እዮባ ማፃፋ 38

ፆሳ ዛሩዋ

1 ሄሳፈ ጉየ፥ ጎዳይ ጎተ ግዶን ግድድ እዮባስ ሀይሳዳ ያግድ ዛርስ።

2 ኤር ባይና ኦዳን

ታ ዞርያ ምሰይ እ ሄስ ኦኔ?

3 አነ አደዳ ዳንጨታ፤

ታ ነና ኦይቻና፥ ታዉ ዛራ።

4 ታኒ አላምያ መያ ዎደ ኔኒ አዉን ደአይ?

አነ ነ አኬክያኮ ታዉ ኦዳ።

5 ነ ኤርኮ፥ ሀ ሳኣ ዳልጋተስ ዛዋ ዎዳይ ኦኔ?

ዋ ዎዶሩዋ ሳአ ቦላ የግዳይ ኦኔ?

6 ሀ ሳኣ ቱሳታ ኩንዶና መላ ምንድ ኦይክዳይ አይቤ?

ሀ ሳኣ ባሱዋስ ኮይሮ ሹቻ ዎዳይ ኦኔ?

7 ዎንታ ባካላት እስፈ የፅያ ዎደ፥

ኪታንቾት ኡባይ ኡፋይሳን እልል ግያ ዎደ ነ ኤራይ?

8 አባ ሃ ቢታፈ ቅድ ከይያ ዎደ፥

እያ ፐንገታ ጎርድዳይ ኦኔ?

9 አባ ሻራ ማይዛስ፤

ሳካና ማን ጎዝዳይ ታና።

10 አባይ ካንና መላ ዛዋ መዳይ፥

እያዉ ፐንገነ ተቀ ዎዳይ ታና።

11 "ሀይሳ ጋካናዉ ያ፤

ሽን ሀይሳፈ አፋ፤

ነ ዎልቃማ ሆበይ ሄሳን ኤቆ" ያግዳይ ታና።

12 እዮባ፥ ነ የለቶሶፐ ዎንት ዎንታና መላ ኪታ ኤራይ፥

አዋይ ዶላና በሳ ማላ ኤራይ?

13 ዎንታ ፖኦይ ቢታ ኡባን ፖአና መላ፥

ኢታ አሳታ ቆሰትዳ በሳፈ ቆንጨ ከሳና መላ፥

ኔኒ ዎንታ ኪታ ኤራይ?

14 ዎንታ ፖኦይ ዙማታነ ዛንጋራታ፥

ዳኮይድ ዎዳ ማኦይ ኤቅድ በንተይሳዳ በሴስ፤

ኦቶ ቦላ ዎዳ ማታመዳ ቆንጬስ።

15 ኢታታ ፖኦይ ኤከታና፤

ኤንታ ማካላ ቀሰይ መቃና።

16 ጪሞ አባ ግዶ ገላዳ ፑልቱዋ በአዲ?

ዎይኮ እያ ባሱዋ ጋካዳ እያ ኦላ ስመረታዲ?

17 ነዉ ሀይቆ ፐንገት በንትዶና?

ዎይኮ ሳካና ማ ፐንገታ በአዲ?

18 ሳአይ አይ መላ ግቴኮ ነ ኤራይ?

ሄሳ ኡባ ነ ኤርያ ግድኮ ታው ኦዳ።

19 ፖኦኮ ኤፍያ ኦገይ አዉኔ?

ም አዉን ደእያኮ ኤራይ?

20 ፖኦነ ማ ኤንታ በሳ በሳ ኤፋናዉ ዳንዳአይ?

ኤንቲ ደእያ በሳ ኤፍያ ኦግያ ኤራይ?

21 ኔኒ ሳእ መትያ ዎደ የለትዳ ግሾነ

ዳሮ ላይ ደእዳ ግሾ ሄሳ ኤሮና አጋካ!

22 ሻች ምንጀትያ ኬ ገላዲ?

ዎይኮ ሻች ዶረትዳ በሳ በአዲ?

23 ታኒ ኤንታ መቶ ዎደስ፥ ኦላ ዎደስነ

ቶራ ጋላሳስ ምንጃ ዎስ።

24 ዎልአን ከያ በሳ ኤፍያ ኦገይ አዉን ደኢ?

ዎይኮ ዶሎሀ ጫርኮይ አዉፐ ከይድ ጫርኪ?

25 እር ዎያ በሳ ጊግስዳይ፥

ዳዳስ ኦገ ከስዳይ ኦኔ?

26 አስ ዶና መላ ቢታን

እራ ቡክሰይ ኦኔ?

27 መልዳ መላ ቢታይ እራን ላክድ፥

ፑርጮ ማታይ ዶላና መላ ኦዳይ ኦኔ?

28 እራስ አው ደኢ?

ዎይኮ አካ የልዳይ ኦኔ?

29 ሻቻስ አይያ ደአይ?

30 ሃይ ሹቻዳ ምንስ፤

አባ ባሶይ ሻቻዳ ኡከቴስ።

31 ፕላድሳ ጌተትያ ፆልንቶታ እስፈ ጋዳ ቃቻናዉ ዳንዳአይ?

ኦርዮና ጌተትያ ፆልንቶት ቃሸትዳ ዎዶሩዋ ብላናዉ ዳንዳአይ?

32 ጩጋን ጩጋን ደእያ ፆልንቶታ ኤንታ ዎደን ዎደን ከሳናዉ ዳንዳአይ?

ቢረ ጌተትያ ፆልንቶታ ኤንታ ናይታራ ካለናዉ ዳንዳአይ?

33 ሳሎት አይ ህገን አቅያኮ ነ ኤራይ?

ሄ ህገይ ሳኣ ሃራና መላ ኦናዉ ዳንዳአይ?

34 ድኦይ ነና ሙካና መላ እራ ቡክሳናዉ፥

ነ ቃላ ቁ ኦዳ ሻራታ ስሳናዉ ዳንዳአይ?

35 ዎልአን ኪታናዉ ዳንዳአይ?

ኤንቲ ኔኮ ይድ፥ "ሄኮ፥ አይ ኦኖ?" ጎና?

36 ዎዛናስ ጭንጫተ፥

ካሀስ አኬካ እምዳይ ኦኔ?

37,38 ባ ጭንጫተን ሻራታ ታይባናዉ ዳንዳኤይ ኦኔ?

ባና ሙኑቅድ፥ ኡርቃ ከስድ ምንናዉ፥

ሳሎ ኦቶታ ገድ ኦድ ሃ ትጋናዉ ዳንዳኤይ ኦኔ?

39 ሻንካታዳ ማጫ ጋሞስ ምያባ ኤሀ ኤራይ?

ኮሻትዳ ጋሞ ማራታ ሙዛ ኤራይ?

40 ኤንቲ ጎንጎሎን ቆሰት ናጎሶና፤

ባዞን ዝንእድ ፔኦሶና።

41 ቁሮት ኮሻትድ ዳቡርያ ዎደ፥

ኤንታ ናይት ምያባ ደማናዉ ታኮ ዋስያ ዎደ፥

ኤንታዉ ምያባ እመይ ኦኔ?