ኤልፋዛ ሃሳያ
1 ተማናፐ ይዳ ኤልፋዝ ዛሪድ፥
2 "እስ አስ ፃልታምድ ኔራ ኦደትኮ ኔኒ ላንጫኔ?
ሽን ሃሳዮና አጋናይ ኦኔ?
3 ሄኮ፥ ኔኒ ዳሮታ ታማርሳዳሳ፤
አርጋጭዳ ኩሸታ ምንዳሳ።
4 ነ ቃላይ በትዳይሳታ ኮልድ ኤስስ፤
ዳቡርዳ ጉልባታታ ምንስ።
5 ሽን ሀእ መቶይ ነና ጋክን ኡፋይስ ቃንፃዳሳ፤
ኡንእ ነና ተቅን ዳጋማዳሳ።
6 ነ ፆሳስ ያየይስ ነና አማንድ ዎቤኔ?
ነ ሱረ ሄመይ ነዉ ኡፋይስ ግድቤኔ?
7 "አነ ቆፓ፤ ጌሻ አስ ግድድ ይዳይ ኦኔ?
ሱረ አስ ግድድ ሾደትድ ይዳይ ኦኔ?
8 ታ በእዳይሳዳ፥ ኢታተ ጎይድ መቶ ዘረይሳት፥
እያ ዛሪድ ቡጫና።
9 ኤንቲ ፆሳፈ ከያ ሸምፖን ፑነትድ ያና፤
እያ ሀንቁዋ ላጩዋን ሜተታና።
10 ኢታት ጉድያ ጋሞ መላ ፃጎሶና፤
ሽን ኤንታ አቻይ መቀረትስ።
11 ሻንካትድ ምያባ ይዳ ጋሞይ ሀይቀይሳዳ፥
ኤንታ ናይትካ ላለተይሳዳ ኢታታ ናይት ላለታና።
12 "እስ ጋላስ እስ ፁራይ ታኮ ይስ፤
ሄ ፁራ ካልካሻን ታ ስአስ።
13 ዎልቃማ ስኮይ አሰ ኦይክዳ ዎደ
ኡንኤያ ቃማ አሙሆ ግዶን፥
14 ያሽነ ኮኮርስ ታና ኦይክስ፤
ታ መቀት ኮኮርዶሶና።
15 ጫርኮይ ታ ሶምኡዋ ባቅድ አስ፤
ታ ዳጋምን ታ አሳተ እክሰይ ኤቅስ።
16 እ ታ ስንን ኤቅስ፤
ሽን እ አይበኮ ሻካዳ ኤራብከ።
ሄሳፈ ጉየ፥ ስእ ግዳ በሳፈ
ሀይሳዳ ግያ ግርሳ ስአስ።
17 ‘ሀይቅያ አስ ፆሳ ስንን ፅሎ ግዳናዉ ዳንዳኢ?
ዎይኮ አስ ባና መዳይሳ ስንን ጌሽ ግዳናዉ ዳንዳኢ?
18 ፆሳይ ባ አይለታን አማነቶናባ ግድኮ፥
ባ ኪታንቾታንካ ባላ ደምያባ ግድኮ፥
19 ያትን፥ ኡርቃ ኬን ደኤይሳት፥
ኤንታ ደኡዋ ባሶይ ቢታ ግድዳይሳት፥
ጉፁነፐ ኤሶን ሀይቀይሳት ዋናኔ?
20 ዎንታ በንትድ ኦማርስ ሀይቆሶና፤
ኦንካ ሀሳዮና መርናዉ ዮሶና።
21 ሸይ ሾደትዳ ዱንካነ መላ
ጭንጫተ ባይና ሀይቆሶና።’ "