዳንዳእያ ፆሳይ፥

ነዉ ዎርቃነ ዶረትዳ ብራ ግዳና።

26 ሄ ዎደ ነ ኡባ ዳንዳእያ ፆሳን ኡፋይታና፤

ዬላቶና ፆሳኮ ፑደ ፄላና።

27 ኔኒ እያ ዎሳና፥ እ ነና ስአና፤

ነ ቃንገ እያዉ ጋና።

28 ነ ቆፕዳባይ ፖለታና፤

ነ ሄመትያ ኦገይ ፖኦ ግዳና።

29 ፆሳይ ኦቶረይሳታ ካዉሼስ፤

ሽን አሽከታ አሼስ።

30 ነ ኩሸይ ጌሽ ግድኮ፥

ባላ አሳይ ነ ጋሶን ማሮታ ኤካናነ አታና" ያግስ።